1 Ɛmɛnɛ mi, akwu kpɛkpɛyi gba la lu kwu wa zɔ ɛzu le mo, kwuwongu lu yitu te, Ukpo e yo nzu kinzu wa zɔ ɛzu kwuyo a ka uwewe ma. 2 Kinzu ki lɛfyi kwuyengwunanguna, gba onzu e ngbomo mu iso wu isomo mo, onzu awu a gyirima munamuna, onzu awu tayi e do ɛnwu irima gbagiri.

3 Gba ki lo uri mu kenzu unga Onya kaa le wo iyi bɔkɔ ki gyi, ki do te ki re la onya ngyɔɔ mbaa bɔkɔ ki gyi, 4 naa egbo nzu li so mbaa kwoda ungwu embyi ungwɔkwu. La imbwulama ngwu ba ombirigizhi gba a pyangu le, tetete, kwɔsɔ ungwɛri te gba u pɛ kwɔda a ra ngwu akwɛyi pyangu e re ngwu mbaa bɔkɔ a gyi le. 5 Tete ɔtinɛ akwu kiya ingyɛri mu ɛnwu iyi onzu ba a bɔma gyɔɔ te e do kiya ingyɛkwu iwomo. La lu gba la lu ngbɛndu te ɔyi ɔkɛkyi u do kwokata ungwɔkwu ipumo. 6 Ɔtinɛ uwu onzu e yi kyamate ɔyi tayi, meka iyi ɛnwu iyi onzu uwu gba a ka ira le. Ɔtinɛ e tutu ɛnwu iyi onzu kpɛkpɛyi ma, a ngbɛ kwunyɔ wu ɛdɔma, kyamate ɔyi uwu aleku u yi ma wu tayi. 7 Izɔfyi umbanambana laa afyi umboshi laa umba bɔkɔ o zɛ mu ibu mbo laa umba bɔkɔ o yi membyi, kpɛkpɛmba o gwu mbo mo, akwɛyi enzu ba o gwu mbo mo. 8 Onzu uwu bɔkɔ e domo te e gwu ɔtinɛ ma ba e yi mo. Ɔtinɛ e yi ɛtu kyamate ɛtu iyi ɔgbazhi tayi.

9 Mu ɔtinɛ nzu ele gba ki gbo Ɔkwu nzu, Ete nzu ɔya le, tete akwu mu ɔtinɛ ele gba ki siso iyira iyi enzu umba bɔkɔ Ukpo e wo mbo o wɔ wu le. 10 Mu kenzu kɛlɛ tete gba ki so iso iyeshi mbala iyira iyi enzu le. Ɛmɛnɛ mi ishoshi te lakwu tayi mo. 11 Kwubu kwu tembyi umbeshi mbala umbira kwuye kwukpɛnyi mo. 12 Ɛmɛnɛ mi, uwɛyi uwu oboriyo u do te u wa la imuma iyi olifu? Nana uwɛyi uwu oremi u wala imuma iyi uwɛyi uwu oboriyo? Tatayi kwubu kwukpɛnyi kwu tembyi umba otopwa mbala umbeshi kwuye kwukpɛnyi mo.

13 Uwe meka yi bɔkɔ e yi amasa mbala ilukwu? Onzu awu la zɔ yi mu luzɛ wu undeshi izɛma, le wo ɛduma la egbo mɛzhi mbala amasa. 14 Gba lunyi o yi rise ingyɛkwu mbala imɛyɛyi mu egbo yi, la lu kwu ɛnwu te lu kwu enzu umba ilukwu mo, moo ɛlɛ akwu imulo. 15 Ilukwu ɛlɛ te i ngyi moshi mbaa Ukpo mo, i wɔ mu kwudu kwɔlɛ, mbaa enzu umba bɔkɔ o yi kwundu ɔpɛriri mamba mo, i wɔ mbaa onzu uwoyi. 16 Moo munamuna mbaa bɔkɔ enzu o wo rise ingyi esu mbala imɛmɛmba, mɔmɔ gba ŋɔ du ovyo mbala ira iyinayina le.

17 Ilukwu iyi bɔkɔ i wɔ moshi i ka pɛriri le; i bo la ovyo mo; i wo wɔnu mbala enzu mo; i lomo la enzu; i ma eyembembyi iyi enzu mbala ɛduma iwomo iyesheshi; i zɔ kusɛ mo ba i mwangba mo. 18 Enzu wa gyi iŋɔma iyi oloto o somo iyi oloto, ba o fya iyeshi.