योहेजकेल 26

सोर सोहोरन विरुद् भोगवानो वोगे गोथी वात

1 ईग्यारे वोरीसोन पेहले मोहनेन पेहलो दाहड़े पोरबु योहोवान यो बुल मारे यां पुग्यो: 2 हे मानसोन ओवलियाद, सोर जो योरुसालेमोन वाराम कोवलो छे, अहा, अहा! जे देस देसोन मानसोन झोपला सारकी होती, होयी नास होय गोय! हेरा उजड़ी जाने सी हांव भोरपुर होय जायीस।

3 ओस कोरिन परमेश्वर योहोवा ओसु कोवे: हे सोर, देख, हांव तारे विरुद् छे; आरु ओसु कोरीस की बेसका मुलुके तारे विरुद् ओसी उबरोय जासे जोसी दोरियान झेलोक उठे। 4 होये सोरन भितड़ाक उदारसे, आरु हेरा खांबाक तुड़ नाखसे; आरु हांव तेनु पोर सि हेरा धुळाक खुरचीन तीनाक चाफरिया ओतरान रोहनदीस। 5 होयो दोरयान इचमा जाळ नाखनेन ओतरोत जागु रोवसे; काहकी परमेश्वर योहोवान यो बुल छे, आरु हुयो जाति जाति सी लुट लेसे; 6 आरु हेरा जे पोरायटा खोयड़ा मा छे, तेनुक तोलवार सी मार नाखसे। तोत्यार हुये जान लेसे कि हांव पोरबु योहोवा छे।

7 काहाकी परमेश्वर योहोवा ओसु कोवे: देख, हांव सोर देसोन विरुद् राजगादी पोर बोरला बेबीलोनोन राजा नोबुकदनेस्सर काजे घुल्‌ला, रोथ, सोवारी, मोटली गोड़दी, आरु टुळा भेळ बोखेवरे भेनी गोथु लावीस। 8 तारा पुराटा खोयड़ा मा होय, हेनुक तोलवार सी मारसे, आरु तारे विरुद् होड़ताव कोरसे आरु भितड़ा बांदसे; आरु ढाव बोनावसे। 9 होये तुमरा भीतड़ाक तुड़ पाड़से। 10 हेरा घुल्‌ला ओतरा होयसे, कि तु हेंदरा धुवा सी ढाकाय जासे, आरु जोत्यार होये तारा झोपला मा ओसा भोरायसे जोसा मानसे नाका वाळा सोहोर मा भोराये, तोत्यार तारा भीतड़ा सोवारी, छोकड़ा आरु रोथोन बुल सी काप पोड़से। 11 बेबीलोनोन राजा तुमरा सोहोर सी घुल्‌ला पोर सोवार होयिन निकळसे। हेरा घुल्‌लान टापरा तुमरी सोयड़ोक काजे बिगाड़ देसे। होये तुमरा मानसोक तोलवार सी मार नाखसे। तुमरा सोहोरोन मोटला वातेल्‌ला खांबा काजे नेचा पाड़ देसे। 12 मानसे तारा धोनोक लुट लेसे आरु तारा वेपारोन सोमान हापकी लेसे; होये तारा भीतड़ाक उदार देसे आरु तारा गोंहोवता घोरोक तुड़ नाखसे; तारा घोरोन दोगड़ा आरु काठा आरु तारा धुळाक दोरीयामा नाख देसे। 13 हांव तारा गीतोन सुरताव बोंद कोर दिस, आरु तारा वाजान बुल ओळी सोमवाये। 14 हांव तुसेक उगाड़ली चाफुर कोर दिस; तु जाळ नाखनेन ओतरोत जागो रोय जासे, आरु ओळी वोसाड़्यो नी जासे; काहाकी मेसे योहोवात यो कोवलु छे, परमेश्वर योहोवान यो बुल छे।

15 परमेश्वर योहोवा सोर सी ओसु कोवे: तारा पोड़नेन बुल सी जोत्या घायेल मानसे आयोड़से आरु तुमरेम मारनेन मारनेत होयसे, तोत्यार काय दोरियान कातोर वाळा देस बिकोम नी काप पोड़से? 16 तोत्यार दोरियान धोड़ेन देसोन आखा डाहला मानसे आपनी आपनी राजगादी पोर सी उतेरसे, आरु आपसा बागा आरु बुटेदार छिंदरा निकाळीन धोदड़ुदिन कापता जायीन छिंदरा पेहेरसे आरु भिमा बोसीन होर टेमे कापता रोवसे; आरु तारे कारण घाबराय जासे। 17 होये तारा वाराम विलापोन गीत बोनावीन तारसी कोवसे,

हे सोर, तु नावसाद्‌यो सोहोर हुतो

दोरीया पोल धोड़े गोथा मानसे तुमरेम वोसने आया।

तु नावसाद्यो हुतो,

पुन हेमी तु काय वी नी होय।

तु दोरीया पोर ताकोतवाळु होतु,

आरु तोसोत तुमरेम रोवन्या मानसे होता!

तु मोटा जागाम रोवने वाळा आखा मानसोक

बिहाड़्या कोर्या।

18 तारे पोड़नेन दाहड़े दोरीयान कातरे वाळा देस काप पोड़से,

आरु तारा जातला रोवने सी दोरीयान आखा टापु वाळा घाबराय जासे।

19 काहाकी परमेश्वर योहोवा ओसु कोवे: जोत्यार हांव तुसे उजाड़ी सोहोर जोसो उजाड़ कोरीस आरु तारे उपोर मोटला दोरियाक चोड़ावीस, आरु तु उंडा पानीम डूब जायीस, 20 तोत्यार खाडाम आरु पोड़नेवाळा पुठी हांव तुसे वी डाहडा मानसोम उतार दीस; आरु खाडाम आरु पोड़नेवाळा पुठी तारे नेचली कोवीम मेकीन डाहडान उजेड़ला जागान तोसु कोर दिस; यां लोगुन की तु ओळी नी वोसिस आरु नी जीवायीन कोवीम काहनलु जागु जोड़से। 21 हांव तुसे घाबरायनेन कारण कोरीस, आरु तु ओळी ओसु कोदी नी रोवे, पुन हेरनेम वी तारो पोतु नी लागसे, परमेश्वर योहोवान यो बुल छे।