1 Disen tweeden Breef, Jeleewde, schriew ekj nu no junt, en woonem ekj jun reinet Vestaunt oppwakj derch daut Erinren, 2 daut jie muchten denkjen aun de Wieed, waut verhäa jerät sent derch de heilje Profeeten un daut Jeboot von ons, de Apostel von däm Harn un Heilant.

3 Dit weet aum ieeschten, daut en de latste Doag woaren Spetta komen, dee äare ieejne Losten nogonen 4 un sajen: Wua es daut Vespräakjen von sien Komen? Wiels von donn aus de Vodasch enjeschlopen sent, bliewen aule Dinja, soo aus von däm Aunfank von de Schepfunk. 5 Wiels mootwellens es äant dit onbekaunt, daut von lang häa de Himmels wieren, un de Ieed entsteit von ut Wota un en Wota derch Gott sien Wuat, 6 wuaderch de Welt, dee donn wia, met Wota äwaschäld un omkjeem. 7 De Himmels un de Ieed oba, dee nu sent, sent derch sien Wuat vewoat, toom Fia behoolen bat aum Jerechts-Dach un de Vedaumnis fa de gottloose Menschen. 8 Dit eene oba lot junt nich onbekaunt sennen, Jeleewde, daut een Dach bie däm Harn es aus dusent Joa un dusent Joa aus een Dach. 9 De Har vetrakjt nich daut Vespräakjen, soo aus eenje daut fa een Vetrakjen achten, oba es lankmootich met ons un well nich, daut irjentwäa veloaren-jeit, oba daut aula to de Busse komen. 10 Oba däm Harn sien Dach kjemt soo aus een Deef enne Nacht, wuarenn de Himmels vegonen woaren met een grootet Krachen, un de Elementen woaren von Hett schmelten, un de Ieed un de Woakjen doabowen woaren vebrennen.

11 Soo nu aul dise Dinja veschmelten sellen, waut fa Menschen sull jie dan sennen em heiljen Waundel un Jettlichkjeit, 12 endäm jie erwoarten un spooden daut Komen von Gott sien Dach, en woonem de Himmels von Fia vegonen woaren un de Elementen woaren von Hett veschmelten? 13 Wie oba, no sien Vespräakjen, erwoarten niee Himmels un eene niee Ieed, en woone Jerajchtichkjeit wont.

14 Doawäajens, Jeleewde, wiels jie dise Dinja erwoarten, beflieticht junt, von Am jefungen to woaren en däm Fräd, onen Plaken un onstrof-falich. 15 Un acht*3:15 Ooda: talt. de Lankmoot von ons Har fa de Radunk, soo aus uk ons leewa Brooda Paulus, no de Weisheit, dee am jejäft es, junt jeschräwen haft, 16 soo aus uk en aul siene Breew, en woone hee äwa dise Dinja rät, wuarenn atelje Dinja schwoa to vestonen sent, woone de Onjelieede un Leichtfoadje*3:16 Ooda: onbestendje. vedreien, soo aus uk de äwaje Schreften, to äare ieejne Vedaumnis. 17 Jie nu, Jeleewde, wiels jie dit verhäa weeten, heet junt, daut jie nich wajchjeschlapt woaren met de Ruchloose äa Errtum un von jun ieejnet Fauststonen faulen. 18 Oba waust en de Jnod un Erkjantnis von ons Har un Heilant Jesus Christus. To Am aule *3:18 Ooda: Harlichkjeit.Iea, beides, nu un uk aun däm eewjen Dach. Amen.