1 Jakobus, een Kjnajcht von Gott un däm Harn Jesus Christus, aun de twalw Stam, dee en de Vestreiunk sent, een Gruss!

2 Miene Breeda, acht daut fa reine Freid, wan jie en aulahaunt Vesieekjungen faulen, Ree 5:3-5; 1Pe 4:13 3 un weet, daut de Proow von junem Gloowen Jedult wirkjt. 4 Oba de Jedult saul een vollkomnet Woakj haben, daut jie vollkomen un gaunz sent un junt daut aun nuscht fält.

5 Wan oba irjentwäm von junt Weisheit fält, dän lot von Gott froagen, dee aulem wellich jeft un nuscht väaschmitt, dan woat am dee jejäft woaren. Jak 3:15; Spr 2:3-6 6 Lot am oba em Gloowen froagen un nich twiewlen; wiels wäa doa twiewelt, es soo aus eene Mäawal, dee vom Wint jedräwen un bewäajcht woat. Mrk 11:24; 1Tim 2:8 7 Wiels soon Mensch doaf nich denkjen, daut hee waut von däm Harn kjrieen woat. 8 Een wankelmootja Maun es onbestendich en aul siene Wäaj.

9 De läajch-stonenda Brooda, lot sikj en siene Erhowenheit riemen Jak 2:5 10 un de Rikja en siene Läajchheit, wiels soo aus eene Graus-Bloom woat hee vegonen. 1Tim 6:17; 1Pe 1:24 11 Wiels wan de Sonn met äare brennende Hett oppjegonen es, dan vedrieecht daut Graus, un siene Bloom felt auf, un siene scheene Aunsecht vedoaft; soo woat uk de Rikja en siene Wäaj vewalkjen. Jes 40:6-8

12 Seelich es de Maun, dee de Vesieekjunk jeduldich drajcht; wiels nodäm hee jeprooft es, woat hee de Läwens-Kroon kjrieen, dee de Har deejanje vesproaken haft, dee Am leewen. 2Tim 4:8 13 Kjeena, dee doa vesocht woat, saul sajen: Ekj woa von Gott vesocht; wiels Gott kaun nich vesocht woaren to Beeset, un Hee selfst vesieekjt kjeenen. 14 Oba een jiedra woat vesocht, wan hee von siene ieejne Lost jereizt un jelokt woat. 1Mo 3:6; Ree 7:7-8 15 Nodäm de Lost aunjesat haft, jebuat see de Sind; de Sind oba, wan dee vollbrocht es, brinjt dän Doot. Ree 7:10

16 Errt nich, miene leewe Breeda. 17 Jieda goode Gow un jieda vollkomnet Jeschenkj kjemt von bowen rauf, von däm Voda von de Lichta, bie wäm kjeene Veendrunk es, uk nich een Schauten-Wakjsel. Mat 7:11; 1Joh 1:5 18 Hee haft ons jebuaren no sienem Wellen derch daut Wuat von de Woarheit, daut wie sullen eene jewesse ieeschte Frucht von siene Schepfunk sennen. Joh 1:13; 1Pe 1:23

19 Doahäa, miene leewe Breeda, een jiedra Mensch saul schwind sennen toom Horchen, langsom toom Räden, langsom toom Oaja. 20 Wiels däm Mensch sien Oaja wirkjt nich Gott siene Jerajchtichkjeit. Spr 29:20; Efs 4:26 21 Doawäajen, lajcht auf aul daut Onreine un aul dän Äwafluss von Boosheit, un nämt daut enjeplaunte Wuat met Saunftmoot opp, daut june Seelen raden kaun. 1Pe 2:1 22 Oba siet soone, dee daut Wuat doonen un nich bloos Hiera, wuamet jie junt selfst aunschmäaren. Mat 7:21; Ree 2:13 23 Wiels wäa een Hiera vom Wuat es un nich een Doona, dee es eenem Maun jlikj, dee sien naturalet Jesecht em Spieejel bekjikjt; 24 wiels hee haft sikj selfst betracht un es doa wajchjegonen un haft fuaz vejäten, woo hee jestault wia. 25 Wäa oba en daut vollkomne Jesaz von de Frieheit nenkjikjt un doabennen blift un hee nich een vejätsoma Hiera es, oba eena, dee daut Woakj deit, disa woat jlekjlich sennen en sien Doonen. Joh 13:17; Ree 8:2; Jak 2:12

26 Wan wäa mank junt schient fromm to sennen un siene Tung oba nich em Toom helt, oba sien Hoat aunschmäat, däm sien Gottesdeenst es nutzloos. 1Pe 3:10 27 Een reina un onbesudelda Gottesdeenst ver Gott un däm Voda es dit: De Weisen un Wätfrues en äare Bedrenjnis besieekjen un sikj selfst von de Welt plakenloos hoolen.