1 Kyamate bɔkɔ Okrasi a ma inyashi awu, lunyi tete la lu ka ɛnwu yi ma mu ɔgwuzɛ uwu bɔkɔ a zɛ awu, kwuwongu onzu uwunawuna uwu bɔkɔ a ma inyashi, e kyo mbala ingbomo fo. 2 Kwuwongwu ɔlɛ, i na mɔnɛ i she keyi, luzɛ ŋɔ mu kwudu kwɔlɛ lakwu undu bɔkɔ ɛnwu i gyi mo, lakwu undu bɔkɔ Ukpo e to ŋɔ keyi le. 3 Mekyi lu wo apula iyi bɔkɔ enzu umba bɔkɔ o yi Ukpo mo o wo. Lu tutu kwuye yi mo mu kaya itomo, ɔnyɛ uwu apula iyira iwomo, lu to ɛnwu yi lu shi atɛ iwomo mbala eshi ibyima. 4 Akwa mba kiya ingyi kenzu iyama te lunyi lu kyo mbala mba mu apula iyi ingbomo iwomo fo, kwuwo ngwɔlɛ o kpa yi ari. 5 Umba ba mega o so kiya ingyi bɔkɔ o wo laa Ukpo, uwu bɔkɔ a zɔ ombu uwu enzu umba bɔkɔ o kpomo-o mbala enzu umba bɔkɔ o degbo la reyi. 6 Kiya ingyi ki shi bɔkɔ o zɛ ilɔ iyesheshi laa enzu umba bɔkɔ o kpomo-o awu, gba o zɔ mba ombu mbo kyamate enzu o zɔ lala, kwundu mbo kwu yi moshi mbaa Ukpo.

7 Imbwama iyi apula lɛɛbi i bo-o. Lunyi la lu yi ɛnwu yi ma kaa la lu ngbɛndu kaa la lu lɛ Ukpo. 8 I yi bɔkɔ ika ɛlɛ ma lɛɛbi, gba akwu te, la lu pwu idɛnyi iyi esu, kwuwongu idɛnyi i koko i ngbomo mo gyɔɔ. 9 La lu na esu mu ewo epo, la lu za anu mo. 10 Wambwalu lo rala rɛshi ingyi bɔkɔ Ukpo e shi mbo awu kaa lo mbwala enzu umbafo ma. Umba lo rala rɛshi ikikɔ ikikɔ ingyi bɔkɔ Ukpo e shi mbo awu lo wo ugɔ ma ngyi marimari. 11 Enzu umba bɔkɔ o zɛ ilɔ lo zɛ iyi bɔkɔ Ukpo a lɔ mba awu, enzu umba bɔkɔ o wo kiya laa enzu awu ba lo wo mu ekpasu iyi Ukpo e shi mbo, kaa mekeka iyi apula lɛɛbi iduma laa kwiyi Ukpo i zɛ mu Ɔzhizɔsi Okrasi. inzumbɛku mbala ekpasu la kwiyi Edego-ala iyɔkpɔɔ. Ami.

12 Ɛmɛza mi umba idu mi, la kwa yi kiya ingyi kenzu iyama kwuwongu wɔnu umbu inyashi iyi bɔkɔ lu yi mu imama le mo, kwuwo kwɔngu lunyi la lu ma te akwu kiya ingyepo gba ki du yi le mo. 13 Lunyi ba la kwa yi kiya ingyi ɔnyɛ te lu kyo mu inyashi iyi Okrasi a ma awu, akwɛyi a kwa yi kiya ingyi ɔnyɛ kwuyengwu inzumbɛku wu i ta nduu. 14 Ukpo e shi yi esheshi akwiyi gba o pe yi kwuwongu Okrasi, ɛlɛ i zɔ te Kwundu uwu inzumbɛku uwu Ukpo e yi ma yi. 15 Akwiyi gba lu ma inyashi lakwu kwuwongu lu kwu wa ngbɛ enzu naa awɛlɔ naa enzu umba bɔkɔ o lo kenzu mu iso iyi bɔkɔ akwu iyamba mo mo. 16 Akwiyi gba lu ma inyashi kwuwongu lu kwu wa mbwalu Okrasi, la kwa yi kiya ingyi lovya mo, lunyi ba la lu gbɛlɛ Ukpo ɛnyi te o ya yi o ba la Okrasi. 17 Moo kwuyengwu ombu izɔma kwu bo-o i yo yoo mu enzu umba kwogba ungwu Ukpo, enzu umba bɔkɔ o towo iso iyi Ukpo ma ba o wo te? 18 Kyamate bɔkɔ kwokpo ungwu Ukpo kwu so te,

<<Gba ikɔma laa onzu ototo kaa lo sa wu ma,

onzu uwu bɔkɔ e yi Ukpo mo mbala onzu uwu ingbomo ba e wo te fo?

19 Kwuwo kwɔlɛ enzu umba bɔkɔ o ma inyashi kwuwongu inyama iyi Ukpo awu kaa lo gyakpɔɔ mu esheshi iwomo akwɛyi o to ɛnwu mba o ta la Ukpo uwu bɔkɔ e wo mbo kaa lo gyakpɔɔ mu esheshi iwomo uwu bɔkɔ ee wo iyi bɔkɔ e so te ee wo awu.