1 Imi Opita, mi ka yi ɛnwu ma lunyi umba bɔkɔ lu kwu enzu umbakɔ awu, Imi mi kwu onzu uwakɔ mate lunyi tete, imi mi ma inyashi iyi bɔkɔ Okrasi a ma la eyi mi, mi gba mii yi mbala wu kwuyengwu bɔkɔ Ukpo a ba zɔ inzumbɛku wu awu, gba mii kpa yi ɛshɛku te 2 la lu bɔ eyi mbaa enzu umba Ukpo kyamate u pya luzhi a bɔ eyi mbaa luzhi wu tayi awu. La lu bɔ mba eyi kyamate enzu o kpa yi mɛgaa tayi mo, lunyi ba la lu wo kwuwongu i she yi te la lu wo tayi moo ɛlɛ tegba Ukpo a gyi le; la lu kwu enzu umba ekweyi iyi eduwo mo, la lu wo ɛduma mu egbo yi ikpɛnyi. 3 Enzu umba bɔkɔ Ukpo e lo yi yi mu kwuwo awu, la lu wo mbo kyamate enye mo, lunyi la lu zɔ mba ari iyeshi iyi bɔkɔ umba o do te o vɔngɔ munyi yi. 4 Gba lu wo ɛlɛ, kwuyengwu bɔkɔ Ɔzhizɔsi u to keyi uwu enzu lɛɛbi a ba gbama awu, luu na ɛnuma uwu inzumbɛku uwu bɔkɔ a wuma gbee mo.

5 Lunyi alugbaga tete, la lu lomo la enzu umbakɔ. Lunyi la lu kwu enzu umba egbo mɛzhi mu luzɛ yi mbala esu, kwuwongu, o ka mu kwokpo ungwu Ukpo te, <<Ukpo a gyi enzu umba bɔkɔ o to ɛmba o fulo kadu mo, enzu umba egbo mɛzhi ba a zɔ mba esheshi wu>>.

6 Kwuwo kwɔlɛ, la lu gba la ɛyi mɛzhi mu idu iyi Ukpo Edego-ala nzu uwu ekpasu, akwɛyi uwu ba e yi yi mo moshi mu kwuye wu. 7 La lu ra la egbo gidigidi yi la lu lo wu mɔwu, kwuwongu e pwu idɛnyi yi.

8 La lu yi ɛyi ma, la lu rima agiri, moo onzu uwoyi ogewa yi e yi mu oga ibyima kyamate ɔbaga uwu e yi mu onzu igagyima kaa le kwu tayi. 9 Lunyi ba la lu nyama kaa la lu shi wu ɔgwuzɛ mo, kwuwongu lu yitu te, ɛmanyi yi wa mbwalu munamuna mu kwudu kwɔlɛ o yi mu inyashi ɛlɛ te imama tete.

10 Ukpo uwu bɔkɔ e shi enzu wu esheshi awu, uwu bɔkɔ a ya yi ma kaa la lu fya inzumbɛku iyɔkpɔɔ kya mbala Okrasi awu, gba lu ma inyashi iyi kwuye bwɛ, uwu aa gba yi luu kwu enzu umbepo, akwɛyi ee shi yi ekpasu iyi luu rima ngiri ba lu wo akpa mo. 11 Ekpasu akwiyi Ukpo iyɔkpɔɔ ba ɔkpɔɔ. Li yi tayi.

12 Osalasi umɛza mi, umɛnɛ u mbwalu Ɔzhizɔsi ureyi, gba a mbwa mi ma mu kwupu ungwɛri kwɔlɛ ikama le, kaa la ki ka yi ɛnwu ma, la ki gba la ki za yi tee,ɛlɛ gba akwu esheshi ireyi iyi Ukpo le. La lu ra la iso ɛnyi gbagiri.

13 Wambwalu umba Ɔbabilɔ umba bɔkɔ Ukpo a ŋa mba kyamate bɔkɔ o ŋa yi awu mbala umɛ mi Omaki, o ye yi mu ɛnyi igbɛlɛma. 14 La lu gbɛlɛ esu ɛnyi, la lu kpa esu idu iyi i zɔ te lu pwu idɛnyi iyi esu.

Mii lɛ Ukpo te le shi yi wa mbwalu Okrasi iŋɔma iyi oloto lɛɛbi.