1 Eko, lunyi la lu lomo la umba anu yi tete, kaa umba bɔkɔ o towo iso iyi Ukpo mo awu, lo na yi ma kwuwongu iwomo iyi eko mbo, moo o so mbo mu kenzu dɛ fo, 2 kwuwongu o ma iwomo yi mu egbo ikpɛnyi mbala ɔgwuzɛ uwu Ukpo ilɛma yi marimari. 3 Ibɔma yi la kwu mu woshi izɔma mbala ɛnwu inɔngɔ ma bi mo, la kwu mu inyi ishimo mbala lɔkyɛ undu abwa ifumo mbala ekpayi iyi abwa ilomo mo. 4 Iwomo yi li wa la woshi umbu bɔkɔ u sɛma mo, bɔkɔ u yi ɛmbu kwuwo zezeze mu egbo yi awu kwudu. Ɛlɛ gba i she la Ukpo i ka le. 5 Moo tayi gba ekokpayi umba bɔkɔ o yi sɛsɛ bɔkɔ o shi egbo mbo mu Ukpo mekyi, o zɔ woshi mbo mo le. O lomo la umba anu mba, 6 kyamate bɔkɔ Osera e lomo la Aburamu akwɛyi a ya wu te ɔkwu mi tayi. Lunyi lu yi kyamate ɛmɛ eko umba Osera te akwiyi gba lu wo ongbulolo, bɔkɔ lu nyama te onzu le lo yi iyi mo.

7 Lunyi anumbeko, la lu wo bɛtɛ mbala eko yi tete, la lu wo mbo kyamate enzu umbopo yi umba bɔkɔ a kɔma mo tayi. Tete la lu lo mbo mo kwuwongu lunyi kya luu na esheshi iyi kwunyɔ ungwu Ukpo be shi yi awu, kaa kiya la ki fo Ukpo ilɛma yi ma mo.

8 Imbwambwa yi lɛɛbi, la lu ŋɔ ma mbala esu moloto; la lu ma eyembembyi iyesu, la lu gyesu kyamate imɛnɛ tayi, la lu ma inyashi iyi esu ba la lu gyi ɛnwu yi ma. 9 La lu wa kwosa ungwu ira iyi bɔkɔ onzu e wo yi mo, nana ari iyi bɔkɔ o pe yi, a ba kwu tayi de ba wo wu wu iyeshi, moo kwuwo ngwɔlɛ gba Ukpa a ŋa yi le kaa la lu fya iyeshi. 10 Moo kwokpo ungwu Ukpo kwu zɔ tee, <<Onzu uwunawuna uwu bɔkɔ a gyi te la fya ɔnyɛ ma mu iŋɔma wu, le yi kenzu wu kwuwo, le so iso iyi ira nana kwukyoro mo. 11 Akwu ɛga kaa la lafya la iyira kaa le wo iyeshi; la gagyi iŋɔma iyi oloto mbala enzu lɛɛbi akwɛyi la mbwa lu yi. 12 Moo Ukpo a bɔ eyi mu enzu umba ototo midu wu akwɛyi a pwa kwoya mba, ishi enzu umba bɔkɔ o wo iyira ba Ukpo e towo mbo mo.>> 13 Akwiyi gba ŋɔ yi egbo iyi iyeshi iwomo onzu u wo ŋɔ iyira e yi mo. 14 Akwiyi gba ŋɔ ma inyashi kwuwongu ŋɔ wo iyeshi de ba ŋɔ fya iyeshi ma mbaa Ukpo. Moo kwokpo ungwu Ukpo kwu zɔ tee << Uŋɔ ki riyi mbo mo; uŋɔ ki pulama mo.>> 15 Akwiyi gba egbo ŋɔ i shi ngboro te Okrasi gba akwu Ɔkwu le, koko ka yi ɛnwu ma iyi ŋɔ bi gba opwu la umba bɔkɔ o bo yo ŋɔ kwuyo kwuwongu eyi iyi ŋɔ fulo mu Ɔzhizɔsi awu. Uŋɔ ba gba opwu toto la iyi iyi Ukpo. 16 Egbo yi lakwu iruwu, kaa umba bɔkɔ o so ungwoyi yi kwuwongu luzɛ undu esheshi undu Okrasi imbwaluma awu, lovya la lu yi mbo mo kwuwongu iso iyi ira mba ɛnyi. 17 Akwiyi gba Ukpo a nyama ka ma inyashi kwuwongu esheshi iyi ŋɔ wo, i shoshi i kaa inyashi i mama kwuwongu ira iyi ŋɔ wo awu. 18 Okrasi e kpomo kwuzhikpɛnyi kwuwongu ingbomo iyi enzu lɛɛbi, onzu uwu ototo e kpomo kwuwongu enzu umbira, kaa le so ye mbaa Ukpo. O ngbɛ wu ma mɛnwu ba o gba wa lakwunyɔ ishimo mu kwundu, 19 a zɛ mu ɛndu a ka tanu la ɛndu mu aleku. 20 Ɛndu ɛlɛ i lomo la Ukpo mo mekyekyi, Ukpo ba e yidu a ŋɔ e gbo mbo, kwuyengwu bɔkɔ Onowa e yi mu kwɔda ikpomo awu. Enzu umba bɔkɔ o fye mɛmi iyi kwoda o yi bwɛɛ bi, akwu enzu waranda gba Ukpo a sa mba ma mu embyi le. 21 Embyi mbamba o yi mate obatisima uwu bɔkɔ a sa yi ma kekelele, akwu ɛnyinyi iyi ɛnwu igbɔma mo, akwu ka lo nyɔlɔ iso iyi bɔkɔ Ukpo e so e shi mɛzhi. Ɔzhizɔsi Okrasi e yimo mu kuvɔ, mu ɛlɛ gba o sa yi ma le. 22 Ɔzhizɔsi Okrasi a ka moshi-e, e yi mu kwuwo ungwungyi ungwu Ukpo. Alɔgbulɔ umba Ukpo mbala enzu umba idomo mbala umba ekpasu lɛɛbi o yi mu kwuwo wu.