1 Kwuwo kwɔlɛ, la lu lafya laa ira iyinayina,mbala anya mbala kwukyoro mbala rise mbala ikyɛma. mbala Onzu i tutumo. 2 La lu wo lonzu undu iso iyi Ukpo ɛsɛsɛ kyamate ɛmɛ umbelu o wo lonzu undu kwɔmɛ tayi. Iyi i shi yi lu bulɔma kaa la lu fya isama. 3 Kyamate iso iyi Ukpo i so tee, <<Kekelele lu yitu-o tee Ukpo e shoshi.>>

4 Tabɔkɔ lu bo mbaa Ɔkwu, uwu bɔkɔ e yi kyamate kwokyi kwureyi ungwu bɔkɔ enzu o towo ngwu mo, ungwu Ukpo a ŋa ba kwu she wu awu, 5 lunyi tete lu yi kyamate ekyi ireyi tayi. Lunyi gba Ukpo a ra yi e yi mu kwogba wu imbomo. Ukpo a ŋa yi kaa la lu kwu uzhi uwu ebwoshi wakɛrikɛri umba bɔkɔ o wo isabɔ iyi iduma iyi bɔkɔ i she la Ukpo mu ɛnyi iyi Ɔzhizɔsi Okrasi. 6 Moo kwokpo ungwu Ukpo kwu zɔ tee:

<<Yese, mi bɔ kwokyi mu Ɔzayɔ,

ungwu mi ŋa,

ungwu abwa,

ungwu ɔla,

onzu uwu bɔkɔ

a nyama la wu

lovya lu wo wu mo mo.>>

7 Kwokyi kwɔlɛ, lunyi umba bɔkɔ lu kwu idu lu fulo mawu awu, kwokyi kwɔlɛ kwu sa yi ma, umba bɔkɔ ɔ mbwalu mo ba iso iyi Ukpo i zɔ te, <<Kwokyi ungwu bɔkɔ wa mbo igwu o towo ngwu mo te akwu ungwu umbwa awu gba kwu kwu ɔla uwu ugu le ŋa.>> 8 Iso iyi Ukpo i gba i so kpɔ tee,

<<Kwoki ungwu kwu shi

enzu o tama

mbala ɔzɔ uwu

u shi mbo o kpa mɛzhi.>>

O kpa mɛzhi kwuwongu o towo iso iyi Ukpo imbwaluma. Ɛlɛ gba Ukpo e so e shi mɛzhi te i du mbo le.

9 Lunyi ba lu kwu enzu umba bɔkɔ Ukpo a ŋa mafyi wu, lu kwu ebwoshi umba Edego-ala, lu kwu ɛdɔ iyi bɔkɔ Ukpo a ŋa yi kaa la lu gbo wu ɔya. Ukpo a ŋa yi, akwɛyi a wa yi ma mu ipwu e bo ye mu ɛbɛ iyɛku awu, e wo tayi kaa la lu tanu iyi esheshi wu mba enzu. 10 Mekyi, lunyi lu kwu enzu umba Ukpo mo, kekelele lu kwu enzu umba Ukpo ŋa; mekyi lu fya eyembembyi iyi Ukpo mo, kekelele lu fya eyembembyi iyi Ukpo-o.

11 Ɛmɛza umba idu mi, la lu yitu te lunyi lu kwu agboga mu kwudu kwɔlɛ. Kwuwo kwɔngu, mi kpa yi ɛshɛku tee la lu zɛ gboo mbaa apula iyira iwomo, iyi bɔkɔ i to ewa mbala kwundu yi iyɔkpɔɔ awu. 12 La lu zɛ luzɛ undesheshi mbaa enzu umba ipwu. Gba lu wo tayi, kwuye ungwu o mulo yi tee lu wo kiya ingyira lala, tetete o ma apula iyesheshi iyi lu wo akwɛyi o du Ukpo ma ɔnuwu kwɔfyi ungwu igbama wu.

13 Kwuwongwu Ukpo, la lu lomo la atekeyi yi: la ɔsu uwakɔ uwu bɔkɔ a ra la ɛzhi lɛɛbi, 14 nana agomina umba bɔkɔ o shi mbo tee lo lo enzu umba bɔkɔ o wo ira inyashi, umba bɔkɔ o wo iyeshi ba lo pwɔ mba ma. 15 Moo Ukpo a gyite la lu wo iyeshi kaa iso iyi bɔkɔ erendo umbenzu o so mu reshi yi awu, li bɔma. 16 La lu ŋɔ kyamate enzu umba bɔkɔ ɔ kwu enye fo tayi. Tetete lunyi ba la lu to ɛlɛ kaa la kwayi ɔgwuzɛ uwu bɔkɔ lu vye ira yi ma mo; la lu zɛ luzɛ undu bɔkɔ lu fa la ɛmɛgba umba Ukpo. 17 La lu lomo la uwewe: La lu pwu idɛnyi iyi ɛmanyi yi wa mbwalu, la lu wiyi iyi Ukpo, la lu lomo la ɔsu uwakɔ.

18 Lunyi enye, la lu to ɛyi lɛɛbi lu shi ada umba kwogba yi mbala ilomo. La lu wo ɛlɛ la ada umba kwogba umba bɔkɔ o shi ari kɛɛkyi mo, umba bɔkɔ o yi wɔnu lala, lu wo mbo tete. 19 Moo Ukpo a mwɔnyɛ mbala onzu uwu bɔkɔ e yidu mu inyashi iyi bɔkɔ i fa te lo lo wu mo, kwuwongu e yitu iyi Ukpo a gyi. 20 Kwupwɔ ungwuna ba lu fya gba o bi yi ɛmwu kwuwongu lu wo ira ba lu yidu? Tatayi gba lu wo kiya ingyira mo, akwɛyi o bi yi ɛmwu, ba lu yidu, lu fya ipwɔma mbaa Ukpo. 21 Mu ɛlɛ gba Ukpo a ya yi ma le, moo Okrasi lala a ma inyashi kwuwo yi, akwɛyi a zɔ nzu te la ki mbwalu ata wu. 22 E ngbomo mo, onzu uwunawuna a pwa imulo mu kenzu wu mo. 23 kwuye ungwu bɔkɔ o kpa wu ari, a gba yi a kpa mba mo; kwuye ungwu o lo wu inyashi, e lo mbo iyi te uwu a gba yi e wo mbo mo. Uwu ba a ra la ɛnwu e shi Ukpo uwu bɔkɔ akwu u zɔ ombu marimari awu. 24 Okrasi mafyiwu akwu ingbomo nzu ma kwuyengwu bɔkɔ ɔ kpa wu mu kwuwɛyi ungwu lukwu. E wo ɛlɛ te kaa la ki yi kyamate ɛkpɛzhi umba enzu tayi, umba bɔkɔ o ngbomo fo akwɛyi ki ŋɔ kaa la ki wo iyi Ukpo a gyi. Kwuwongwu lunɛ undu bɔkɔ ɔ nɛ wu gba o bo yi efya yi ma le. 25 Moo mekyi lu yi kyamate ilɔ umba bɔkɔ o tomo tayi, kekelele ba lu gbama mbaa U bɔ yi eyi mbala U gbo yi mo.