1 Lunyi enzu umba bɔkɔ lu yi kwuwo, la lu ngbɛ alu mu iso mi, lunyi la lu lo oga gbɔrɔrɔ kwuwongu wɔnu umbu u yi mu inyɔma munyi yi. 2 Kiya ingyi kwuwo yi ki kpo ɛdɔ ma, ekpayi yi ba ela e ri yi moo. 3 Egolu mbala esiliva yi i kpɔ akazhi, akazhi ɛnyi i zɔ te lu ngbomo, i pwu ɛnwu yi ma kyamate ɔyi u pwu kiya tayi. Lu yi mu kiya ingyi kwuwo ɛlu ikpalama, lunyi ba lu yitu te kwudu kwɔlɛ kwu sheye mu ibomo mo. 4 La lu yese! Enzu umba bɔkɔ o wo yi ɛduma mutu, ba lu shi mbo eduwo mo awu, enzu mbamba o yi mu oga ilomo oo fu yi. Oga uwu enzu mbamba ba u ka malu iyi Ukpo edego-ala. 5 Kwuye ungwu bɔkɔ lu yi mu kwudu kwɔlɛ awu, lu mwɔnyɛ gyɔɔ lu kyo lu wo kiya ingyi bɔkɔ lu gyi. Lu ri kiya ingyi ɛnwu yi i gyi akwɛyi lu lo wɔkwu kyamate izɔfyi uwu bɔkɔ o ma wu ma o gbo la ingbɛma. 6 Lu shi o ngbɛ enzu umba ototo ombu uwoyi akwɛyi o ngbɛ mba ma. Enzu mbɔlɛ ba o kiri yi ewa mo.

7 Kwuwongwu ɔlɛ, ɛmɛnɛ mi la lu yidu nzhii ba kwuyengwu igbama iyi Ɔkwu nzu Ɔzhizɔsi kyamate bɔkɔ ɔnɛgba a rigbo laa ɛzhi kaa li wala ewiri kwudu akwɛyi a rigbo laa ukpo rito mbala ukpo uwu imbwama tayi.

8 Lunyi wa mbwalu tete, la lu yidu kaa lu bɔ kpɔɔ mu imbwaluma, moo igbama iyi Ɔzhizɔsi i bo kɛlɛɛ-ɛ. 9 Ɛmɛnɛ mi, lunyi la lu kyɛ esu ma mo, gba lu wo tayi lu ngbomo. U zɔ ombu awu a ndafo.

10 Ɛmɛnɛ mi, la lu vɔngɔ idu iyimo mbaa anukenzu umba Ukpo. O ma inyashi, umba ba o yidu o tanu iyi Ɔkwu nzu Ɔzhizɔsii. 11 Kyamate bɔkɔ lu yitu, enzu umba bɔkɔ o yi ɔnyɛ akwu enzu umba o ri enya mba nzhii o ka mu imbwama. Lu pwa eza te Ozhobu e yidu mu inyashi wu. Mizhikembo yi Ukpo a mbwa wu ma. Moo Ukpo akwu u ma inyashi mbala eyembembyi iyi enzu. 12 Ɛmɛnɛ mi, iyi bɔkɔ i ka ɛlɛ ma lɛɛbi gba akwu te, la lu vungɔma la lu to la kiya mo, laa oshi laa ɛzhi laa kiya ingyinangyina mo. <<Ee>> yi lakwu ee, <<Ayimo>> yi lakwu ayimo, gba lu so lu ka ɛlɛ ma Ukpo a ngbɛ yi ombu uwoyi.

13 Kwuye ungwu lu yi mu inyashi imama, la lu lɛ Ukpo kaa la mbwa yi ma. Gba lu yi mu ɔnyɛ imwuma, la lu so amwu iyi iduma la Ukpo. 14 Onzu uwunawuna uwu bɔkɔ e yi okpara uwu ɛnwu mo, la ya enzu umbakɔ umba ɔshɔshi ma kaa lo lɛ Ukpo kwuwo wu akwɛyi lo la wu anyi umba ɔlifu mu reshi, kwuyengwu bɔkɔ o yi mu Ukpo ilɛma mu ɛnyi iyi Ɔkwu nzu Ɔzhizɔsi. 15 Ukpo ilɛma uwu bɔkɔ o lɛ mu ikwu idu lu fulo e bo onzu awu ofya ma; Ukpo e yi wu mo. Gba e ngbo la Ukpo mo, Ukpo a gba yi a kpa wu. 16 Kwuwo kwɔlɛ, la lu so ingbomo yi la esu kaa lu lɛ Ukpo kwuwongu esu kaa Ukpo le bo yi efya ma. Ukpo ilɛma iyi onzu ongbulolo i yi ekpasu. 17 Anukenzu Elazha akwu onzu kyamate kinzu tete, akwɛyi a lɛ Ukpo iyɛkɔkɔ te Ukpo le tumo mo, Ukpo ba e tumo mo nzhii ba lɔri lola la evya ɛrɛnyi. 18 Akwɛyi a gba a lɛ Ukpo kpɔ te Ukpo la gba la itumo ŋa akwɛyi Ukpo a gba la itumo, akwɛyi ɛzhi i wɔ la ewiri gyɔɔ.

19 Ɛmɛnɛ mi, gba onzu uwufo meka yi a lafya la ɔgwuzɛ uwu Ukpo ɔlɛ, lunyi la lu gyakpɔɔ kaa lu gba wu ma le bo mu ɔgwuzɛ. 20 Lunyi la lu lolo te: Onzu uwunawuna uwu bɔkɔ a gba la onzu uwu ingbomo a ta mu ɔgwuzɛ uwu Ukpo a sa onzu awu ma mu lukwu undɔkpɔɔ. Ukpo a gba la ingbomo iyi bɔkɔ onzu awu e ngbo gyɔɔ awu a kpa wu.