1 Imi Opita, uzilɔ uwu Ɔzhizɔsi Okrasi gba mi ka yi kwupu kwɔlɛ le,

Lunyi enzu umba bɔkɔ Ukpo gba a ŋa yi le awu, bɔkɔ lu kwu agboga mu kwudu kwɔlɛ awu, bɔkɔ lu kpashaa lu yi mu ɛzhi iyi Ɔpɔtu mbala Ogalatiya mbala Okapadosiya mbala Eshiya mbala Obitiniya awu. 2 Lunyi Ukpo a ŋa yi mu iyitu wiyi keyi, mu ɛduma iyi bɔkɔ Kwundu e wo ma yi bɔkɔ a vyɛ yi ma mu ɛnzhi umba Ɔzhizɔsi Okrasi kwuwo ungwu lu mbwalu wu.

Esheshi mbala egbo inɔma gyɔɔ li yi mbala yi.

3 La ki du Ukpo uwu bɔkɔ akwu Ete wu Ɔkwu nzu ma, Ɔzhizɔsi Okrasi awu! U wu e shi nzu kwunyɔ ungwepo kwuwongu eyembembyi wu iyɛku. Kekelele ki yi eyifulomo ŋa kwuwongu iyimo iyi Ɔzhizɔsi mu kwuvɔ. 4 Ki kyo ki yi ogu uwu apula iyesheshi iyi bɔkɔ i kpɛdɔma mo, i tutumo mo ba i kpo ngbangbaa mo, iyi bɔkɔ Ukpo e she nzu moshi. 5 Ekpasu iyi Ukpo gba i ye yi mu igbomo le nzhii ba ɔnuwu bɔkɔ lu bu na isama iyi bɔkɔ o bo ta yanduu ɔnuwu bɔkɔ kwudu kwɔlɛ kwu bi bomo awu. 6 Lu ma inyashi iyi kwuye bwɛɛ kwuwongu ipwama ikikɔ ikikɔ iyi bɔkɔ i du yi; tetete la lu mwɔnyɛ gyɔɔ kwuwongu iyeshi iyi Ukpo e wo yi. 7 Ɛlɛ lɛɛbi i du yi te kaa lo pwa ikwu idu lu fulo yi ireyi ma, iyi bɔkɔ isheshi i ka ogolu ma awu. Ogolu uwu bɔkɔ e kpɛdɔma lala enzu o ma inyashi o lo wu mu ɔyi kaa lo ma shi akwu uwu eshi nana akwu uwura ŋa. Gba lu tama mu ipwama iyi ikwu idu lu fulo yi ɛlɛ mo, luu fya ipwɔma mbaa Ukpo kwuyengwu Ɔzhizɔsi a ba gbama awu. 8 Ɔzhizɔsi lala lu du ma wu dɛ mo, tetete ba, lu kpo lukwu wu; kekelele la lu ye wu mu imama mo, tetete lu nyama la wu la ɔnyɛ uwakwu uwu bɔkɔ onzu e do te e so mo. 9 Isama iyi kwunyɔ yi gba akwu rigbɛ ingyi lu yi mu inama le kwuwongu ikwu idu lu fulo yi mu Ɔzhizɔsi Okrasi.

10 Mɛka iyi iso iyi isama ɛlɛ, anukenzu umba bɔkɔ o siso mɛka iyi esheshi iyi i bi nyɔ awu, o yese mo ɔ gagya ngbɛɛ mu kwokpo ungwu Ukpo iyi Ukpo e be shi yi, 11 kaa lo yitu iyi kwuye mbala apula iyi bɔkɔ i bi wo kwuye kwɔngu, iyi bɔkɔ Kwundu uwu Okrasi uwu bɔkɔ e yi mamba awu, e ye mbo mu izɔma te lo so. Moo Kwundu e so mbo e shi mɛzhi-e te Okrasi a ma inyashi akwɛyi mizhikembo yi, Ukpo e shi wu inzumbɛku. 12 kwuyengwu bɔkɔ anukenzu o so iso mekeka iyi apula iyi bɔkɔ lu pwa mafyi iyi wa zɛ ilɔ umba Ɔzhizɔsi Okrasi umba bɔkɔ Kwundu uwu Ukpo e shi mbo o so yi iso iyi Ɔzhizɔsi awu. Ukpo a zɔ mba te ɛduma iyi bɔkɔ o yi mu iwomo le, akwu kwuwongu ɛmba mo, akwu kwuwo yi. Alɔgbulɔ umba Ukpo lala ɔ gyi te lo yitu iyi apula ɛlɛ tete.

13 Kwuwo kwɔlɛ, la lu nɔngɔ egbo yi ma kwuwongu ɛduma; la lu yi ɛnwu yi ma gbagiri; la lu fulo eyi yi lɛɛbi mu esheshi iyi Ukpo e be shi yi kwuyengwu Ɔzhizɔsi Okrasi a ba gbama awu. 14 Kekelele bɔkɔ lu kwu ɛmɛ umba Ukpo umba ilomo ŋa le, la lu mbwalu ari iyira kyamate kwuyengwu lu yi mu ipwu awu fo. 15 Ukpo uwu bɔkɔ a ya yi ma awu ba e yi sɛsɛ awu, lunyi tete la lu yi sɛsɛ mu apula yi iwomo lɛɛbi; 16 moo o ka yi ma mu kwokpo ungwu iso iyi Ukpo tee: <<La lu yi sɛsɛ, moo Imi mi yi sɛsɛ.>>

17 Lu ya wu tee Ada, kwuyengwu lu lɛ Ukpo uwu bɔkɔ a zɔ kwusɛ kwuyengwu e yese ɛduma iyi onzu uwunawuna mo. Kwuwo kwɔngu, la lu ŋɔ mu kwudu kwɔlɛ kyamate agboga tayi la iyi iyi Ukpo. 18 Moo lu yitu te akwu mu apula iyi bɔkɔ i kpɛdɔma kyamate esiliva nana egolu gba Ukpo a ra yi gba a wa yi ma mu rinye ingyi ukwu uwu umbwa uwu bɔkɔ asɔkwu yi o shi yi mo; 19 akwu mu ɛnzhi umba abwa umba Ɔzhizɔsi Okrasi, umba bɔkɔ o yi kyamate ɛnzhi umba ilɔ uwu e yi ofya mo, ba e yi kwuto mu ɛnwu wu mo tayi gba o wa yi ma le. 20 Ukpo a ŋa wu dɛ ishi e be wo kwudu kwɔlɛ le, tetete a zɔ wu mu kwudu mu kwuyengwu imbwambwa kwɔlɛ kwuwo yi. 21 Lu zɛ ma wu gba lu yitu iyi Ukpo uwu bɔkɔ e yi wu mo mu kwuvɔ akwɛyi e shi wu inzumbɛku le. Ɛlɛ gba i shi ikwu idu lu fulo yi mbala eyifulomo yi, i yi mu Ukpo le.

22 Kekelele bɔkɔ lu wulu egbo yi ma sɛsɛsɛ mu ongbulolo uwu iso iyi Ukpo imbwaluma akwɛyi lu yi idɛnyi iyeshi la wa mbwalu-o le, la lu gyi esu mu egbo yi lɛɛbi. 23 Moo kwunyɔ ungwepo ungwu Ukpo e shi yi ele, akwu mu kiya ki kpɛdɔma gba lu fya ngwu le mo, akwu mu iso iyi Ukpo iyi bɔkɔ i kpɛdɔma mo iyɔkpɔɔ awu, gba lu fya kwunyɔ ungwepo le. 24 Moo iso iyi Ukpo i zɔ te,

<<Enzu lɛɛbi o yi kyamate

ɔsɛ tayi,

woshi mbo ba u yi

kyamate edodo

iyi ɛzhi ɛngbarara tayi;

ɔsɛ u shirima akwɛyi

edodo i fumo mɛzhi,

25 iso iyi Ukpo ba i yi iyɔkpɔɔ.>>

Iso iyi eshi ɛlɛ gba ba ɔ ta yi anu yi le.