1 Wuahäa komen Kjriej un Zenkjarieen mank junt? Komen dee nich von de Losten, dee en june Jlieda strieden? 2 Jie sent bejierich un haben nuscht; jie morden un iewren un kjennen nuscht kjrieen; jie feiten un kjriejen, oba jie haben nuscht, wäajens jie nich froagen. Gal 5:15 3 Jie froagen un kjrieen nich, wiels jie froagen schlajcht, om daut fa june Losten to vebrucken.

4 Jie Ehebräakja un Ehebräakjarinnen, weet jie nich, daut de Frintschoft met de Welt, Fientschoft jäajen Gott es? Wäaemma aulsoo well de Welt äa Frint sennen, stalt sikj aus Gott sien Fient. Luk 6:16; Ree 6:7; 1Joh 2:15 5 Ooda meen jie, daut de Schreft emsonst sajcht: De Jeist, dee en ons wont, velangt met Aufgonst? 6 Oba Hee jeft ons jratre Jnod. Doawäajen sajcht Hee: "Gott wadasteit de Stolte un jeft de Deemootje Jnod." Spr 3:34; Hiob 22:29; Mat 23:12; 1Pe 5:5

7 Aulsoo stalt junt unja Gott. Wadastot dän Diewel, dan flicht hee von junt. 1Pe 5:8-9 8 Nodat junt Gott, un Hee woat sikj junt nodren. Reinicht de Henj, jie Sinda, un moakt june Hoaten rein, jie Dobbelt-Denkjende. Jes 1:16; Sach 1:3 9 Droacht Leet un truat un hielt; jun Lachen vewaundel sikj en Truaren, un june Freid en Truarichkjeit. 10 Deemooticht junt ver däm Harn, un Hee woat junt erhäwen. 1Pe 5:6 11 Rät nich jäajenenaunda, Breeda. Wäa jäajen eenen Brooda rät un sienen Brooda uadeelt, dee rät jäajen daut Jesaz un recht daut Jesaz; wan du oba daut Jesaz rechtst, dan best du nich een Doona von daut Jesaz, oba een Rechta. 12 Doa es een Jesazjäwa, dee kaun raden un vedoawen. Wäa best du, daut du eenen aundren rechtst? Mat 7:1; Ree 14:4

13 Hia nu! Dee jie sajen: Vondoag ooda morjen reis wie en dee ooda dee Staut un bliewen doa een Joa; wie woaren kjeepen un vekjeepen un jewennen; Spr 27:1 14 dee jie nich weeten, waut morjen sennen woat. Wiels, waut es jun Läwen? Een Daump es et, dee fa eene kjliene Tiet väakjemt un dan veschwinjt. Luk 12:20 15 En dee Städ sull jie sajen: Wan de Har well un wie läwen, woa wie dit ooda daut doonen. Apj 18:21; 1Kor 4:19 16 Oba nu riem jie junt en junem Huachmoot; aul soon Riemen es bees. 17 Wiels wäa doa weet, Goodet to doonen un deit daut nich, däm es daut Sind. Luk 12:47