1 La lu gyakpɔɔ la lu gagyi idɛnyi. La lu shi egbo yi mbaa rɛshi ingyi kwundu igagyima, ingyi anu itama iyi iso iyi Ukpo. 2 Enzu umba bɔkɔ o so lunzu undepo awu, o so laa enzu mo, o so laa Ukpo, moo onzu uwu a zɔngɔma iyi o yi mu isomo ma e yi mo. O yi mu iso iyi kwunvyeru isomo mu ɛkpasu iyi Kwundu. 3 Enzu umba bɔkɔ o tanu iyi iso iyi Ukpo ba o so laa enzu kaa li mbwa mba ma, li ka mba ɛnwu ma kaa li gbo mbo idu mo. 4 Enzu umba bɔkɔ o so lunzu undepo, o mbwama laa ɛmba ma kɛɛkyi, enzu umba bɔkɔ o tanu iyi iso iyi Ukpo ba o mbwama laa ɔshɔshi lɛɛbi. 5 Imi mi gyi tee lɛɛbi yi la lu siso mu lunzu undepo; tetete iyi bɔkɔ i shemi i ka akwu reshi ingyi anu itama iyi iso iyi Ukpo. Moo onzu uwu bɔkɔ a tanu iyi iso iyi Ukpo a ka onzu uwu bɔkɔ e so lunzu undepo awu ma, ba akwu te onzu uwu a luma e yi mɔmɔ loo kaa ɔshɔshi lɛɛbi la fyaa imbwama ma. 6 Ɛmɛnɛ mi, imbwama iyina ba lu fya munyi mi gba mi bo mbaa yi akwɛyi mi le mu lunzu undepo isomo ba akwu tee, mi ka yi laa iso iyi bɔkɔ Ukpo a wu a ta mi ya nduu kwudu, naa iyitu, naa iso iyi kwundu, naa ɛzɔ iyi Ukpo mo? 7 I yi kyamate apula iyi bɔkɔ o so amu ma yi bɔkɔ i yi kwunyɔ mo, kyamate ombula naa kumburu, i zɛ tee bɔkɔ onzu e yitu iyi anu ngwu, akwiyi gba o kpa ngwu kaa enzu lo pwa mo? 8 Akwiyi gba o kpa kwulɔ ungwu ewa kaa la kwu wanu mamari mo, uwe bɔkɔ e yi ɛnwu ma iyi ewa? 9 Tayi gba i yi le, i zɛ te bɔkɔ onzu a zɔngɔma iso iyi bɔkɔ ŋɔ yi mu isomo mu lunzu undu epo undu bɔkɔ o yi ndu mo? Iso ɛnyi tayi akwu iyi umbwa! 10 Lunzu lu yi ikikɔ ikikɔ mu kwudu kwɔlɛ, nganangana ba ke yi iluma nga. 11 Akwiyi gba mi pwa kenzu unga bɔkɔ enzu o yi mu isomo le ma mo, enzu mbamba akwu ugboga munyi mi, Imi ba mi kwu ugboga munyi mbo tete. 12 Tegba lunyi lu yi le tete.Tabɔkɔ lunyi lu bɔkpɔɔ te la lu yi rɛshi ingyi Kwundu uwu Ukpo awu, la lu gyakpɔɔ kaa la lu fya rɛshi ingyi Kwundu ingyi bɔkɔ ri mbwama mu ɔshɔshi imbomo awu.

13 Kwuwongwu ɔlɛ onzu uwunawuna uwu bɔkɔ e so lunzu undepo, akwu mega kaa la nda Ukpo le shi wu rɛshi ingyi iluma tete. 14 Moo gba mi lɛ Ukpo mu kenzu ungepo, kwundu mi gba kwu yi mu Ukpo ilɛma le, egbo mi ba i fya kiya kinyinyi te mo. 15 Kwuwongwu ɔlɛ, inyete mi wo te? Mi lɛ Ukpo mu kwundu mi, ba mi gba mi lɛ Ukpo mu egbo mi tete; Mi so amu mu kwundu mi, ba mi gba mi so amu mu egbo mi tete. 16 kwuyengwu ŋɔ gbɛlɛ Ukpo ɛnyi mu kwundu kɛɛkyi, i zɛ te bɔkɔ enzu umba bɔkɔ o ye ŋɔ mu ipwama ba o yi kiya ingyi bɔkɔ ŋɔ so mo akwɛyi ɔ zɔ tee, <<Li yi tayi>> laa Ukpo ilɛma uwu ɛnyi igbɛlɛma ŋa? O so mo kwuwongu o yitu iyi kiya ingyi bɔkɔ ŋɔ yi mu isomo mo. 17 Igbomo ŋɔ yi mu Ukpo ilɛma marimari bi, ɔbulɛ ŋa onzu uwufo ba i mbwa wu ma mo ndii.

18 Imi mi ngbede laa Ukpo te, mi so lunzu undepo mi ka yi ma lɛɛbi. 19 kwuyengwu ɛlu ikpalama mu ɔshɔshi ba, i she mi kaa la mi so iso ɛkpɛlɔ bi iyi bɔkɔ enzu o zɔngɔma yi ma, kaa la mi zɔ umbafo, i ka iso edubu guruguru mu lunzu undepo ma.

20 Ɛmɛnɛ mi, la lu yi kyamate ɛmɛshɛri te mu egbo ibyima yi mo, lunyi ba la lu byi egbo kyamate enzumbakɔ tayi. La lu yi kyamate ɛmɛshɛri tayi mbaa ira iwomo. 21 Mu kwokpo ungwu iso iyi Ukpo o ka yi ma tee,

<<Ɔkwu a zɔ tee, i zɛ mu enzu umba bɔkɔ o so lunzu undepo gba mi siso mbala enzu mi le.

I zɛ mu lunzu undu agboga gba mi siso le,

tetete enzu mi o pwa iso mi mo.>>

22 Kwuwongwu ɔlɛ, rɛshi ingyi isisomo mu lunzu undepo akwu kɛzɔ laa enzu umba bɔkɔ o towo Ɔzhizɔsi imbwaluma, moo akwu laa wa mbwalu Ɔzhizɔsi mo. Tatayi rɛshi ingyi anu itama iyi iso iyi Ukpo akwu kɛzɔ laa wa mbwalu Ɔzhizɔsi, moo akwu laa umba bɔkɔ o towo Ɔzhizɔsi imbwaluma mo. 23 Kwuwo kwɔlɛ, gba enzu lɛɛbi umba ɔshɔshi, o kpalɛlu akwɛyi onzonzu e le mu iso isomo mu lunzu undepo akwɛyi enzu umbafo naa enzu umba bɔkɔ akwu wa mbwalu Ɔzhizɔsi mo o fyemo o du yi, o zɔ tee lɛɛbi yi lu kporishi moo? 24 Akwiyi gba onzonzu e le mu anu itama iyi iso iyi Ukpo akwɛyi enzu umbafo naa enzu umba bɔkɔ akwu wa mbwalu Ɔzhizɔsi mo o fyemo o du yi mu iso isomo, iso ɛnyi i fye mbo mo akwɛyi o kwu ira mba ɔsu kwuwongu iso iyi bɔkɔ o pwa awu. O zɔ mba ombwu mu iso iyi bɔkɔ o pwa le, 25 egbo mbo iyi bɔkɔ i nvyemo awu o ta yi kwudu nduu, akwɛyi o kwumo mu Ukpo ɔya igbomo, o ta mɛzhi akwɛyi o zɔ tee, <<Ukpo e yi munɛ mbala yi kego!>>

26 Ɛmɛnɛ mi, kiya ingyi mi so le gba i ŋɔ le tee, kwuyengwu lu kpala ɛlu te kaa la lu lɛ Ukpo, onzu uwufo e yi kwɔmu, onzu uwufo e yi ɛzu iyi a gyi tee la zɔ, onzu uwufo e yi ɛbɛ iyi bɔkɔ a ma mbaa Ukpo, onzu uwufo ba e yi isisomo mu lunzu undepo akwɛyi onzu uwufo e yi iluma iyi iso iyi bɔkɔ o so awu. Iyinayina iyi bɔkɔ o wo, lakwu iyi bɔkɔ i mbwama laa ɔshɔshi. 27 Akwiyi gba enzu umbafo ɔ gyi tee le siso mu lunzu undepo, lo pika enzu wepo naa wala ma mo, lo so lo shelesu akwɛyi li yi onzu uwu bɔkɔ a lu iso iyi bɔkɔ o so awu ma mɔmɔ. 28 Akwiyi gba onzu uwu bɔkɔ a luma e yi mo, de akwu mega kaa onzu uwu bɔkɔ e so lunzu undepo awu, la lafya laa isomo kaa le so laa ɛnwu wu mbala Ukpo. 29 Enzu wepo naa wala umba bɔkɔ o shi mbo iso iyi Ukpo awu gba lo so le, enzu umba bɔkɔ o shi mo awu ba lo manda iso ɛnyi ma kaa lo ma. 30 Akwiyi gba onzu uwufo mu ɛlu ikpalama ɛnyi a ma ɛbɛ mbaa Ukpo, onzu uwu bɔkɔ e yi mu iso iyi Ukpo isomo awu la lafya la isomo dɛ. 31 Lɛɛbi yi lu do tee lu tanu iyi iso Ukpo kɛnyikɛnyi, kaa onzonzu la vɔngɔ akwɛyi a fya ɛnwu ɛkɔ ma. 32 Enzu umba bɔkɔ o zɛ ilɔ iyi Ukpo lo yi ɛnwu mba ma kaa lo wo gbgbɔ. 33 Moo Ukpo nzu akwu Ukpo kakara mo, kinzu ba la ki yi kyoo mbala idigbomo.

Mu ɛshɔshi iyi enzu umba Ukpo lɛɛbi, 34 eko lo kpala kenzu mbo mo kwuyengwu ɛlu ikpalama. O shi mbo kapa kaa lo siso mo; kyamate bɔkɔ Ɛrama iyi Azhu i zɔ, umba akwu watekeyi mo. 35 Akwiyi gba o gyi tee lo vu undu uwu kiya ba, lo yo anu mba eyo mogba. Akwu kiya ingyi lovya kaa okokpayi le siso mu ɛlu ikpalama iyi ɔshɔshi.

36 Iso iyi Ukpo i ngyi mba yi re? Naa lunyi kɛɛkyi gba i bo mbaa yi le ŋa? 37 Akwiyi gba onzu uwufo yi a ma te akwu ɔlɔgbulɔ uwu Ukpo naa e yi rɛshi ingyi kwundu, de le yitu tee kwupwu ungwu mi ka yi ele akwu okpa uwu Ɔkwu. 38 Akwiyi gba e towo iso ɛlɛ ma, lunyi ba la lu pwawu ɛkwu mo. 39 Kwuwongwu ɔlɛ, ɛmɛnɛ mi, la lu to egbo yi la lu ta mu anu itama iyi iso iyi Ukpo, tetete la lu se onzu ukpukpɛnyi ɔgwuzɛ uwu lunzu undepo i so mo mo. 40 Kiya ingyinangyina ba akwu mega kaa lo wo ngyi ɔnyɛnyɛ mbala gbgbɔ.