1 Miene Breeda, siet nich väle Lierasch, wiels jie weeten, daut wie een jratret Uadeel kjrieen woaren. 2 Wiels wie stolpren aula en väle Dinja. Wan irjentwäa nich em Wuat stolpat, dan es hee een vollkomna Maun, fäich, uk dän gaunzen Kjarpa em Toom to hoolen. 3 Kjikj, de Pieed laj wie de Jebetts enne Frät, daut dee ons jehorchen, un lenkjen äaren gaunzen Kjarpa. 4 Kjikj, uk de Schäp, soo groot aus dee sent un vom stoakjen Wint jedräwen woaren, woaren derch eene kjliene Roodel han jelenkjt, wuaemma de Stia-Maun well. 5 Soo es uk de Tung een kjlienet Jliet un riemt sikj groote Dinja. Kjikj, een kjlienet Fia, waut fa eenen grooten Woolt stekjt daut aun!

6 Un de Tung es een Fia, eene Welt von Ojjerajchtichkjeit. Soo es de Tung mank onse Jlieda un veschwient dän gaunzen Kjarpa un stekjt dän Natua Gank aun un es von de Hal aunjestekjt. Spr 16:27; Mat 12:36-37; 15:11,18 7 Wiels jieda Oat von Tieren un Väajel un Kruptieren un Mäatieren, woaren jetomt un sent jetomt worden von de menschliche Natua*; 8 Oba de Tung kaun kjeen Mensch tomen, een beeset, onbandjet Dinkj, voll dootbrinjendet Jeft. 9 Met dee low wie Gott, dän Voda, un met dee fluch wie de Menschen, dee no Gott sien Bilt jemoakjt sent. Ps 141:3; 1Mo 1:26-27 10 Ut een Mul jeit Säajen un Fluchen. Miene Breeda, soo sull daut nich sennen. Efs 4:29 11 Kjwalt ut eene Kjwal von dautselwje Loch Seetet un Betret? 12 Miene Breeda, kaun een Fiejenboom Oliewen ooda eene Wienrank Fiejen droagen? Soo kaun uk kjeene Kjwal seetet un soltjet Wota jäwen.

13 Wäa es weis un kluak mank junt? Dän lot siene Woakjen derch eenen gooden Waundel wiesen en Saunftmoot un Weisheit. 14 Hab jie oba betre Aufgonst un Zank en june Hoaten, dan riemt junt nich un lieecht nich jäajen de Woarheit. 15 Dit es nich de Weisheit, waut von bowen raufkjemt, oba es irdisch, fleeschlich un diewlisch. Jak 1:5 16 Wiels wua Aufgonst un Zank es, doa es een Derchenaunda un jieda beeset Woakj. 17 De Weisheit oba von bowen es ieeschtens rein, dan frädlich, jelind, lat sikj sajen, voll Boarmherzichkjeit un goode Frucht, onparteiisch un onjeheichelt. 18 Un de Frucht von de Jerajchtichkjeit woat en Fräd jeseit von deejanje, dee Fräd moaken.