1 Kwuwo kwɔlɛ, ɛmɛnɛ mi wa mbwalu, lunyi umba bɔkɔ Ukpo e kyo a ya yi ma tete awu! La lu bi egbo iyi Ɔzhizɔsi, uwu bɔkɔ Ukpo a lɔ wu kaa lakwu Oboshi Uwakɔ uwu i kwu idu fulo iyi ki so izɔgɔ yi awu. 2 E wo iyi bɔkɔ Ukpo a lɔ wu tee le wo, kyamate Omosisi e wo iyi bɔkɔ o za wu tee le wo mu kwogba ungwu Ukpo awu. 3 Onzu uwu e mbo kwogba a ka kwogba kwɔngu igba ma. Tatayi Ɔzhizɔsi i fa tee lo shi wu igba iyi bɔkɔ i ka iyi Omosisi ma. 4 Moo kwogba ungwunanguna, onzu gba e mbo le, Ukpo gba ba e mbo ingyinangyina le. 5 Omosisi e wo ɛduma iyi umɛgba marimari mu kwogba ungwu Ukpo, kyamate bɔkɔ Ukpo e so wu te le wo awu akwɛyi e so apula iyi bɔkɔ Ukpo e be so mu keyi. 6 Okrasi ba e wo ɛduma iyi Umɛ u bɔ kwuyi mu kwogba ungwu Ukpo marimari kyamate bɔkɔ o so wu te le wo awu. Gba ki ra la eyi ifulomo nzu gbagiri akwɛyi ki wiyi mo, de ba kinzu ki kwu enzu wu.

7 Kwuwo kwɔlɛ, kyamate Kwundu uwu Ukpo e so:

Ɔnɛnɛ gba lu pwa opwu uwu Ukpo,

8 la lu koko egbo yi mo mo kyamate bɔkɔ asɔkwu yi o wo kwuyengwu o towo Ukpo mo,

kwuyengwu bɔkɔ o pwa wu ma mu ɛzhi ɛngbarara,

9 Ukpo a za mba tee mɔmɔ gba umbeteyi o pwa mi ma le,

kyo laa apula iyi mi wo leyi mbo mu lɔri uwekpendo. 10 Ɛlɛ gba i shi mi mi wo amba mbala mba le,

akwɛyi mi zɔ tee, <<O towo mi mo mu egbo mbo iyɔkpɔɔ,

akwɛyi o towo ɔkpa mi imbwaluma.>

11 Amba o wo mi mo akwɛyi mi vungɔma tee,

<O do te o fye mu riyi ingyi ɛnwugbomo mi gbee mo.>>>

12 Ɛmɛnɛ mi wa mbwalu, la lu ngbɛndu kaa lo fya ukpɛnyi meka yi uwu ingbomo mbala i towo ikwu idu lu fulo wu i shi a lafya la Ukpo ureyi mo. 13 La lu ka esu ɛnwu ma kwɔfyikwɔfyi. La lu wo ɛduma mu kapa unga lu fya <<Ɔnɛnɛ>> kaa ukpukpɛnyi yi la kɔ egbo ma mo akwɛyi e towo iso iyi Ukpo imbwaluma mo. 14 Moo kinzu ki kwu wa wo ɛduma kyaa mbala Okrasi gba ki ra la ikwu idu lu fulo iyi ki yi yi mu iyemo awu nzhii ba ibomo iyi kwuye.

15 Ɛlɛ gba kwokpo ungwu Ukpo kwu so le tee:

<<Ɔnɛnɛ, gba lu pwa opwu uwu Ukpo,

la lu towo yi mo kyamate asɔkwu yi o wo awu mo,

akwɛyi o towo Ukpo mo.>>

16 Enzu umbana bɔkɔ o pwa opwu uwu Ukpo, ba o towo wu mo? Akwu lɛɛbi umba bɔkɔ Omosisi a wa mba ma mu Izhipiti le. 17 Umbana bɔkɔ Ukpo e wo amba mbala mba nzhii ba lɔri uwekpendo? Akwu umba bɔkɔ o ngbomo akwɛyi o fu mɛzhi o kpomo mu ɛzhi ɛngbarara. 18 Umbana bɔkɔ Ukpo a vungɔma tee, <<O do te o fye mu ɛzhi iyi ɛnwu igbomo mo>>? Akwu umba bɔkɔ o towo wu mo le. 19 Kwuwo kwɔlɛ, ki ma yi gedegede tee o fɔma laa ifyemo mu ɛzhi ɛnyi kwuwongu o kwu idu lu fulo mo.