1 Kimbe ki ta yi itumo mbala ewa? I wɔ mbaa amasa iyira iyi lu ka mu egbo yi. 2 Lunyi lu gyi apula gyɔɔ ba lu fya yi ma mo akwɛyi lu ngbɛ enzu, lu gba lu wo ekweyi iyi apula iyi enzu, lunyi ba lu fya yi ma mo kwuwongu lu nda Ukpo mo. 3 Kwuye ungwu lu nda Ukpo kiya lala lu fya yi ma mo, moo lu nda kwuwongu ɔnyɛ uwu ɛnwu yi kɛɛkyi, lu gyite la lu sa ugɔ uwu ɛnwu yi kɛɛkyi.

4 Lunyi enzu wa to kaya mbɔlɛ, lu yitu te imɛza irimo mbala kwudu kwɔlɛ akwu egewa mbala Ukpo mo re? Onzu uwunawuna uwu a gyi te kaa le ri imɛza mbala kwudu kwɔlɛ, e wo ɛnwu wu ogewa uwu Ukpo. 5 Naa lu ma te Kwokpo ungwu Ukpo kwu so bi re te Kwundu uwu Ukpo uwu e shi nzu awu e wo rise gyɔɔ mo? 6 Ukpo ba e shi nzu esheshi iyɛku kyamate bɔkɔ Kwokpo ungwu Ukpo kwu so te:

<<Enzu umba bɔkɔ o fu lo ɛmba mu kadu, Ukpo a nya mba mɛzhi

enzu umba bɔkɔ o gyi ɛnwu mba ma ba Ukpo e shi mbo esheshi.>>

7 Kwuwongwu ɔlɛ, ra la ɛnwu ŋɔ ka shi Ukpo. Uŋɔ ba towo ɔgwuzɛ uwu onzu uwoyi ma akwɛyi a renya e shi ŋɔ. 8 La lu turu gbala Ukpo akwɛyi uwu ba e turu a gbayi lunyi enzu umba ingbomo la lu lafya la kiya ingyira iwomo, la lu nɔngɔ egbo yi ma lunyi umba egbo epo. 9 La lu wo ubu ugyi, la lu wo obobyi, la lu lo oga. La lu lafya la lu ŋɔ kaa la lu lo oga, la lu lafya la ɔnyɛ imwuma kaa la lu wo ubugyi. 10 La lu gyi ɛnwu yi ma mu idu iyi Ukpo akwɛyi uwu ba e fulo yi kadu.

11 Ɛmɛnɛ mi la lu tutu esu ma mo, gba onzu e so ungwoyi naa a zɔ ombu uwura uwu umanyi wu, ɛrama iyi Ukpo gba e so ungwoyi yi le. Gba onzu e wo tayi onzu awu akwu mbwalu ɛrama mo, akwu u tutu yi mo. 12 Ukpo kɛɛkyi gba e shi ɛrama le uwu gba ba a zɔ ombu le, uwu gba e do te a sa enzu mo le naa e lo enzu inyashi le. Kwuwongwu ɔlɛ o ya ŋa te bɔkɔ uŋɔ ŋɔ zɔ ombu uwu onzu uwufo?

13 La lu pwa, lunyi umba bɔkɔ lu zɔ te, << Ɔnɛnɛ naa kwɔnyi kwɔlɛ ki re mu kwuse kwɔlɛ naa kwɔngu, ki ŋɔ mɔmɔ kari ngyɔɔ kaa la ki wo rishi kaa la ki ri kwule,>> awu. 14 Lunyi ba lu yitu iyi kiya ingyi ki bi wo kwɔnyi kwɔlɛ mo. Kwunyɔ yi akwu kwuwongu mbɛ? Kwu yi kyamate ebwu iyi bɔkɔ ii wɔ kwuye bwɛɛ akwɛyi i gba ii tomo ndii tayi . 15 I fate la lu zɔ te, <<Gba Ukpo a nyama ki yi la reyi, ki wo kiya ngyɛlɛ naa ngyɛngyi.>> 16 Lunyi ba lu kwɛnwu mu kiya ingyi bɔkɔ lu bu wo. Ɛnwu ikwumo ɛnyi tayi i sheshi mo. 17 Kwuwongwu ɔlɛ, onzu uwu bɔkɔ e yitu iyi kiya ingyi bɔkɔ ki shoshi te le wo ba e wo mo, onzu awu e ngbomo.