1 Mi gyi te kaa la mi lolo yi ɛmɛnɛ mi, iyi ilɔ iyesheshi iyi bɔkɔ mi zɛ yi awu, iyi bɔkɔ lu na yi ma akwɛyi ikwu idu lu fulo yi i rima ngiri ma yi awu. 2 Akwiyi gba lu nyama laa anu itama iyi rɛnu ingyi Ukpo ingyi bɔkɔ mi ta yi awu mu egbo yi ngiri, lu fya isama ma. Moo de ba ikwu idu lu fulo yi akwu shaa.

3 Moo mi shi yi kiya ingyi bɔkɔ mi na, ingyi bɔkɔ ri yi ogbo gyɔɔ: te Okrasi e kpomo kwuwongu ingbomo nzu, kyamate bɔkɔ o ka o fu mu kwokpo ungwu iso iyi Ukpo awu; 4 tee o pwuwumo akwɛyi ɔnu uwu kwɔfyi ungwola o yi wu mo mu kwuvɔ, kyamate bɔkɔ o ka mu kwokpo ungwu iso iyi Ukpo awu; 5 tee a zɔ ɛnwu ma laa Opita akwɛyi laa wa zɛ ilɔ wewo la wepo mbamba. 6 Mizhikembo iyɛnyi, a zɔ ɛnwu ma laa wa mbwalu umba o pika ederi ɛlɔ ma kwuye kwukpɛnyi kya, umbafo mba gyɔɔ o degbo lakwunyɔ, umbafo ba o kpomo-o. 7 Akwɛyi a gba a zɔ ɛnwu ma laa Ozhemisi, akwɛyi mizhikembo iyɛnyi, a zɔ ɛnwu ma laa wa zɛ ilɔ lɛɛbi.

8 Mu imbwama yi, a zɔ ɛnwu ma laa Imi tete, Imi uwu bɔkɔ mi yi kyamate onzu uwu evya i gyirima dɛ mo gba o mbawu le. 9 Moo Imi gba mi kwu umbwambwa uwu wa zɛ ilɔ le lɛɛbi, Imi lala mi domo te kaa lo ya mi te u zɛ ilɔ mo, kwuwongu mi lo enzu umba ɔshɔshi uwu Ukpo inyashi gyɔɔ. 10 Akwu kwuwongu esheshi iyi Ukpo gba ba mi kwu onzu uwu bɔkɔ mi kwu ɔnɛnɛ le, esheshi iyi bɔkɔ e shi mi ele akwu shaa mo. Imi ba mi wo ɛduma mi ka wa zɛ ilɔ umba bɔkɔ o shimo le mo, ba akwu iwomo mi mo, esheshi iyi Ukpo gba i wo ɛduma ma mi le. 11 Kwuwongwu ɔlɛ, gba i ngyi munyi mi naa munyi mbo, ɛlɛ gba akwu kiya ingyi bɔkɔ ki tanu ngyi le, ɛlɛ gba ba akwu kiya ingyi bɔkɔ lu nyama la ngyi le.

12 Akwiyi gba o tanu tee Okrasi e yimo mu kwuvɔ-ɔ, i zɛ te ba umbafo yi o zɔ te igba la iyimo mu kwuvɔ iyi enzu umba bɔkɔ o kpomo-o awu i yi mo? 13 Akwiyi gba i yi kyamate bɔkɔ lu so awu kego, de ba Okrasi e yimo mu kwuvɔ mo; 14 akwiyi gba Okrasi e yimo mu kwuvɔ mo, de ba ki yi kiya ingyi bɔkɔ ki tanu ngyi mo, lunyi ba lu yi kiya ingyi bɔkɔ lu nyama la ngyi mo. 15 Akwiyi gba akwu ongbulolo tee enzu o yimo mu kwuvɔ mo, de ba o yi nzu ombu kwuwongu imulo iyi ki mulo Ukpo, kwuwongu ki so yi tee Ukpo e yi Okrasi ma mu kwuvɔ. 16 Moo akwiyi gba enzu umba bɔkɔ o kpomo o gbala iyimo mu kwuvɔ mo de ba Okrasi e yimo mu kwuvɔ mo. 17 Akwiyi gba akwu ongbulolo te o yi Okrasi mo mu kwuvɔ mo, de ba ikwu idu lu fulo yi akwiyi umbwa, lunyi ba lu degbo lu tomo mu ingbomo yi bɛnɛ. 18 I kyo i zɔ tee enzu lɛɛbi umba bɔkɔ o kpomo-o bɔkɔ o fulo egbo mu Okrasi awu o to mo. 19 Akwiyi gba eyi ifulomo nzu mu Okrasi akwu kwuwongu kiya ingyi kwudu kwɔlɛ kɛɛkyi, de ba ki kwu enzu umba inyashi ki kaa uwewe ma mu kwudu kwɔlɛ.

20 Ongbulolo gba e yi tee o yi Okrasi mo mu kwuvɔ, ɛlɛ gba akwu kɛzɔ le tee enzu umba bɔkɔ o kpondo mu Okrasi, o gba mba la iyimo mu kwuvɔ tete. 21 Moo kyamate bɔkɔ lukwu lu zɛ mu onzu ukpɛnyi gba lu bo le awu, tatayi gba iyimo mu kwuvɔ i zɛ mu onzu ukpɛnyi gba i nyɔ le tete. 22 Moo kyamate bɔkɔ enzu lɛɛbi o kpomo i zɛ mu Adɛmu awu, tayi gba enzu lɛɛbi o yi mbo mo mu kwuvɔ i zɛ mu Okrasi le tete. 23 Uwewe ba e yimo mu kwuye wu: Okrasi e yi keyi; akwɛyi kwuyengwu a ba gbama awu, enzu umba bɔkɔ akwu umba wu, o yi mbo mo mu kwuvɔ tete. 24 Akwɛyi, kwudu kwɔlɛ ku bomo; Okrasi a na ekpasu iyi enzu umbeyi ma, mbala umba idomo, mbala asu akwɛyi a ra laa Ɛsu e shi Ukpo Ada. 25 Moo Okrasi e ri ɛsu mega nzhii ba kwuyengwu Ukpo e ri enzu umbeyi wu mo lɛɛbi mu ewa akwɛyi e fu mbo mu alɛwu. 26 Onzu uwoyi u mbwambwa uwu bɔkɔ o ngbɛwu ɛdɔma akwu lukwu. 27 Moo kwokpo ungwu iso iyi Ukpo kwu zɔ tee, <<Ukpo akwu apula lɛɛbi e lo yi mu ɔnwu uwu Okrasi.>> I ta ndu tee, <<apula lɛɛbi>> iyi bɔkɔ o so awu i kyo Ukpo mafyiwu mɛmi mo, kwuwongu uwu gba e lo apula lɛɛbi mu ɔnwu uwu Okrasi le. 28 Mizhikembo iyi bɔkɔ Ukpo e lo apula lɛɛbi mu ɔnwu uwu Okrasi, akwɛyi Okrasi mafyiwu, uwu bɔkɔ akwu umɛ uwu Ukpo awu, e to ɛnwu e lo mu ɔnwu uwu Ukpo, uwu bɔkɔ akwu apula lɛɛbi e lo mu ɔnwu wu awu; akwɛyi Ukpo ee ri ɛsu iyi apula lɛɛbi.

29 Akwiyi gba iyimo mu kwuvɔ i yi mo, kimbe ba akwu esheshi iyi obatisima uwu bɔkɔ enzu mbɔlɛ o wo laa enzu umba bɔkɔ o kpomo-o? Umba ɔ gyi tee lo fya mbɛ ma yi? Akwiyi gba umba bɔkɔ o kpomo-o o yimo mo, kyamate bɔkɔ umbafo o so, kwuwongu mbɛ bɔkɔ enzu mbɔlɛ o wo mbo obatisima kwuwongu umba bɔkɔ o kpomo-o? 30 Kinzu ba kwuwongu mbɛ bɔkɔ ki lo ɛnwu nzu mu kumbɛ kwuyengwunaguna? 31 Ɛmɛnɛ mi, Imi mi ma lukwu kwɔfyi kwɔfyi! Imi so tayi kwuwongu mi kwu ɛnwu ma yi kwuwongu ikyomesu nzu mbala Okrasi Ɔzhizɔsi Ɔkwu nzu. 32 Akwiyi gba la kwu iyi onzu bi, Imi mi kiri ewa mbala <<izɔfyi umba akata>> munɛ mu Ɛfɛsɔ. Ogbo uwu mbɛ bɔkɔ mi fya? Gba lɔ zɔ tee umba bɔkɔ o kpomo o gbala iyimo mu kwuvɔ mo de ba kyamate kwoba kwu zɔ, <<La ki ri la ki wo, moo kwɔnyi kwɔlɛ ki ŋi kpomo.>>

33 Enzu lo kyoro yi mo mo. <<Imɛza irimo mbala enzu umbira i tutu onzu uweshi mo.>> 34 La lu gba la lu bo mbaa egbo yi iyeshi ɛnyi kaa la lu lafya la ingbomo. Umbafo yi o yitu iyi Ukpo mo. Mi so ɛlɛ kaa lovya la lu wo yi mo le.

35 Onzu uwufo ba o yo kwuyo tee, <<Ii wo te ba onzu uwu bɔkɔ e kpomo-o oo gba wu la iyimo mu kwuvɔ? Ɛnwu iyina bɔkɔ e yi yi?>> 36 Orondo ele! Kiya ingyi bɔkɔ ŋɔ so ngyi mo awu ki kpomo dɛ gba ki bi bi iyi le. 37 Kiya ingyi bɔkɔ ŋɔ so ngyi mo awu akwu kwuyi kwukpɛnyi bi, igboshimo akwu kwuyi ungwu owiti naa kwuyi ungwu ewiri iyifo bi, moo akwu uwɛyi ngyɔɔ mafyi wu mo akwɛyi mizhikembo kwu bulɔma. 38 Ukpo ba ee shi kwuyi kwɔngu ɛnwu kyamate bɔkɔ a gyi; ee shi kwuyi ungwunanguna ɛnwu iyi bɔkɔ i fa ma ngwu.

39 Akwu ɛnwu lɛɛbi gba akwu ikpɛnyi le mo; enzu o yi ɛnwu iyamba ikikɔ, izɔfyi o yi iyamba, afyi o yi iyamba, emu tete o yi iyamba. 40 Ɛnwu iyoshi i yi, ɛnwu iyi kwudu kwɔlɛ i yi tete; woshi umbwu ɛnwu iyoshi u yimo mbala umbwu ɛnwu iyi kwudu kwɔlɛ. 41 Ɔnu u yi woshi bwu ikikɔ, ɔvya u yi woshi mbu ikikɔ, elovyo i yi woshi yi; elovyo lala iyi woshi ikikɔ ikikɔ.

42 Iyimo mu kwuvɔ tegba i ŋi yi le. kwuyengwu bɔkɔ ɛnwu o pwuyimo, i vama; kwuyengwu bɔkɔ o yi yi mo mu kwuvɔ ba, i vama mo. 43 Ɛnwu i ma inyashi kwuyengwu o pwuyimo mɛzhi, kwuyengwu o yi yimo mu kwuvɔ ba i yi inzumbɛku. kwuyengwu bɔkɔ o pwuyimo mɛzhi i kɔma mo, kwuyengwu o yi yi mo ba i kɔma. 44 Kwuye ungwu bɔkɔ o pwuyimo, akwu ɛnwu iyi onzu; kwuyengwu o bo yi yi mo awu akwu ɛnwu iyi kwundu. Tabɔkɔ ɛnwu iyi onzu i yi awu, ɛnwu iyi kwundu i yi tete.

45 Moo kwokpo ungwu iso iyi Ukpo kwu zɔ tee, <<Onzu uwu kwonze, Adɛmu, o ndo kwondo wu e yi kwunyɔ>>; Adɛmu umbwambwa ba akwu Kwundu u shi kwunyɔ. 46 Akwu ɛnwu iyi kwundu ba i bo keyi le mo, ɛnwu iyi kwudu kwɔlɛ gba i bo keyi le, akwɛyi iyi kwundu i mbwalu. 47 Onzu uwu kwonze, o wo wu mu umbwuru, a wɔ mɛzhi; Onzu uwopo ba a wɔ moshi. 48 Enzu umba bɔkɔ akwu umba kwudu kwɔlɛ, o yi kyamate onzu uwu bɔkɔ o wo wu mu umbwuru umbwɛzhi awu; enzu umba bɔkɔ akwu umba oshi ba o yi kyamate onzu uwu bɔkɔ a wɔ moshi awu wɔ moshi awu. 49 Tabɔkɔ ki yi kyamate onzu uwu bɔkɔ o wo wu mu umbwuru umbwɛzhi awu, tatayi gba ki bi yi kyamate Onzu uwu a wɔ moshi awu le tete.

50 Iyi bɔkɔ mi ye yi mu isomo, ɛmɛnɛ mi, gba i yi tee, ɛnwu nzu iyi ɛnzhi i ri ogu mu ɛsu irimo iyi Ukpo mo, tatayi kiya ingyi bɔkɔ ki vama ki ri ogu uwu kiya ingyi bɔkɔ ki vama mo mo. 51 La lu ngbalu, mi so yi kiya ingyi invyemo: Akwu kinzu lɛɛbi gba ki kpomo le mo, kinzu lɛɛbi ba gba ɔ vindɔ nzu ma le, 52 mu i wo pere iyi eyi akwɛyi kɛlɛlɛ, o kpa kwongangaraki kwu mbwambwa. Moo o kpa kwongangaraki akwɛyi enzu umba bɔkɔ o kpomo-o awu o gbamba laa iyimo mu kwuvɔ, akwɛyi o kpomo gbee fo, akwɛyi kinzu ba o vindɔ nzu ma. 53 Moo ɛnwu nzu i yi bɔkɔ i vama le, mega o vindɔ yi ma kaa lakwiyi bɔkɔ i vama mo; ɛnwu nzu iyi bɔkɔ i kpomo le, mega o vindɔ yi ma kaa lakwiyi bɔkɔ i kpomo mo. 54 kwuyengwu bɔkɔ ingyi ri vama ba ri vama fo, ingyi bɔkɔ ri kpomo bɔkɔ ri kpomo fo, akwɛyi iso iyi bɔkɔ o ka mu kwokpo ungwu iso iyi Ukpo i nyɔlɔma te: <<Lukwu ɔ ngbɛnduma-a; ibyima iyi lukwu ɔ mbwayima-a!>>

55 << Lukwu, muna bɔkɔ ibyima ŋa i yi fo?

Lukwu, muna bɔkɔ kɛtu ŋɔ ke yi fo?>>

56 Ingbomo gba akwu kɛtu unga lukwu le, ingbomo ba i fya ekpasu yi mbaa Ɛrama. 57 Ɛnyi ba lakwu iyi Ukpo uwu bɔkɔ e shi nzu ki byi lukwu ma i zɛ mu Ɔkwu nzu Ɔzhizɔsi Okrasi!

58 Kwuwo kwɔlɛ, ɛmɛnɛ mi umba idɛnyi mi, la lu rima ngiri kaa kiya kinyinyi la ki wo yi akpa mo. La lu to ɛnwu yi la lu ta laa ɛduma iwomo iyi Ɔkwu, kwuwongu lunyi lu yitu tee ɛduma iyi bɔkɔ lu yi mu iwomo laa Ɔkwu le akwu shaa mo.