1 गोत्रोन वाटा ये होये बोखेवरे काकोड़ सी लागाड़ीन होये हेतलोनोन वाटो धोड़े सी होमातोन घाटी लोगुन, आरु दोमिस्कोन काकोड़ धोड़ेन होसरेनोन बोखेवरे भेनि होमातोन धोड़े लोगुन एक वाटो दानोन होये आरु हेरे उगेवने आरु बुडेवने काकोड़ वी होये। 2 दानोन वाटा सी चोसटायतो उगेवने सी बुडेवने लोगुन आशेरोन एक वाटो होये। 3 आशेरोन वाटा सी चोसटायतो उगेवनो सी बुडेवनो लोगुन नोप्तालीन एक वाटो होये। 4 नोप्तालीन वाटा सी चोसटायतो उगेवने सी बुडेवने लोगुन मोनश्शेन एक वाटो। 5 मोनश्शेन वाटा सी लागलो उगेवने सी बुडेवने लोगुन एपरेमोन एक वाटो होये। 6 एपरेमोन वाटा सी चोसटायतो उगेवनो सी बुडेवने लोगुन रुबेनोन एक वाटो होये। 7 रुबेनोन वाटा सी चोसटायतो, उगेवने सी बुडेवने लोगुन योहुदान एक वाटो होये।

8 योहुदान काकोड़ सी चोसटायतोत उगेवने सी बुडेवने लोगुन होयो चोड़ावलो वाटो होये, जिनाक तुमुक चोड़ावनो होयसे, होयो पोच्चीस होजार वासुन चोवड़ो आरु उगेवने सी बुडेवने लोगुन कुदा एक गोत्रन वाटान तोसो नांबो होये, आरु हेरे इचमा चुखलो जागो होये।

9 जु वाटु तुमुक योहोवाक चोड़ावनो पोड़से, तेरी नांबाय पोच्चीस होजार वासुन आरु चोवड़ाय दोस होजार वासुनोन होयनो जुवे। 10 यो चोड़ावलो चुखलो वाटो पुजाराक जोड़े; होयो बोखेवरे भेनी पोच्चीस होजार वासुन नांबो, बुडेवनो भेनी दोस होजार वासुन चोवड़ो, उगेवने भेनी दोस होजार वासुन चोवड़ो आरु दोखेवरे भेनी पोच्चीस होजार वासुन नांबो होये; आरु हेरे भोरभोर इचमा योहोवान चुखलो जागो होये। 11 यो खास चुखलो जागो सादोकोन ओवलियादन हेनु पुजारान होये जे मार कायदाक पाव्या कोरे, आरु इसराएली भोटकी जानेन टेमे लेवियोन तोसा नी भोटक्या होता। 12 कोरीन देसोन चोड़ावला जागा मा सी यो हेंदरे जुगु चोड़ावलो होयो वाटो मोतलोब बेस चुखलो देस कोवाये; आरु लेवियोन काकोड़ सी चोसटायतो रोवे। 13 पुजारान काकोड़ सी चोसटायतो लेवियोन वाटो होये, होये पोच्चीस होजार वासुन नांवो आरु दोस होजार वासुन चोवड़ो होये। आखी नांवाय पोच्चीस होजार वासुनोन आरु चोवड़ाय दोस होजार वासुनोन होये। 14 होये हेरे गोथा नी ते काहिन वेचे, नी दिसरी जागाम सी बोदले; आरु नी जागान पेहली मेर आरु कुदाक आपे। काहाकि होयो योहोवा जुगु चुखलो छे।

15 चोवड़ायीन पोच्चीस होजार वासुन ओगोळ जो पांच होजार वाचसे, चो सोहोर आरु बोस्ती आरु चारने जुगु सुदु वाटु होये; आरु सोहोर हेरा इचमा होये। 16 सोहोरोन यी मापती होये, बोखेवर, दोखेवरे, उगेवने आरु बुडेवने भेनी साढ़े च्यार च्यार होजार हात। 17 सोहोरोन धोड़े, बोखेवरे, दोखेवरे, उगेवने बुडेवनेम चारन्यो होये। जो ढाय ढाय सोव वासुन चोवड़ो होये। 18 चोड़ावलो, चुखला जागान धोड़ेन नांबाय मा गोथो जो काहीन वाचे, मोतलोब उगेवने आरु बुडेवने दुयो धोड़े दोस दोस होजार वासुन जे चोड़ावला वाटान धोड़े होये, हेरी मेर सोहोरोन काम कोरनेवाळान खाने जुगु होये। 19 इसराएलोन आखा गोत्रो मा गोथा जो सोहोर मा काम कोरे, चो हेरी खेती कोर्या कोरे।

20 आखो चोड़ावलो वाटो पोच्चीस होजार वासुन नांबो आरु पोच्चीस होजार वासुन चोवड़ो होये; तुमुक च्यारु खुट्यो चुखलो वाटो चोड़ावनो पोड़से जेरेम सोहोरोन खास वाटो होये।

21 जो वाटो रोय जाय, चो डाहलाक जोड़े। चुखला चोड़ावला वाटाक, आरु सोहोरोन खास जागाक दुयो मेर मोतलोब हेंदरे उगेवने आरु बुडेवनेन भेनी पोच्चीस पोच्चीस होजार वासुनोन चोवड़ायीन धोड़े, जो आरु गोत्रोन वाटा धोड़े रोवे, चो डाहलाक जोड़े। चोड़ावलो चुखला जागा आरु भोवोनन चुखला जागान इचमा होये। 22 जु डाहलान वाटु होयसे, चो लेवियोन इचमा आरु सोहोरन खास वाटो होयसे। डाहलान वाटो योहुदान आरु बिन्यामीनोन जागान इचमा होये।

23 दिसरा गोत्रोन वाटा इने भातीन होये उगवने सी बुडेवने लोगुन बिन्यामीनोन एक वाटो होये। 24 बिन्यामीनोन काकोड़ सी चोसटायतोत उगेवने सी बुडेवने लोगुन सिमोनोन एक वाटो। 25 सिमोनोन काकोड़ सी लागाड़ीन उगेवने सी बुडेवने लोगुन इस्साकारोन एक वाटो। 26 इस्साकारोन काकोड़ सी चोसटायतोत उगेवने सी बुडेवने लोगुन जोबुलुनोन एक वाटो। 27 जोबुलुनोन काकोड़ सी चोसटायतोत उगेवने सी बुडेवने लोगुन गादोन एक वाटो।

28 आरु गादोन काकोड़न धोड़े दोखेवरे सी भेनीन काकोड़ तामार सी लीन कादेसोन मोरीबोत नावोन झीरी लोगुन आरु मिसर देसोन खुदरा आरु मोटला दोरिया लोगुन पुगे।

29 जो देस तुमुक इसराएलोन गोत्रोक वाटनो होयसे चो योत छे, आरु हेंदरा वाटान वी येत छे, परमेश्वर योहोवान यो बुल छे।

30 सोहोरम निकळने जुगु यी वाट होयेसे। बोखेवरे काकोड़ पोर एक वाट होयसे। तेरी नांबाय सोवा दुय किलोमीटर होयसे। 31 हेरेम तीन झोपला होयसे, एक रुबेनोन झोपलो, एक योहुदान झोपलो, आरु एक लेवीन झोपलो; काहाकी सोहोरोन झोपला इसराएलोन गोत्रोन नाव पोर पाड़से। 32 उगेनली काकोड़े पोर एक वाट होयसे। तेरी नांबाय सोवा दुय किलोमीटर होयसे। हेरेम तीन झोपला होयसे: युसुफोन झोपलो, बिन्यामीनोन झोपलो। आरु दानोन झोपलो। 33 दोखेवरे काकोड़ पोर एक वाट होयसे। ची सोवा दुय किलोमीटर नांबी होयसे। हेरेम तीन झोपला होयसे: सिमोनोन झोपलो, इस्साकारोन झोपलो, आरु जोबुलुनोन झोपलो। 34 बुडेवने काकोड़ पोर एक वाट होयसे। ची सोवा दुय किलोमीटर नांबी होयसे। हेरेम तीन झोपला होयसे: गादोन झोपलो, आशेरोन झोपलो, नोप्तालीन झोपलो। 35 सोहोरोन‍ च्यारु मेरोन घेरु नोव किलोमिटोरोन होयसे, तेने दाहड़े सी ओगोळ वाळा सोहोरोन नाव योहोवा शाम्मा पोरबु यांत छे! रोवसे।