1 Hia nu! Jie Rikje, hielt un jult äwa jun Älent, daut äwa junt komen woat. Luk 6:24-25 2 Jun Rikjtum es vefult, un june Kjleeda sent motten-frätich jeworden. 3 Jun Golt un Selwa es verostat, un äa Rosta woat een Tieekjen jäajen junt sennen un woat jun Fleesch fräten, soo aus een Fia. Jie haben Schaza jesaumelt en de latste Doag. 4 Kjikj, de Loon von de Oabeida, dee june Stapen enje-arnt haben, dee von junt derch Scheewarieen trigj-jehoolen worden es, schricht, un daut Roopen von de Arnta es en däm Harn Zebaot siene Uaren jekomen. 5Mo 24:14-15 5 Jie haben en june Jemietlichkjeit jeläft oppe Ieed un läwden vollbrestich. Jie haben june Hoaten jemast*, soo aus aum Schlacht-Dach. Luk 16:19,25 6 Jie haben ve-uadeelt un dän Jerajchten dootjemoakt, un hee haft junt nich wadastonen. Jak 2:6

7 Doawäajen siet jeduldich, Breeda, bat däm Harn sien Komen. Kjikj, de Akamaun wacht opp de diere Frucht von de Ieed un es jeduldich doaräwa, bat hee dän tiedjen un dän lotren Räajen kjricht. 5Mo 11:14; Jer 5:24; Joel 2:23; Heb 10:36 8 Siet jie uk jeduldich un stalt june Hoaten faust, wiels däm Harn sien Komen nodat sikj. 9 Grunst nich jäajenenaunda, Breeda, daut jie nich ve-uadeelt woaren; kjikj, de Rechta steit ver de Däa. 10 Miene Breeda, nämt de Lieden un de Jedult von de Profeeten toom Väabilt, dee en däm Nomen vom Harn jerät haben. Mat 5:12 11 Kjikj, wie hoolen dee fa seelich, dee uthoolen. Von Hiob siene Jedult hab jie jehieet, un daut Enj vom Harn hab jie jeseenen; wiels de Har es voll metlieden un boarmherzich. Hiob 1:21; 42:10-16 12 Oba äwa aules, miene Breeda, schwieet nich, nich bie däm Himmel, uk nich bie de Ieed, uk nich met irjent eenem aundren Eit. Oba lot jun jo, jo un jun nä, nä sennen, soo daut jie nich unja Jerecht faulen. Mat 5:33-37

13 Deit irjentwäa mank junt lieden? Lot am bäden; es irjentwäa mootich? Lot am Psalmen sinjen. Ps 50:15; Kol 3:16 14 Es irjentwäa mank junt krank? Lot däm de Eltestasch vonne Jemeent roopen, un lot dee äwa am bäden un met Eelj saulwen en däm Nomen vom Harn. Mrk 6:13 15 Un daut Jebäd vom Gloowen woat dän Kranken heelen, un de Har woat dän opprechten, un wan hee Sinden begonen haft, woaren am dee vejäft woaren. Mrk 16:18 16 Bekjant june Sinden eena toom aundren, un bät fa eenaunda, daut jie jeheelt woaren. Daut iernstliche* Jebäd von een Jerajchta kaun* väl. Apj 12:5 17 Elia wia een Mensch met deeselwje Jefeelen waut wie, un hee bäd iernstlich, daut et nich räajnen sull, un daut räajend nich opp de Ieed, dree Joa un sas Moonat. 1Kje 17:1; Luk 4:25 18 Un hee bäd wada, un de Himmel jeef Räajen un de Ieed brocht wada äare Frucht. 1Kje 18:41-45

19 Breeda, wan jeemaunt von junt von de Woarheit aufert, un irjentwäa brinjt am trigj, Gal 6:1 20 dan lot däm weeten, daut, wäa dän Sinda trigjbrinjt von sienem Errwajch, dee woat eene Seel vom Doot raden un woat eene Menj Sinden toodakjen. Ps 51:15; Spr 10:12; 1Pe 4:8