1 I yi ikwu idu lu fulo akwu inyama laa kiya ingyi bɔkɔ onzu e fulo eyi mangyi mbala egbo ifulomo mu kiya ingyi bɔkɔ ki ma ngyi mo. 2 Akwu mu ikwu idu lu fulo ɛlɛ gba enzu umbekyi Ukpo a pwɔ mba ma le.

3 Akwu mu Ikwidufulo gba ki zɔngɔma ma tee Ukpo a rala iso wu gba e wo kwudu kwɔlɛ le, moo apula iyi bɔkɔ ki ma yi ele e wo mu apula iyi bɔkɔ o ma yi meyi mo. 4 Akwu mu ikwu idu lu fulo gba Ɛbɛlu e wo isabɔ ireyi laa Ukpo iyi bɔkɔ i ka iyi Okenu ma le. Akwu mu ikwu idu lu fulo wu gba Ukpo a nya wu ma tee akwu onzu ototo le, kwuyengwu bɔkɔ Ukpo e siso iyesheshi mu rɛshi wu. Kwuwongwu ikwu idu lu fulo wu, Ɛbɛlu e kpomo-o, tetete e degbo mu iso isomo. 5 Akwu mu ikwu idu lu fulo gba Ɛnɔki o towu mo lareyi, kaa la ma lukwu mo le. O ma wu mo kwuwongu Ukpo e to wu mo a ka wa moshi. Iso iyi Ukpo i zɔ tee Ɛnɔki e wo kiya ingyi ki she la Ukpo keyi dɛ gba Ukpo e to wu mo a kawa moshi le. 6 Iwomo kaa onzu le she laa Ukpo mo gba e ikwu idu fulo mo, moo onzu uwunawuna uwu bɔkɔ a nyɔ mbaa Ukpo akwu mega kaa le yi ikwu idu fulo tee Ukpo e yi ba e shi rigbɛ laa enzu umba bɔkɔ o kagyi wu laa egbo mbo lɛɛbi.

7 Akwu mu ikwu idu fulo gba Onowa a pwa iso mekeka iyi kiya ingyi bɔkɔ ki di wo dɛ mo. A pwa iso iyi apula iyi bɔkɔ a da ma yi de mo.E lomo laa Ukpo akwɛyi e wo kwoda ungwebyi ungwoku kaa la sa enzu umba kwɔgba wu ma le. Mu iwomo ɛlɛ, kwudu kwɔngu o ngbɛ ngwu ɛdɔ ma akwɛyi Ukpo e wo Onowa onzu ototo kwuwongu ikwu idu fulo.

8 Akwu mu ikwu idu fulo gba Aburamu e lomo laa Ukpo kwuye ungwu bɔkɔ Ukpo a ya wu ma tee kaa le so mu ɛzhi iyi bɔkɔ Ukpo a gyiri kenzu mo te e shi wu awu. A lafya la kwuse wu ba e yitu mɔgɔ uwu bɔkɔ e sheyimo mo. 9 Akwu mu ikwu idu fulo gba a ŋɔ kyamate ugboga mu ɛzhi iyi bɔkɔ Ukpo a gyiri kenzu mo te e shi wu awu. A ŋɔ mu ɛnu kyamate bɔkɔ Aziki mbala Ɔzhɛkɔpu, umba bɔkɔ o na kenzu igyirima ka kpɛnyi mbaa Ukpo. 10 Moo Aburamu a rigbo kwuse ungwu bɔkɔ Ukpo a nɔngɔ a gba e mbo, kwuse ungwu kwu yi ola uwɔkpɔɔ.

11 Akwu mu ikwu idu fulo gba Aburamu uwu bɔkɔ a wuma gyɔ-ɔ akwu ada le, Oko wu Osera ba akwu odogyi. Aburamu e kwu idu e fulo tee Ukpo ee wo kyamate bɔkɔ e so e shi mɛzhi awu. 12 Aburamu a wuma e yi kyamate ukpɛzhi tayi, tetete, i zɛ ma wu gba enzu riba riba umba bɔkɔ o yi kyamate elovyo iyoshi mbala ɔgyɛ uwu risu uwu bɔkɔ o do wu iwama mo awu.

13 Akwu mu ikwu idu fulo gba enzu mbɔlɛ lɛɛbi o rala ikwu idu lu fulo mbo nzhii ba o kpomo. Umba ba o na apula iyi bɔkɔ Ukpo e so e shi mɛzhi awu mo, umba ba o ri sharu o ma yi akwɛyi o na yi ma, o nya ma gedegede tee umba o kwu agboga mbala aganangba mu kwudu kwɔlɛ. 14 Enzu umba bɔkɔ o so iso ɛlɛ te awu i zɔ te umba o yi mu ɛzhi iyamba ikagyima. 15 O ka amasa iyi ɛzhi iyi bɔkɔ o lunyi afyima awu mo, moo gba lo ka amasa, o bo gagyi kapa unga oo gbama. 16 Umba ba, o yi mu ɛzhi iyi i sheshi i ka le ikagyima, ɛzhi iyi i yi moshi. Ɛlɛ gba i shi Ukpo ba e wo lovya tee umba o ya wu tee Ukpo mbo mo le, kwuwongu a nɔngɔ kwuse e shi mbo-o.

17 Akwu mu ikwu idu fulo gba Aburamu e to umɛ wu Aziki kaa le wo wu isabɔ kwuye ungwu bɔkɔ Ukpo a pwa wu ma awu le. Aburamu gba ba akwu onzu uwu bɔkɔ Ukpo a gyiri kenzu mo mbala wu le, tetete e yi ɛnwu ma i yi bɔkɔ e shi umɛ wu ukpɛnyi awu kaa lo wo wu isabɔ. 18 Ukpo ba e so wu-o tee, <<Akwu mu Aziki gba ŋɔ yi ɛdɔ iyi bɔkɔ mi gyiri kenzu mo mbala ŋa awu le.>> 19 Aburamu e kwu idu fulo tee Ukpo e do te e yi Aziki ma mu lukwu, Aburamu ba a na Aziki ma mu lukwu kego.

20 Akwu mu ikwu idu fulo gba Aziki e so e shi mɛzhi te a ta Ɔzhɛkɔpu mbala Isɔ kenzu unga esheshi le.

21 Akwu mu ikwu idu fulo gba Ɔzhɛkɔpu a ta ɛmɛ umba Ɔzhɔsɛfu kenzu ungeshi dɛ gba e kpomo le. A wɛlɛ mu upi wu akwɛyi e gbo Ukpo ɔya.

22 Akwu mu ikwu idu fulo gba Ɔzhɔsɛfu, e siso iyi iwɔma iyi Izirɛ mu Izhipiti, kwuye ungwu bɔkɔ a nda la ikpomo fo akwɛyi e so mbo kiya ingyi bɔkɔ o bo wo mu ekwu wu.

23 Akwu mu ikwu idu fulo gba ete uwu Omosisi mbala anyi wu o nvye wu mo nzhii ba evya ela mizhikembo iyi o mbawu. O ma tee akwu umɛ uwoshoshi, umba ba o wiyi tee o fo ɛrama iyi ɔsu ma mo.

24 Akwu mu ikwu idu fulo gba Omosisi a nyama tee uwu akwu umɛ uwu umokokpayi uwu ɔsu Ofero kwuye ungwu bɔkɔ a bulɔma mo le. 25 A nyama kaa la ma inyashi mbala enzu umba Ukpo, ɛlɛ i she wu i ka iyi bɔkɔ a mwɔnyɛ mu ingbomo iyi kwuye bwɛɛ. 26 E to ese ikpomo kwuwongu Okrasi i ka ogbo laa ɔnyɛ uwu Izhipiti ma, moo a bɔ eyi mu rigbɛ ingyi a ba na. 27 Akwu mu ikwu idu fulo gba Omosis a lafya la Izhipiti ba a wiyi iyi amba umba ɔsu mo. A bɔ eyi wu mu Ukpo uwu bɔkɔ o ma wu mo awu akwɛyi e tomo iyi igba kembo. 28 Akwu mu ikwu idu fulo gba Omosisi a ta ɔkpa laa enzu umba Izirɛ tee lo koko lo wo odumudumu uwu ikalama kaa lo fya ɛnzhi mu lunzugu kaa Ɔlɔgbulɔ uwu Lukwu uwu oshi la ngbɛ ɛmɛ anzɔnu umba kwonze umba Izirɛ ma mo. 29 Akwu mu ikwu idu lu fulo gba enzu umba Izirɛ o sa risu ri fyovyo ma kyamate akwu mu ɛzhi iyi ɛwuru tayi; kwuyengwu enzu umba Izhipiti o gyi tee lo fye, akwɛyi embyi o ri mbo mo. 30 Akwu mu ikwu idu lu fulo gba ɔbɛ uwu Ozheriko u shirimo mizhikembo iyi bɔkɔ enzu umba Izirɛ o fula wu ma afyi erewo le. 31 Akwu mu ikwu idu lu fulo gba Orewabu u to kaya awu o ngbɛ wu ma mbala enzu umba bɔkɔ o towo ilomo laa Ukpo mo le, kwuwongu enzu umba Izirɛlu umba bɔkɔ o lɔ mba ma kaa lo ŋanda ɛzhi ma kyo kyo awu a na mba ma mu ewo epo. 32 Mi so te kpɔ? Kwuye kwu yemi gyɔɔ kaa la mi siso iyi Ɔgidiyɔ, Obaraki, Osamisi, Ozhefuta, Odevidi, Ɔsamuwɛ mbala anukenzu lɛɛbi mo. 33 Akwu mu ikwu idu lu fulo gba o to ewa mbala ɛzhi gyɔɔ akwɛyi o ri mo le. O wo ongbulolo akwɛyi o na kiya ingyi bɔkɔ Ukpo e so e shi mɛzhi mbala mba. O koko lunzu undu abaga ma, 34 o nyi ɛtunɛ iyi ɔyi ma, o wirima mbaa ingbɛma iyi ukpandɛrɛ. O finyashi, ba o gba o vindɔ enzu umba ekpasu; o yi ekpasu mu ewa itomo akwɛyi o ri asozha agboga ma. 35 Akwu mu ikwidufulo gba eko o na enzu mbo umba bɔkɔ o kpomo lareyi le.

Umbafo, umba bɔkɔ o tomo kaa lo gba kembo kaa lo lu mba afyima, o kpomo meka iyi inyashi imama kwuwongu kaa lo bo yi mbo mo la kwunyɔ ungwu kwu shika. 36 Umbafo o wo mbo ɛnɛ akwɛyi o kpa mba izele, umbafo o lo mbo ɛyɛ akwɛyi o to mbo o ka mu ugu ugyi. 37 O kpa mbafo ekyi, enzu umbafo o ka mba epo mu ukpandɛrɛ. O kpo ekpo iyi ilɔ mbala i yi ɛmu mɛnwu mu ifulama - o yi rewa, o lo mbo inyashi, akwɛyi o kpa mba ɛmu. 38 Kwudu kwɔlɛ kwu shoshi kwu shi mbo mo! O fulama mu akata mbala lɔwa, efyo mbala ɛbu mu ɛzhi kyamate aganangba tayi. 39 Enzu mbɔlɛ lɛɛbi o she la Ukpo kwuwongu ikwidufulo akwɛyi o wo kiya ingyi bɔkɔ Ukpo a gyi! Tetete o na kiya ingyi bɔkɔ Ukpo e so e shi mɛzhi mbala mba dɛ ishi mbo gbomo mo, 40 kwuwongu Ukpo e yi kiya ingyi esheshi ingyi ki ka ngyɛlɛ ma. E wo ɛlɛ kaa enzu mbɔlɛ mbala kinzu la ki nyɔlɔma kyaa kwuye kwunyi.