1 Ɔmɛkizɛdɛ ele akwu ɔsu uwu Ɔsalɛmu, a gba akwu obwoshi uwu Ukpo uwakwu. Tabɔkɔ Aburamu e yi mu igbama mbaa ewa kwuye ungwu bɔkɔ a ngbɛ asu wendo mo awu, akwɛyi Ɔmɛkizɛdɛ e kpolo wu akwɛyi a ta wu kenzu ungeshi, 2 akwɛyi Aburamu e to kiya kikpɛnyi meka iyi uwo iyi apula lɛɛbi iyi bɔkɔ a fya mu ewa akwɛyi e shi wu. (Iluma iyi kwonze iyi ɛnyi iyi Ɔmɛkizɛdɛ gba akwu <<Ɔsu uwu ototo>>; akwɛyi kwuwongu bɔkɔ akwu Ɔsu uwu Ɔsalɛmu, iluma yi gba akwu <<Ɔsu uwu oloto.>>) 3 Ɔmɛkizɛdɛ ele e yi ada mo ba e yi ɛnɛ mo ba o yi ɛdɔ wu mo. E yi iyemo mo ba e yi imbwama mo. E yi mate Umɛ uwu Ukpo tayi; akwu obwoshi uwu Ukpo iyɔkpɔ ba ɔkpɔɔ.

4 Kekelele lu ma onzu ele akwu onzu uwakwu. Moo Aburamu usɔkwu nzu lala e shi wu ogbo ukpɛnyi meka iyi uwo iyi apula iyi bɔkɔ akwu mbaa ewa awu. 5 Ɛrama iyi Omosisi i shi ɛmɛ umba Olevi ebwoshi tee lo na ogbo ukpɛnyi meka iyi uwo mbaa enzu umba Izirɛ, mbaa ɛmanyi mba, umba bɔkɔ o kwu ɛmɛ umba Aburamu tete awu. 6 Ɔmɛkizɛdɛ uwu bɔkɔ akwu oye uwu Olevi mo lala, a na ogbo ukpɛnyi meka iyi uwo mbaa Aburamu akwɛyi a ta wu kenzu ungeshi, Aburamu uwu bɔkɔ a na iso iyi bɔkɔ Ukpo e so e shi mɛzhi. 7 Kaambu ke yi mu ɛlɛ mo tee onzu u ta kenzu ungeshi a ka uwu bɔkɔ o ta wu awu ma. 8 Mu iso ɛlɛ iyi ebwoshi umba Olevi, enzu umba o kpomo gba o na ogbo ukpɛnyi meka iyi egbo uwo le; mu iso iyi Ɔmɛkizɛdɛ ba, onzu ureyi gba a na ogbo ukpɛnyi meka iyi uwo le, mate bɔkɔ kwokpo ungwu Ukpo kwu so tayi. 9 Akwɛyi ki do te kii zɔ tee, kwuyengwu bɔkɔ Aburamu e shi ogbo ukpɛnyi meka iyi uwo awu, Olevi uwu bɔkɔ ɛmɛ wu o na ogbo ukpɛnyi meka iyi uwo awu, e kyo e shi uwawu tete. 10 Moo kwuyengwu bɔkɔ Ɔmɛkizɛdɛ e du Aburamu awu, Olevi o do mba wa mo, e degbo mu ɛnwu iyi usɔkwu wu Aburamu bɛnɛ. 11 Akwu kwuwongu ɛduma iyi ebwoshi iwomo iyi ɛdɔ iyi Olevi gba ɛmɛ umba Izirɛlu o shi mbo ɛrama le. Gba ɛduma iyi ebwoshi iwomo iyi ɛdɔ iyi Olevi li nyɔlɔma, obwoshi uwufo le be bo fo, uwu bɔkɔ ebwoshi iwomo wu i yi kyamate iyi Ɔmɛkizɛdɛ, moo akwu mate iyi Ɛrɔnu mo. 12 Moo akwiyi gba o ŋanga ɛgwuzɛ iyi ebwoshi itomo mo, mɛga ɛrama o ŋanga yi ma tete. 13 Ɔkwu nzu uwu bɔkɔ o siso ɛlɛ le mu reshi wu a wɔ mu kenzu kɛlɛ mo, onzu uwu kenzu wu lala e de wo ɛduma iyi ebwoshi dɛ mo. 14 Moo ki yitu marimari tee Ɔkwu a wɔ mu ɛdɔ iyi Ozhuda; Omosis ba a zɔ tee ebwoshi ɔɔ wɔ mu kenzu kɛlɛ mo.

15 Iso ɛlɛ i yi pepe-e tee; obwoshi uwufo a wɔ, e yi mate Ɔmɛkizɛdɛ tayi. 16 Ebwoshi iyi onzu ele, i ngyi mu ɔgwuzɛ uwu ɛrama iyi bɔkɔ onzu e wo mo, akwu mu ɔgwuzɛ uwu ekpasu iyi kwunyɔ ungwɔkpɔ. 17 Moo kwokpo ungwu iso iyi Ukpo kwu zɔ tee, <<Ŋɔɔ kwu obwoshi iyɔkpɔɔ, ebwoshi ŋɔ i yi mate iyi Ɔmɛkizɛdɛ tayi.>> 18 Kwuwo ngwɔlɛ ɛrama iyekyi o pya yi ma o shi yi mɛzhi, kwuwongu i kɔma mo ba akwiyi umbwa byi. 19 Moo ɛrama iyi Omosisi i shi kiya ingyinangyina ki gyirima yɛriri mo. Kekelele eyi ifulomo i yi marimari-e, mu ɛlɛ gba ki yi kɛlɛɛ mbala Ukpo le. 20 Ivungɔma iyi Ukpo i kyo kadu tete. Ivungɔma iyi Ukpo i yi mo kwuyengwu bɔkɔ umbafo mbamba o to mbo ebwoshi. 21 Ɔzhizɔsi ba akwu obwoshi, kwuye ungwu Ukpo a vungɔma tee:

<<Ɔkwu a vungɔma a

ba a gba kembo fo. A zɔ tee:

<Ŋɔ kwu obwoshi iyɔkpɔɔ.> >>

22 Kwuwongwu ivungɔma ɛlɛ, gba i shi Ɔzhizɔsi akwu onzu uwu kwudeka iyi iso i shi mɛzhi iyi bɔkɔ ishoshi i ka le le.

23 Ikama iyifo i yi tee: ebwoshi umbafo gyɔɔ o yi tete, kwuwongu bɔkɔ o kpomo akwɛyi ɛduma mba i ka keyi fo. 24 Ɔzhizɔsi ba e yi iyawu iyɔkpɔɔ; ɛduma iyi ebwoshi wu ba akwu iyɔkpɔɔ, ɛduma wu ba o shi yi onzawa fo. 25 Kwuwo kwɔlɛ, e do enzu isama iyɔkpɔɔ umba bɔkɔ o zɛ mawu o bo mbaa Ukpo, kwuwongu e yi iyɔkpɔɔ mbaa Ukpo mu kwoya indama kwuwo mbo.

26 Ɔzhizɔsi gba akwu obwoshi uwakɔ uwu bɔkɔ e do ugɔ nzu isama le. E yi kɛrikɛri; e yi kiya ingyi o yi wu ombu mangyi mo naa ingbomo mo; Ukpo a ka wu ma mbala enzu umba ingbomo akwɛyi Ukpo e yi wu mo a kawa moshi. 27 E yi mate ebwoshi umbakɔ umbafo mbamba mo; e yi ugɔ uwu ee shi isabɔ iyi ɛnwu kwɔfyi kwɔfyi keyi dɛ ishi iyi enzu mo. Kwuye ungwu a ra lɛnwu e shi awu, e wo isabɔ izhɛnyi la enzu lɛɛbi. 28 Ɛrama iyi Omosisi i ŋa enzu umba bɔkɔ o nyɔlɔma mo tee lo kwu ebwoshi umbakɔ; ivungɔma iyi Ukpo, iyi bɔkɔ i bo kembo iyi ɛrama ba, i ŋa Umɛ, uwu bɔkɔ a nyɔlɔma mu kiya ingyinangyina iyɔkpɔɔ ba ɔkpɔɔ.