1 La lu pwu idɛnyi iyi esu kyamate wa mbwalu ngboro tayi. 2 La lu lolo kaa lu na agboga yi mu ewo epo, moo enzu umbafo o wo tayi ba o yitu tee akwu alɔgbulɔ umba Ukpo mo. 3 La lu lolo enzu umba bɔkɔ o yi mu ugu ugyi awu, kyamate lu yi mɔmɔ mbala mba tayi. La lu lolo enzu umba bɔkɔ o yi mu inyashi imama, kyamate lu yi mu inyashi imama kyamate mba tayi.

4 Uwewe le shi igba laa ɔnu iyama mbala oko itomo, oko mbala ɔnu lo kwidu lo fulo mesu. Ukpo a zɔ ombu laa enzu umba bɔkɔ o yama mbala enzu umba bɔkɔ o to kaya.

5 La lu ngbɛndu, la lu kpoluku undu eduwo mo, kiya ingyi bɔkɔ lu yi ngyi la ki do yi mo. Moo Ukpo a zɔ tee, <<Imi mi lu yi afyima mo; ba Mi towo yi mo mo.>> 6 Kwuwo kwɔlɛ la ki so mu egbo ikpɛnyi tee,

<<Ɔkwu akwu u mbwami ma,

Imi mi riyi mo.

Kimbe bɔkɔ onzu e do te e wo mi?>>

7 La lu lolo wa to keyi yi umba kwonze umba bɔkɔ o zɔ yi iso iyi Ukpo awu. La lu lolo apula iyi esheshi lɛɛbi iyi bɔkɔ umba o wo mbala lukwu mbo kaa la lu mondo ikwu idu lu fulo mbo. 8 Ɔzhizɔsi Okrasi e yi mule, e yi ɔnɛ, ba e yi iyɔkpɔɔ. 9 La lu shi kaa ɛzɔ iyepo ikikɔ ikikɔ li to yi mo mu ɔgwuzɛ ongbulolo mo. I shoshi kaa la lu na ekpasu mba esheshi iyi Ukpo, moo lakwu mbaa ɛrama iyi kiya ingyirimo imbwaluma mo; enzu umba bɔkɔ o mbwalu ɛrama ɛnyi, i mbwa mba ma mo.

10 Eboshi umba Ukpo umba bɔkɔ o wo ɛduma mu riyi ingyi Ukpo ilɛma ingyi Azhu o yi ekpasu iyi o ri kiya ingyi isabɔ mu kwumbu ungwu isabɔ nzu mo. 11 Ebwoshi umba Ukpo umbakɔ umba Azhu o nya la ɛnzhi umba izɔfyi mu Riyi Ingyi Ri Ka Kɛrikɛri le awu kaa lo wo isabɔ iyi ingbomo, ivye iyi izɔfyi mbamba ba o pwu yi mo mizhikembo iyi kwunu. 12 Kwuwo kwɔlɛ gba Ɔzhizɔsi e kpomo mizhikembo iyi kwuse le tete, kaa la ra la ɛnzhi wu la gbɔ ingbomo iyi enzu mo. 13 Kwuwo kwɔlɛ, la ki so mizhikembo iyi kwunu kaa la ki shi lovya mbala wu kyakya. 14 Moo kwudu kwɔlɛ akwu kwogba nzu mo, kinzu ki yi mu eyifulomo iyi kwogba ungwu kwu yi mu inyɔma. 15 Kwuwo kwɔlɛ kinzu la ki du Ukpo ma iyɔkpɔɔ, inyi gba akwu isabɔ nzu iyi i zɛ mu Ɔzhizɔsi le, inyi gba akwu reshi ingyi amu itama mbala Ukpo iduma tee uwu gba akwu Ɔkwu le. 16 La lu kalakwuleyi iyi esheshi iwomo mbala imbwama lesu mo, kwuwongu ɛlɛ gba akwu isabɔ iyi bɔkɔ i she laa Ukpo le.

17 La lu lomo laa watekeyi yi, la lu mbwalu ɔkpa mba. Umba o bɔ eyi ma yi ba o yi ɛnwu igbomo mo, kwuwongu akwu mega o so ɛduma iyi bɔkɔ umba o wo laa Ukpo. Akwiyi gba lu lo mbo mo, oo wo ɛduma mba la ɔnyɛ; gba akwu tayi yi mo, umba o wo ɛduma mba la egbo igyi, ɛnyi ba i mbwa yi ma mo.

18 La lu gyakpɔɔ mu Ukpo ilɛma kwuwo nzu. Moo egbo nzu akwu ikpɛnyi, kwuwongu ki gyi tee la ki wo iyesheshi kwuyengwunanguna. 19 Mi kpa yi ɛshɛku tee la lu gyakpɔɔ mu Ukpo ilɛma kaa li to kwuye gyɔɔ mo kaa Ukpo la lɔ mi la mi gba mi so munyi yi.

20 Ukpo uwu idigbomo, uwu bɔkɔ i zɛ mu ɛnzhi umba kenzu igyirima unga ɔkpɔɔ ba ɔkpɔɔ, uwu bɔkɔ a gba laa Ɔkwu nzu Ɔzhizɔsi iyimo mu lukwu, uwu bɔkɔ akwu U gbo Ilɔ Uwakwu awu, 21 le shi yi ekpasu kaa lu wo esheshi iyi bɔkɔ a gyi. Le shi yi ekpasu i zɛ mu Ɔzhizɔsi Okrasi kaa la ki wo kiya ingyi ki she wu. inzumbɛku akwu iyi Ɔzhizɔsi Okrasi iyɔkpɔɔ ba ɔkpɔɔ! Ami.

22 Mi kpa yi ɛshɛku, ɛmɛnɛ mi, tee la lu shi alu mu rɛnu ingyi ɛnwu ikama ngyɛlɛ; moo kwupwu kwɔlɛ ungwu mi ka yi ngwu ele kwu yi wɔzhi mo. 23 Mi gyi tee la lu yitu tee umanyi nzu Otimoti o wa wu ma mu ugu ugyi e. Akwiyi gba e bo efyefya, mi nyɔ mbala wu munyi yi.

24 La lu gbɛlɛ wa tekeyi yi ɛnyi lɛɛbi mbala enzu umba Ukpo lɛɛbi. Wa mbwalu umba bɔkɔ o yi mu Itali awu o zɔ tee lɔ gbɛlɛ yi ɛnyi.

25 Esheshi iyi Ukpo li yi mbala yi lɛɛbi.