1 Kwupu kwɔlɛ kwu ngyi mbaa mi, Imi Ozhemisi, Umɛgba uwu Ukpo mbala uwu Ɔkwu Ɔzhizɔsi Okrasi:

mi gbɛlɛ yi ɛnyi lɛɛbi lunyi enzu umba Ukpo umba bɔkɔ o kpashaa munamuna mu kwudu kwɔlɛ awu.

2 Ɛmɛnɛ mi, kwuyengwunanguna bɔkɔ inyashi i du yi, la kwa yi kiya ingyi ɔnyɛ, 3 moo lu yitu te ipwama iyi ikwu idu lu fulo yi mu Ɔzhizɔsi, i kyo yi idu iyimo mo. 4 La lu vɔngɔ idu iyimo mu iyinayina akwɛyi lu kɔma, luu kwu enzu umba bɔkɔ ɔ nyɔlɔma mu kiya ingyinangyina. 5 Onzu uwu bɔkɔ e yi ilukwu mo, ba la nda Ukpo uwu bɔkɔ ee shi mu egbo ikpɛnyi ba a za anu mo awu. 6 Kwuye ungwu onzu ba a nda kwoya te lo shi wu ilukwu, le fulo eyi, le yi egbo epepo mo. Mo onzu uwu egbo epo e yi kyamate agba iyi embyi tayi, iyi bɔkɔ kwokpo kwu fya yi i re te, i gba te awu. 7 Onzu awu tayi, le fulo eyi te a fya kiya kinyinyi mbaa Ukpo mo. 8 Onzu awu tayi ɔ wɛlɛ ma wu mo, kwuwongu a ŋanga egbo wu mo kwuyengwunanguna bi.

9 Umɛnɛ ɔyirewa, la mu ɔnyɛ te Ukpo ee kyo wu mo. 10 Umɛnɛ uwu e yi kwuwo ba la mwɔnyɛ te Ukpo a zɔ wu inyɛma wu, mo u wu mbala kiya ingyi kwuwo wu o kpɛdɔma ndii mutu uwɔniyi kyamate edodo tayi. 11 Mo gba ɔnu u kwo mu ilama, uzu wu u ngbɛ edodo ma akwɛyi i fumo mɛzhi akwɛyi woshi yi u tomo ndii. Tatayi gba onzu uwu e yi kwuwo e yi le. Ee yi mu igɔma iyawu la ɛduma wu iwomo akwɛyi mutu uwɔniyi ɔ pwa te e yi fo.

12 Onzu uwu bɔkɔ ɔ pwa wu ma ba a tama mo, e yi ɔnyɛ uwakwu, mo mizhikembo yi, a na rigbɛ ingyi kwunyɔ ungwɔkpɔ ba ɔkpɔɔ ungwu bɔkɔ Ukpo e so e shi mɛzhi te e shi enzu umba bɔkɔ o kpo lukwu wu.

13 Onzu uwu o pwa wu ma laa zɔ te, <<Ukpo gba e ye mi mu ipwama le.>> Mo Ukpo, o pwa wu ma mo, u wu ba a pwa onzu uwunawuna ma mo. 14 Ekweyi iyi onzu gba i kyoro wu mo akwɛyi i ka wu la ipwama le. 15 Mizhikembo iyi ekweyi i shi rifo, akwɛyi i mba ingbomo, gba ingbomo i bulɔma-a, i bo la lukwu.

16 Ɛmɛnɛ mi umbafyafyimi, onzu uwunawuna le kyoro yi mo mo. 17 Rɛshi ingyi kiya ingyesheshi ingyinangyina ki ngyi moshi mbaa Edego-ala uwu bɔkɔ e wo ɔnu mbala ɔvya mbala elovyo iyi bɔkɔ i lemo moshi awu, uwu bɔkɔ e turumo kyamate kwundu ungwu ɔnu na ungwu uwɛyi na ungwu onzu mo awu. 18 A ka nzu la ongbulolo uwu iso, ki na yi ma akwɛyi ki fya kwunyɔ ungwepo kaa la ki kwu umba kwonze mu apula lɛɛbi iyi bɔkɔ e wo.

19 Ɛmɛnɛ mi, onzonzu la ngbɛndu mu iso ɛlɛ: Uwewe le wo kwupapa ungwu iso ipwama, tetete uwu ba la gba opwu efyefya mo, ba lakwu u wo amba efyefya mo. 20 Mi so ɛlɛ kwuwongu bɔkɔ amba umba onzu ɔ bo la kiya ingyeshi ingyi Ukpo a gyi mo. 21 Kwuwo ngwɔlɛ la lu lafya la ira iyinayina iwomo kaa lu mbwalu iso iyi Ukpo iyi bɔkɔ o so yi mu egbo yi awu, moo inyi gba i sa yi ma le.

22 La lu kwu wangbalu mu iso iyi Ukpo byi mo. Onzu uwu e wo ɛlɛ ba e kyoro ɛnwu ma. La lu wo kiya ingyi iso iyi Ukpo i zɔ te lo wo. 23 Onzu uwunawuna uwu bɔkɔ a pwa iso iyi Ukpo byi ba e wo kiya ingyi i zɔ te lo wo mo, e yi kyamate onzu uwu bɔkɔ e yese ɛnwu mu umɛbɛ tayi, 24 akwɛyi a gba a kama. I to Kwuye gyɔɔ mo akwɛyi a ka la kuleyi iyi bɔkɔ uwu e yi. 25 Onzu uwu ba aa bɔ eyi mu ɛrama iyi Ukpo iyɔkpɔɔ, iyi bɔkɔ i sa nzu ma le, akwɛyi a mbwalu yi iyɔkpɔɔ, Ukpo e shi wu esheshi wu kwuwongu iwomo wu ɛlɛ.

26 Onzu uwunawuna uwu e to ɛnwu te uwu akwu u mbwalu Ukpo, uwu ba e yi kenzu wu mo mo, e kyoro ɛnwu ma byi, Ukpo imbwaluma wu ba akwiyi umbwa. 27 Luzɛ undu bɔkɔ Ukpo Edego-ala a gyi, undu bɔkɔ lu wuluma gba akwu te, lo yese mba ɛmɛ umbese mbala eko wakpanuma kwuyengwu o yi mu inyashi mbala izɛ gboo mba inzumbira iyi kwudu kwɔlɛ.