योहेजकेल 8

परमेश्वरन वाराम योहेजकेल को दुसरो दोरसोन

योरुसालेम मा मुरती पुजा

1 ओळी छोटवे वरीस क छोटवे मोहनान पाँचवे दाहड़े को जोत्यार हांव आपसा घोर मा बठ्यो हुतो, आरु यहुदियो क डाहला मारे अगळ बोठला हुता। तेने टेमे पोरबु योहोवान ताकोत मारेम आवी। 2 तव हांव देख्यो कि आगठा सारको एक रुप देखा पोड़्यो, हेको कोड़्या सी नेचले धोड़े आगठो छे, आरु हेका कोड़्या सी उपोर पीतळ सारको चोमकी रोयो हुतो। 3 त्यो हात ओगो कोरीन मारा मुनकान झोटा धोरियो; आरु जीव न मेसे कळी आरु वादळा क विच मा चुटीन परमेश्वर को देखाड़ला दोरसोन मा योरुसालेम क मन्दिर क धड़े, आँगना क उना झोपला क धोड़े पुगाड़ देदा जेरो मुय बोखेवरे भेनी छे; आरु जिनामा उना घाड़ायीन मुरती को जागो हुतो हेका कारण सी घाड़ाय जागे। 4 ओळी चाँ इसराएल क परमेश्वर क सेक तसोज हुतो जसो हांव कोबार नोंदीन कातरे देख्यो हुतो।

5 त्यो मार सी कयो, "हे मानुसोन ओवलियाद, आपसा डुळा बोखेवरे भेनी देख।"अत: हांव आपसा डुळा बोखेवरे भेनी कोरीन देख्यो कि वेदी क झपला क बोखेवरे भेनी उना भोरायनीया झोपला मात त्यो घाड़ायन मुरती बोनायो। 6 तव त्यो मार सी कयो, "हे मानुस नी ओवलियाद, काय तु देखे छे कि ये काय कोर रोया? इसराएल क घोराना कायत मोटा घाड़ायीन काम याँ कोरतला, कि हांव आपसा चुखला जागा सी छेटा होय जाम; पुन तु एना सी वी जादा घाड़ायीन काम देखसे।"

7 तव त्यो मेसे आँगना क झपला पोर ली गुयो, आरु हांव देख्यो, कि भितड़ा मा एक डुचो छे। 8 तव त्यो मार सी कयो, "हे मानुस नु ओवलियाद, भीतड़ाक फुड़," एकालिय हांव भितड़ा क फुड़ीन काय देख्या की एक झपलो छे। 9 त्यो मार सी कयो, "धड़े जाईन देख कि ये लोगहन यां कोसा कोसा आरु बेसका घाड़ायीन काम कोर रोया।" 10 हांव धड़े जाईन देख्यो कि च्यारु धड़ेन भितड़ा पोर भाति भातिन रेंगनेवाळा जिवे आरु घाड़्च्या जोनवारोन चित्र, आरु इसराएलियो क लारे पुजायनेवाळा देवी देवताओं क चित्र बनावला छे! 11 इसराएल क घोरानान डाहला मा गोथा सोत्तोर मानसे जेनका वीच मा सापान क पुर्‌यो याजन्याह वी छे, त्यो उना चित्रो क अगळ उबो छे, आरु होरीक मानु आपसा हात मा धूपदान लीन छे, आरु धूप क धुवाड़ा क वादळान गोंदाय उठ रोय। 12 तव त्यो मार सी कयो, "हे मानुसन ओवलियाद, काय तु न देख्यो कि इसराएल क घराना क डाहला आँधरला मा आपसा पुजान घोरोम काय कोर रोया? ये कोवे धे, कि पोरबु हामुक नी देखतो। त्यो ते हामरा देस क छुड़ीन चाली गुयो छे।" 13 ओळी त्यो मार सी कयो, "तु एनु सी आरु वी जादा घाड़ायीन काम देखीस जो त्या कोरे।"

14 तव त्या मेसे योहोवा क भवन क उना झपला क पास ली गुया जे बोखेवरे भेनी हुतो आरु चाँ बायरा बोठला तम्मुज देवता जुबु रोड़ रोया हुता। 15 तव त्यो मार सी कयो "हे मानुस नी ओवलियाद काय तुन यो देख्यो? ओळी एना सी वी मोटा घाड़ायीन काम तु देखीस।"

16 तव त्यो मेसे योहोवा क भवन क धड़े आँगना मा ली गुयो: आरु चाँ योहोवा क भवन क झपला क पास मन्डप आरु वेदी क विच थुड़ाक पोच्चीस मानसे आपसा वासाक योहोवा क भवन न आरु आपसो मुय उगेनवे भेनी कोरला हुता; आरु त्या उगेवने भेनी दाहड़ा क वांद रोया हुता।

17 तव त्यो मार सी कयो, "हे मानुस नु ओवलियाद, काय तु न यो देख्यो? काय योहुदा क घराना जुगु घाड़ायीन काम कोरनो जो त्या याँ कोरे नानी वात छे? त्या आपसा देस क घाड़ाय सी भोर देदा, आरु ओळी यास आवीन मेसे रीस देवाड़े। पुन त्या मानु मुय बोनावीन मेसे वेला पाड़े। 18 एकालिय हांव वी रीसवायला सारको काम कोरीस, नी हांव गीन कोरो। मारा डुळा सी सातायीन त्या ढासी नी सोके। त्या उचा बुल सी मेसे आयड़से ती वी हेनकी विनत नी सोमळो।"