1 Ɛmɛnɛ mi, kwuyengwu bɔkɔ mi ka munyi yi mi ki ta yi anu iyi kwunvyeru ungwu Ukpo awu, mi zɔ ɛmi te mi so iso mi ka yi ma mo, naa mi zɔ yi te mi ka yi ilukwu ma mo. 2 Moo mi ka mu egbo mi-e tee, iso iyi Ɔzhizɔsi Okrasi mbala lukwu wu mu kwuwɛyi ungwu lukwu kɛɛkyi gba mi tanu yi le, mo mi kyo iso ewa mo. 3 kwuyengwu mi bo mbaa yi awu, ɛnwu mi i muma gyɔɔ laa ipulamakwuwongu iyi, 4 ɛzu izɔma mi mbala anu itama mi iyi ɛlɔgbulɔ iyi Ukpo munyi yi, akwu mu ilukwu iyi iso isomo mi mo, akwu mu ekpasu iyi Kwundu uwu Ukpo, 5 kaa ikwu idu lu fulo yi li wɛlɛ mu ilukwu iyi onzu mo, li wɛlɛ mu ekpasu iyi Ukpo.

6 Tetete ɛlɔgbulɔ iyi ilukwu gba ki zɛ le laa umba bɔkɔ ɔ bulɔma-a mu kwundu. Ilukwu ɛlɛ ba akwiyi kwudu kwɔlɛ mo ba akwiyi asu umba ɔyi ɔlɛ mo - umba bɔkɔ ekpasu mba i nda la ibomo fo mo. 7 Ɛlɔgbulɔ iyi mi zɛ yi ba akwu meka iyi ilukwu iyi Ukpo iyi bɔkɔ e nvye yi mo nzhii ba a ba wa yi kwudu mu kwuye nzu kaa lakwu ɔnyɛ nzu mbala inzumbɛku nzu. 8 Asu umba kwudu kwɔlɛ ba ukpukpɛnyi mba te a zɔngɔma ilukwu ɛlɛ ma mo; moo lo zɔngɔma yi ma, o ngbɛ Ɔkwu uwu inzumbɛku ma mo.

9 Tetete, kyamate bɔkɔ o ka mu kwokpo ungwu Ukpo tee,

<<Kiya ingyi bɔkɔ onzu uwunawuna a da ma ngyi dɛ mo, a da pwa ngyi dɛ mo,

ba a da bi egbo ngyi dɛ mo

gba Ukpo a nɔngɔ e shi laa

umba bɔkɔ o pwu idɛnyi wu le.>>

10 Ukpo ba a zɔ yi nzu mu Kwundu wu.

Kwundu e yitu iyi kiya ingyinangyina, la apula iyi Ukpo iyi bɔkɔ i kɔma mu idama la onzu. 11 Moo uwe bɔkɔ e do te e yitu iyi egbo iyi onzu uwufo? Onzu mafyi wu gba e yitu iyi egbo wu le. Tatayi Onzu uwu bɔkɔ e yitu iyi egbo iyi Ukpo, akwu Kwundu uwu Ukpo kɛɛkyi. 12 Kwundu uwu bɔkɔ ki na le, akwu mbaa enzu umba kwudu kwɔlɛ mo, e ngyi mbaa Ukpo. Kwundu uwu Ukpo ele gba e shi nzu iyitu kaa la ki zɔngɔma apula iyi bɔkɔ Ukpo e shi nzu rɛshi le.

13 Ɛlɔgbulɔ ɛlɛ gba ki ye yi mu izɛma le, ba akwu mu ilukwu iyi ɔ zɔ nzu izɔma mu kwudu kwɔlɛ mo, akwu mu ilukwu iyi bɔkɔ Kwundu uwu Ukpo e shi nzu kaa la ki zɛ enzu umba bɔkɔ o yi Kwundu uwu Ukpo ɛlɔgbulɔ iyi Kwundu a lɔ nzu te la ki zɛ. 14 Onzu uwu bɔkɔ e yi Kwundu uwu Ukpo mo, e do tee a na rɛshi ingyi Kwundu uwu Ukpo mo. Iso iyi Ukpo i yi kyamate iso iyi erendo tayi mu eyi wu, uwu ba e do yi izɔngɔma mo, moo Kwundu uwu Ukpo kɛɛkyi gba e shi onzu a zɔngɔma iso iyi Ukpo ma le. 15 Onzu uwu bɔkɔ Kwundu uwu Ukpo e yi mawu, e mondo kiya ingyinangyina ma, onzu uwunawuna ba, e do tee e mondo wu mo mo. 16 Kyamate Kwokpo ungwu Ukpo kwu so tee,

<<Uwe bɔkɔ e yitu iyi egbo iyi Ɔkwu?

Uwe bɔkɔ e do tee a ta wu amasa?>>

Kinzu ba ki yi egbo iyi Okrasi.