1 Ɛmɛnɛ mi, mi gyi tee la lu lolo kiya ingyi ki du umba ete nzu umba bɔkɔ o mbwalu Omosisi awu. Umba kpɛkpɛ mba o fya igbomo iyi Ukpo mu kwɔmu, kpɛkpɛ mba o sa Risu Refyobyo ma moloto. 2 Umba kpɛkpɛ mba o wo mbo obatisima mu kwɔmu mbala risu tee umba o mbwalu Omosisi. 3 Umba kpɛkpɛ mba o ri kiya ingyirimo ingyi kwundu ngyɛlɛ, 4 akwɛyi o wo embyi umba kwundu mbɔlɛ. Moo o wo embyi umba bɔkɔ ɔ wɔ mu ɔzɔ uwu kwundu uwu bɔkɔ a zɛ mbala mba awu; ɔzɔ ɔnwu gba akwu Okrasi mafyiwu le. 5 Tetete, Ukpo a mwɔnyɛ mbala umbafo mba umba o ka riba le mo, kwuwo ngwɔlɛ ɛkpɛzhi mba o fu ngbulo ngbulo mu ɛzhi ɛngbarara lɛɛbi.

6 Apula ɛlɛ lɛɛbi i wo te kaa li zɔ nzu amasa, kaa la ki wo ekweyi iyi apula iyira mate bɔkɔ umba o wo awu mo, 7 nana la lu kwu wa byi eshi mate umbafo mbo o wo awu mo. Kyamate bɔkɔ o ka mu kwokpo ungwu Ukpo awu tee, <<Enzu o ŋɔma te oo wo odumudumu akwɛyi o le mu eshi ibyima mbala iyama.>> 8 La ki to kaya mo, kyamate bɔkɔ umbafo mba o wo - akwɛyi enzu edubu uwekpepo la edubu ɛla o kpomo ɔniyi. 9 La ki pwa Ɔkwu ma mo kyamate bɔkɔ umbafo mba o wo - akwɛyi akwu i ngbɛ mba ma lɛɛbi. 10 La ki zɔ anu mo, kyamate bɔkɔ umbafo mbo o wo - akwɛyi Ɔlɔgbulɔ uwu Ukpo uwu lukwu a ngbɛ mba ma tayi.

11 Apula ɛlɛ lɛɛbi yi iyi i du mbo ele, i wo te kaa la ki vɔngɔ munyi mbo akwɛyi ba o ka yi ma te kaa la ki zɛ gboo mbaa ɛlɛ te iwomo. Moo kinzu ki yi mu kwuyengwu ibomo iyi kwudu kwɔlɛ-ɛ.

12 Kwuwo kwɔlɛ, gba ŋɔ ma tee ŋɔ rima gbagiri, ba ngbɛndu kaa ki tama mo. 13 Ipwama iyi bɔkɔ i du yi akwiyi bɔkɔ i koko i du enzu le. Ukpo akwu uwu o kwidu o fulo mawu, a nyama tee ipwama iyi i ka yi ekpasu ma li du yi mo. Kwuye ungwu o pwayima, ee shi yi ekpasu iyi idu iyimo, akwɛyi aa ka yi laa ɔgwuzɛ uwu iwɔma.

14 Kwuwo kwɔlɛ, ɛmɛza mi, la lu zɛ gboo mbaa eshi ibyima. 15 Mi so yi iso ɛlɛ kwuwongu bɔkɔ lu kwu enzu umba amasa le; lunyi la lu manda iso mi ɛlɛ ma mafyiyi. 16 Ago ungwu bɔkɔ ki gbɛlɛ Ukpo ɛnyi akwɛyi ki wo embyi ma ngu kwuyengwu kiya irimo ingyi onoyo ingyi Ɔkwu awu, i zɔ te ki kwu wakpɛnyi mbala Okrasi kwuwongu ɛnzhi wu wu. Kwoburedi ungwu bɔkɔ ki ka akwɛyi ki ri awu, i zɔ te ki kwu wakpɛnyi mbala Okrasi kwuwongu ɛnwu wu. 17 Kwuwongwu kwoburedi akwu kwukpɛnyi byi, kinzu ba ki yi riba te le, kpɛkpɛ nzu ki kwu ɛnwu ikpɛnyi, moo kinzu kpɛkpɛ nzu ki ri kwoburedi kwɔlɛ kyaa.

18 La lu yese enzu umba Izirɛ; enzu umba bɔkɔ o ri kiya ingyi bɔkɔ o wo isabɔ mangyi awu, akwu wakpɛnyi mu isabɔ iyi o wo laa Ukpo awu mo? 19 Kiya ingyi mi yi mu isomo gba akwu tee, eshi nana kiya ingyirimo ingyi bɔkɔ o wo isabɔ la eshi mangyi akwu kiya kinyinyi le? 20 Ayimo! Iyi bɔkɔ mi yi mu isomo gba i yi tee, apula iyi bɔkɔ wabyeshi o wo isabɔ ma yi awu, o wo laa ɛndu iyira moo akwu Ukpo mo. Imi ba mi gyi tee la lu kyomesu mbala ɛndu iyira mo. 21 I shoshi tee la lu wo embyi mu ago iyi Ɔkwu akwɛyi lu gba lu wo mu ago iyi ɛndu iyira mo; i shoshi tee la lu ri kiya ingyirimo mbala Ɔkwu akwɛyi lu gba ri mbala ɛndu iyira mo. 22 Nana ki gyi tee la ki shi Ɔkwu le wo rise ŋa? Kinzu ki kawu ekpasu ma re?

23 O zɔ tee, <<O nya nzu ma te la ki wo kiya ingyinangyina byi.>> Tegba i yi le, tetete akwu kiya ingyinangyina gba ki shoshi le mo. <<O nya nzu ma te la ki wo kiya ingyinangyina byi,>> tetete akwu kiya ingyinangyina gba kii mbwama laa onzu le mo. 24 La lu gagyi iyeshi lɛyi kɛɛkyi mo, lunyi ba la lu gagyi iyeshi laa enzu umbafo tete.

25 La lu ya ivye iyi kwoya mu rishi kaa la lu kwu byi, la lu yo eyo mbaa bɔkɔ i ngyi mo, kwuwongu egbo yi i bi tutumo kwuwongu mbaa bɔkɔ ki ngyi mo. 26 Moo, mate bɔkɔ kwokpo ungwu Ukpo kwu zɔ, <<Ɛzhi mbala kiya ingyinangyina bɔkɔ ki yi ma yi lɛɛbi akwu ingyi Ɔkwu.>>

27 Gba onzu uwu akwu u mbwalu mo a lɔ la yi mbaa kiya ingyirimo akwɛyi lu ka, la lu ri kiya ingyinangyina ingyi bɔkɔ o ka yi byi, la lu yo eyo mo kwuwongu egbo i bi tutumo kwuwongu mbaa bɔkɔ ki ngyi mo. 28 Akwiyi gba onzu uwufo a za yi te, <<Kiya ingyirimo ngyɛlɛ o wo ngyi isabɔ laa eshi,>> de ba la lu ri ngyi mo, kwuwongu onzu uwu bɔkɔ e so yi iso awu, i kyo kaa egbo yi li yi ingbomo mo, 29 iyi bɔkɔ mi yi mu isomo gba i yi tee, akwu kwuwongu egbo iyi onzu awu, moo akwu iyayi mo.

Moo onzu uwufo e yo kwuyo tee, <<I wo te ba kapa unga mi yi nga unga kiya iwomo le ba onzu uwufo e se mi ngo mo kwuwongu egbo wu? 30 Akwiyi gba mi gbɛlɛ Ukpo ɛnyi kwuwongu kiya ingyi mi ri, i wo te ba onzu uwufo e gwu mi anu kwuwongu kiya ingyirimo ingyi bɔkɔ mi gbɛlɛ Ukpo ɛnyi kwuwo ngyi?

31 Kwuwo kwɔlɛ, kiya ingyinangyina ingyi bɔkɔ ŋɔɔ wo, shi akwu kiya irimo naa embyi iwomo, wo yi lɛɛbi kaa Ukpo la fya iduma ma. 32 La lu shi enzu lo ngbomo mo, laa Azhu loo laa enzu umba bɔkɔ akwu Azhu mo loo laa wa mbwalu Ukpo. 33 La lu wo mate bɔkɔ wo tayi; Imi mi gyakpɔɔ te kaa la mi wo iyi bɔkɔ uwewe a gyi, mi byegbo iyeshi lɛmi kɛɛkyi mo, Imi ba mi gyi iyeshi la enzu lɛɛbi, kaa lo fya isama ma.