Gloowen onen Woakjen es doot
14 Waut halpt daut, miene Breeda, wan irjentwäa sajcht, hee haft Gloowen, oba haft kjeene Woakjen? Kaun de Gloowen am raden? 15 Wan een Brooda ooda eene Sesta noaktich es un de däachliche Noarunk bederftich es, 16 un irjent eena von junt säd to äant: Got en Fräd, woamt junt un ät junt saut, oba jie jeewen äant nich daut Needje fa dän Kjarpa, waut halpt daut? 17 Jrodsoo es uk de Gloowen, wan dee nich Woakjen haft, aun sikj selfst doot.
18 Doa mucht oba irjentwäa sajen: Du hast Gloowen, un ekj hab Woakjen; wies mie dienen Gloowen onen Woakjen, un ekj woa die mienen Gloowen ut miene Woakjen wiesen. 19 Du jleefst, daut doa een eensja Gott es? Du deist goot doaraun; uk de Diewels jleewen daut un zetren. 20 West du oba erkjanen, du ladja Mensch, daut de Gloowen onen Woakjen doot es? 21 Wort ons Voda Abraham nich derch de Woakjen jerajchtfoadicht, aus hee sienen Sän Isaak opp däm Aultoa opfad? 22 Doa sitst du, daut de Gloowen met-jewirkjt haft met siene Woakjen un daut de Gloowen derch de Woakjen vollkomen wort. 23 Un de Schreft wort erfelt, dee doa sajcht: "Abraham jleewd Gott, un daut wort am to Jerajchtichkjeit jeräakjent," un hee wort Gott sien Frint jenant. 24 Doa see jie aulsoo, daut een Mensch derch Woakjen jerajchtfoadicht woat un nich derch dän Gloowen auleen. 25 Es nich jrodsoo uk de Hua Rahab derch Woakjen jerajchtfoadicht worden, aus see de Bootschofta oppneem un leet dee opp eenen aundren Wajch rut? 26 Wiels jrodsoo aus de Kjarpa onen dän Jeist doot es, soo es uk de Gloowen onen Woakjen doot.