Efésios 5

Fa Mana un Frues

22 Frues, siet june ieejne Mana unjadon, soo aus däm Harn. 23 Wiels de Maun es daut Haupt von de Fru, jrod soo aus Christus daut Haupt es von de Jemeent, un Hee es de Rada von däm Kjarpa. 24 Oba jrod soo aus de Jemeent Christus unjadon es, soo uk de Frues äare ieejne Mana en aules.

25 Jie Mana, leeft june ieejne Frues, soo aus uk Christus de Jemeent jeleeft un sikj selfst fa ar hanjejäft haft, 26 om daut Hee ar kunn heiljen un reinjen derch daut Wauschen von Wota derch daut Wuat, 27 soo daut Hee ar fa sikj selfst mucht doastalen, eene veharlichte Jemeent, dee nich eene Plak ooda Veknutschtet ooda irjent soowaut haft, oba daut see mucht heilich sennen un onen Fäla. 28 Jrod soo sellen uk de Mana äare ieejne Frues leewen, soo aus äare ieejne Kjarpasch; wäa siene ieejne Fru leeft, dee leeft sikj selfst. 29 Wiels kjeena haft jeemols sien ieejnet Fleesch jehaust, oba hee näat un fläajcht daut, jrodsoo aus uk Christus de Jemeent. 30 Wiels wie sent Jlieda von sien Kjarpa, von sien Fleesch un von siene Knoakes. 31 "Doawäajen woat een Mensch sienen Voda un Mutta veloten un siene Fru aunhenjen, un dee twee woaren een Fleesch sennen." 32 Dit Jeheemnis es groot; oba ekj saj dit von Christus un siene Jemeent. 33 Doch uk jie, lot eenem jiedren siene ieejne Fru soo leewen aus sikj selfst; oba de Fru, daut see däm Maun Ieaforcht jeft.