परमेश्वरन लारे मुरती पुजान वाक काहाड़नो
1 ओळी योहोवा क यो बुल मारे यां पुग्यो: 2 "हे मनख्यान ओवलियाद, आपसो मुय इसराएल क बोयड़ा क भेनी कोरीन हेका विरुद्ध नबुवत कोर, 3 आरु कय, हे इसराएलन बयड़ा, पोरबु योहोवा क बुल समलु! पोरबु योहोवा टेकड़ा आरु बोयड़ा सी, आरु नाळा आरु घाटी गोथु ओसु कोवे: देखु, हांव तुमरे पोर तलवार चालाड़ माँगीस, आरु तुमरा पुजा क उँचा जागा क नास कोरीस। 4 तुमरी वेदी उजड़से आरु तुमरा दाहड़ान मुरतिया तुड़ाय जासे; आरु हांव तुमरे मा सी मोरला माईन क तुमरा मुरत्यांन अगळ नाख दीस। 5 हांव इसराएलियो क शव क हेनकी मुरतियो क अगळ मेकीस, आरु हेनका हाड़का क तुमरा वेदियो क आड़े धोड़े वेरवी दिस। 6 तुमरा जोतरा बोसाड़ला सोहोर छे, त्या आखा ओसा उजाड़ जासे, कि तुमरा पुजान उँचा जागा वी उजाड़ होय जासे, तुमरा वेदियाँ उजड़ी जासे आरु हिट पाड़से, तुमरा मुरतिया जात रोहसे आरु तुमरा दाहड़ान मुरतिया काटाय जासे: आरु तुमरी आखी कारीगरी मिटाय जासे। 7 तुमरे वीच मोरलात पोड़से, आरु तुमु जान लेसु कि हांव योहोवा छे।"
8 "ती वी हांव कोतोरक वाचाड़ीन राखीस। एकालिय जव तुमु देस देस मा खोरवाय जासु, तव मुलको मुलकोनक वीच तुमरा काहीन लोगहन तलवार सी वाच जासे। 9 त्या वाचला लोगहन, उना जातियो क विच, जेनुमा त्या बाँदाय होय जासे, मेसे फोम कोरसे; आरु यो वी कि हामरो व्यभिचारी काळजो योहोवा सी कोसो छेटो गयलो छे, आरु व्यभिचारीणी सारकी हामरा डुळा मुरतीयो पोर कोसी लागली छे, जेरेसी योहोवा क मोन टुटलो छे। एने रिते सी उना भुंनला कारण, जो त्या आपसा आखा भुनला काम कोरीन कोरला छे, त्या आपसा निंगा मा भुंनला कोहायसे। 10 तव त्या जान लेसे कि हांव योहोवा छे, आरु हेनकी आखी नुकसानी कोरने क हांव जो यो कोयो छे। चो वायेत नी कोयो।"
11 पोरबु योहोवा ओसो कोवे छे: "आपसा हात मारीन आपसा पाय नाखीन कोह, इसराएल क घोराना क आखा भुंनला कामो पोर थु! थु! काहकी त्या तलवार, भुख, आरु मोरी सी नास होय जासे। 12 जो छेटो होय त्यो मोरीस सी मोरसे, आरु जो धड़े होय त्यो तलवार सी मार नाख्यो जासे: आरु जो वाचीन सोहोर मा रोहता होईन घेरो जाय, त्यो भुकलोत मोरसे। ओस करीन हांव आपसी जलजलाहट उना पोर आखे रीते सी उतारीस। 13 जव होर एक उचा बोयड़ा आरु बोयड़ा क होर एक चोटी पोर, आरु होर एक निळा झाड़ क नेचा, आरु होर एक जादा अंजीर झाड़न साहवा मा, जाँ जाँ त्या आपसी आखी मुरत क सुखदायक गंदायन्या तेल चोड़ावे छे, चाँ हेनका मोरला लोगहन आपसी वेदी क आड़ेधोड़े आपसी मुरत क विच मा पोड़ रोहसे; तव तुमु लोगहन जान लेसु की हांव योहोवा छे। 14 हांव आपसा हात हेनका विरुद्ध वोदाड़ीन उना देस क आखा घोरो भेळ जोंगोल सी लीन रिबला सोहोर लोगुन उजाड़ कोर दिस। तव त्या जान लेसे कि हांव योहोवा छे।"