1 Miene Breeda, habt dän Gloowen von ons Har Jesus Christus, däm Harn von de Harlichkjeit, nich met Aunseenen von de Persoon. 2 Wiels wan en june Vesaumlunk een Maun kjemt met eenem goldnen Rinkj un met prachtvolle Kjleeda, un doa kjemt uk een Oama nenn en een onreinet Kjleet 3 un jie kjikjen no däm, met daut prachtvolle Kjleet un sajen to am: Sett du hia em Ierlichen, un to däm Oamen saj jie: Sto du dort, ooda sat die hia unjen bie miene Footbenkj! 4 Hab jie doa nich eenen Unjascheet mank junt selfst jemoakt un sent Rechta jeworden met beese Jedanken? 5 Horcht, miene jeleewde Breeda: Haft Gott nich de Oame von dise Welt jewält, rikj em Gloowen to sennen un Oawen von daut Rikj, woont Hee dee vesproaken haft, dee Am leewen? Luk 12:21; 1Kor 1:26; 11:22 6 Jie oba haben dän Oamen ve-acht. Sent daut nich de Rikje, dee junt unjadrekjen un junt ver daut Jerecht schlapen? 7 Sent daut nich see, dee dän gooden Nomen lastren, dee äwa junt utjeroopt es? 1Pe 4:7 8 Wan jie daut kjennichliche Jesaz erfellen no de Schreft: "Du saust dienen Näakjsten leewen soo aus die selfst", dan doo jie goot. 3Mo 19:18 9 Wan jie oba de Persoon aunseenen, doo jie Sind un woaren vom Jesaz äwafieet aus Äwaträda. 5Mo 1:17 10 Wiels wäa daut gaunze Jesaz helt, oba en eent stolpat, dee es en aules schuldich jeworden. Mat 5:19 11 Wiels dee, dee doa säd: "Du saust nich ehebräakjen," haft uk jesajcht: "Du saust nich dootmoaken." Wan du nu nich de Ehe brakjst, oba dootmoakst, dan best du aul een Jesaz-Äwaträda. 2Mo 20:13-14

12 Rät soo un doot soo aus soone, dee derch daut Jesaz von de Frieheit jerecht woaren sellen. 13 Wiels een onboarmherzjet Jerecht woat sennen jäajen dänjanjen, dee nich Boarmherzichkjeit je-eeft haft; de Boarmherzichkjeit oba riemt sikj jäajen daut Jerecht. Mat 5:7,18,30,34; 25:45-46

14 Waut halpt daut, miene Breeda, wan irjentwäa sajcht, hee haft Gloowen, oba haft kjeene Woakjen? Kaun de Gloowen am raden? Ree 3:21-31; Mat 7:21 15 Wan een Brooda ooda eene Sesta noaktich es un de däachliche Noarunk bederftich es, 16 un irjent eena von junt säd to äant: Got en Fräd, woamt junt un ät junt saut, oba jie jeewen äant nich daut Needje fa dän Kjarpa, waut halpt daut? 1Joh 3:16 17 Jrodsoo es uk de Gloowen, wan dee nich Woakjen haft, aun sikj selfst doot.

18 Doa mucht oba irjentwäa sajen: Du hast Gloowen, un ekj hab Woakjen; wies mie dienen Gloowen onen Woakjen, un ekj woa die mienen Gloowen ut miene Woakjen wiesen. 19 Du jleefst, daut doa een eensja Gott es? Du deist goot doaraun; uk de Diewels jleewen daut un zetren. Gal 5:6 20 West du oba erkjanen, du ladja Mensch, daut de Gloowen onen Woakjen doot es? 21 Wort ons Voda Abraham nich derch de Woakjen jerajchtfoadicht, aus hee sienen Sän Isaak opp däm Aultoa opfad? 1Mo 22:1-19; Ree 4:2-3; Heb 11:17 22 Doa sitst du, daut de Gloowen met-jewirkjt haft met siene Woakjen un daut de Gloowen derch de Woakjen vollkomen wort. 23 Un de Schreft wort erfelt, dee doa sajcht: "Abraham jleewd Gott, un daut wort am to Jerajchtichkjeit jeräakjent," un hee wort Gott sien Frint jenant. 1Mo 15:6; Jes 41:8 24 Doa see jie aulsoo, daut een Mensch derch Woakjen jerajchtfoadicht woat un nich derch dän Gloowen auleen. 25 Es nich jrodsoo uk de Hua Rahab derch Woakjen jerajchtfoadicht worden, aus see de Bootschofta oppneem un leet dee opp eenen aundren Wajch rut? Jos 2:1-24; Heb 11:31 26 Wiels jrodsoo aus de Kjarpa onen dän Jeist doot es, soo es uk de Gloowen onen Woakjen doot.