1 Akwiyi gba mi so lunzu undu enzu mbala lunzu undu alɔgbulɔ umba Ukpo kego, ba mi yi idɛnyi mo, mi yi kyamate kwoso ungwu kwu wanu ngɔngɔngɔ naa kalɔ unga ka wanu ngingingi tayi. 2 Akwiyi gba mi yi rɛshi ingyi anu itama iyi iso iyi Ukpo; mi yi iyitu lɛɛbi akwɛyi mi zɔngɔma kiya ingyi invyemo mo, gba mi yi ikwu idu lu fulo iyi bɔkɔ i turu lɔwa ma, ba mi yi idɛnyi mo, mi kwu kiya kinyinyi te mo. 3 Akwiyi gba mi kwu apula iyi bɔkɔ mi yi lɛɛbi mi wo yi rɛshi, i kyo ɛnwu mi kaa lo pwu yi mo mɔyi, ba mi yi idɛnyi mo, mi fya kiya kinyinyi te mo.

4 Idɛnyi i yidu, i yi kyoo; i wo anya iyi onzu mo, i kwɛnwu mo, i fulo ɛyi mu kadu mo; 5 idɛnyi i shi reshiyama mo, i gyi ɛyi kɛɛkyi mo, ba i wo amba efyefya mo; idɛnyi i ra laa amba mu egbo mo; 6 Idɛnyi i mwɔnyɛ mu ira iwomo mo, inyi ba i mwɔnyɛ mu ongbulolo iwomo. 7 Idɛnyi i fu ewo mo; ikwidu fulo yi, mbala eyifulomo yi, mbala idu iyimo yi ba ii fɔma mo. 8 Idɛnyi i yi iyɔkpɔɔ. Anu itama iyi iso iyi Ukpo ii bomo, iso isomo mu lunzu undepo i bomo; iyitu tete i bomo. 9 Moo rɛshi ingyi iyitu nzu mbala anu itama iyi iso iyi Ukpo nzu akwu kwurizhi bɛnɛ; 10 kwuyengwu bɔkɔ kiya ingyi ki nyɔlɔma ki bo, ingyi bɔkɔ ki nyɔlɔma mo ba ki tomo.

11 kwuyengwu bɔkɔ mi kwu umɛshɛri awu mi siso kyamate umɛshɛri te, mi bi egbo kyamate umɛshɛri te, mi ka amasa kyamate umɛshɛri te; kekelele bɔkɔ mi kwu onzu uwakɔ ŋa le, mi shi iwomo iyi imɛshɛri mɛzhi-e . 12 Kiya ingyi ki ye ngye mu imama kekelele le ki yi kyamate kwundu mu umɛbɛ te; mu kwɔfyi kwɔngu ki ma eyi mbala eyi gedegede. Kiya ingyi mi yitu ngyi kekelele le akwu kwurizhi bi; mu kwɔfyi kwɔngu gba ki yitu ngyi mamari le kyamate bɔkɔ Ukpo e yitu mi tayi awu.

13 Apula ekpela iyi bɔkɔ i shoshi tee la ki yi yi akwu: ikwu idu fulo mbala eyi ifulomo mbala idɛnyi; iyi bɔkɔ i ka mekeka iyi apula ekpela ɛlɛ lɛɛbi gba akwu idɛnyi le.