1 Kinzu ki yi azɔgɔ riba umba bɔkɔ o fula nzu ma. Kwuwo kwɔlɛ, la ki ta kiya ingyinangyina ma mbala ingbomo iyi bɔkɔ i gɔ nzu ma, kaa la ki renya iyi bɔkɔ i yi mu keyi nzu ele mu egbo ikpɛnyi. 2 La ki bɔ eyi shɛ mu Ɔzhizɔsi, uwu bɔkɔ ki kwu idu lu fulo ma wu i na mu iyemo nzhii so mu imbwama. Kwuwongwu ɔnyɛ uwu bɔkɔ e yi mu keyi wu, e yidu mu kwuwɛyi ungwu lukwu, e wo lovya undu lukwu undu bɔkɔ e be kpo mu kwuwɛyi ungwu lukwu mo, kekelele ba a ŋɔma mu kwuwo ungwungyi ungwu ukpa uwu Ukpo.

3 La lu yese inyashi iyi bɔkɔ a ma, ewo iyi bɔkɔ enzu umba ingbomo o wo anya wu! Kwuwo kwɔlɛ ɛnwu li kpo yi mo ka la lu gba kembo mo. 4 Moo mu igyakpɔɔ yi kaa la lu ingbomo mo, lu du ma inyashi iyi bɔkɔ i ka yi laa lukwu mo. 5 Lunyi lu ka la kwuleyi iyi iso iyi ɛnwu ikɔma iyi bɔkɔ Ukpo e so yi lunyi ɛmɛ wu re? A zɔ tee:

<<Umɛ mi, to yi laa ɔlu kwuyengwu bɔkɔ Ɔkwu a nɔngɔ ŋɔ ma,

uŋɔ ba ki tutu egbo mo kwuyengwu bɔkɔ e tu ŋɔ mo mo.

6 Moo Ukpo a nɔngɔ onzu uwunawuna uwu bɔkɔ e pwu idɛnyi wu,

akwɛyi e tu onzu uwunawuna uwu bɔkɔ a na wu tee akwu umɛ wu.>>

7 La lu yidu kwuyengwu ete yi a nɔngɔ yi ma; inyashi imama yi i zɔ tee Ukpo e ye yi mu iwomo kyamate ɛmɛ wu tayi. I yi umɛ wu bɔkɔ ete wu a zɔ wu rɛnu moo? 8 Akwiyi gba Ukpo a zɔ yi rɛnu kyamate ɛmɛ wu mo, de ba i zɔ tee lu kwu ɛmɛ wu shɛɛ mo, lu kwu ɛmɛ umba kaya. 9 Kinzu ki lomo laa umba ete nzu umba kwudu kwɔlɛ kwuyengwu o zɔ nzu rɛnu. I fate i yi Ete nzu uwu kwundu li ka le kaa la ki yi kwunyɔ! 10 Umba ete nzu umba kwudu kwɔlɛ o zɔ nzu rɛnu kwuye bwɛɛ tabɔkɔ i she mbo tayi; iyi Ukpo ba e wo yi kwuwongu esheshi nzu, kaa la ki yi kɛrikɛri mate uwu tayi. 11 Kwuye ungwu bɔkɔ o zɔ nzu rɛnu awu, ki pwa ofya bwɛɛ, moo akwu ɔnyɛ mo. Mizhikembo yi, umba bɔkɔ o zɔ mba rɛnu awu ba o na imuma iyi idigbomo mbala luzɛ lu toto.

12 Kwuwo kwɔlɛ la lu yi ewo yi iyi bɔkɔ i kpomo awu ma moshi, kaa la lu shi epunu yi i yi bɔkɔ i yi mu ipwulama awu ekpasu! 13 La lu so wu mu luzɛ mu ɔgwuzɛ ongbulolo, kaa umba bɔkɔ o yi ofya umba alɛ kaa lo fya ekpasu ma.

14 La lu gyakpɔɔ kaa la lu ŋɔ moloto mbala uwewe, la lu gba la lu gyakpɔɔ kaa la lu wuluma kɛrikɛri, kwuwongu i yi onzu ukpukpɛnyi tee uwu bɔkɔ a ma Ɔkwu mo gba e yi kɛrikɛri mo. 15 La lu ngbɛndu kaa onzu ukpukpɛnyi tee laa lafya la esheshi iyi Ukpo mo. La lu ngbɛndu kaa onzu ukpukpɛnyi yi le yi kyamate kwuwɛyi kwu zɛ wɔnu ungwu kwu ra laa ɛtu ngwu akwɛyi kwu tutu enzu gyɔɔ ma mo. 16 La lu ngbɛndu kaa onzu ukpukpɛnyi tee la kwu onzu uwu kaya itomo naa onzu uwu e yi Ukpo mo kyamate Isɔ tayi mo, uwu bɔkɔ kwuwongu kwugbo ungwu ɔwɛ, a ya inzumbɛkɔ wu iyi umɛ uwu kwonze ma awu. 17 Mizhikembo iyi ɛnyi, lu yitu tee, a gyi tee la na esheshi iyi ete wu; uwu ba a fya yi ma mo, kwuwongu a fya ɔgwuzɛ ukpukpɛnyi tee uwu bɔkɔ a gba laa kiya ingyi bɔkɔ e wo le inɔngɔma mo, a kpa ɛshɛku laa ɛnyɛ meyi tetete uwu ba a fya yi mo.

18 Lunyi lu bo mu lɔwa ungwu bɔkɔ o pwa ngwu afyi, mbaa bɔkɔ ɔyi u yi mu ipwumo, ipwu kpakiri mbala kwokpo, kyamate bɔkɔ Izirɛ o ka mu lɔwa undu Osinayi, 19 anu iyi kwongangaraki mbala opwu Kwuye ungwu enzu mbamba o pwa opwu ɔnwu akwɛyi o kpa ɛshɛku kaa Ukpo la gba le so mbo iso fo, 20 ✝ kwuwongu o domo kaa lo rala iso iyi bɔkɔ e so tee, <<Akwiyi gba izɔfyi lala a pwafyi mu lɔwa kwɔngu, lo kpa wu ekyi lo ngbɛ wu ma.>> 21 Omosisi mafyi wu iyi i wo wu mo gyɔɔ tabɔkɔ a ma ɛlɛ akwɛyi a zɔ tee, <<Imi mi yi mu ipwulama mbala iyi!>>

22 Lunyi ba lu bo mu Lɔwa ungwu Ɔzayɔ mbala kwuse ungwu Ukpo ureyi, mu Ɔzhɛrusalɛ uwoshi, mbala alɔgbulɔ umba Ukpo edubu guruguru o yi mu ɔnyɛ imwuma. 23 Lu bo mu ɛlu ikpalama iyi ɔnyɛ iyi umɛ ɔnzɔnu uwu kwonze uwu Ukpo, umba bɔkɔ ɛnyi mba o ka yi ma moshi. Lu bo mbaa Ukpo, uwu bɔkɔ akwu u zɔ ombu uwu enzu lɛɛbi, mbala ɛndu iyi enzu umba ototo umba bɔkɔ o wo mbo o nyɔlɔma marimari e awu. 24 Lu bo mbaa Ɔzhizɔsi, uwu bɔkɔ akwu u ta meka uwu kenzu igyirima unga epo mbala enzu, mbala mbaa ɛnzhi umba bɔkɔ o fumo bɔkɔ o siso iyi esheshi o ka ɛnzhi umba Ɛbɛlu ma awu.

25 Kwuwo kwɔlɛ, la lu ngbɛndu kaa la lu towo iso iyi onzu uwu bɔkɔ e yi mu iso isomo le mo. Enzu umba bɔkɔ o towo iso iyi onzu uwu bɔkɔ a zɛ ilɔ iyi Ukpo mu kwudu kwɔlɛ ma awu lala, o vuluma mu rinye mo. I wote bɔkɔ kinzu ki vuluma, akwiyi gba ki kpa ɔsu mu iso iyi onzu uwu bɔkɔ a wɔ moshi awu! 26 Opwu wu u wo kwudu kwɔlɛ akpa kwuye kwɔngu, kekelele ba a gyiri kenzu mo tee, <<Imi mi gba mi wo kwudu kwɔlɛ akpa kpɔ, tetete akwu ungwu kɛɛkyi ngwu fo, i kyo oshi tete ŋa.>> 27 Iso iyi i zɔ tee<<kpɔ>> awu i zɔ tee apula lɛɛbi iyi bɔkɔ Ukpo e wo yi awu, o wo yi akpa akwɛyi o ngbɛ yi ma buu, kaa apula iyi bɔkɔ o do yi akpa iwomo awu ba li rima tayi.

28 Kwuwo kwɔlɛ la ki gbɛlɛ Ukpo ɛnyi, kwuwongu ki na irɛsu iyi bɔkɔ o do yi akpa iwomo mo. La ki mwɔnyɛ kaa la ki gbo Ukpo ɔya mu ɔgwuzɛ uwu bɔkɔ u she wu, mbala ilomo mbala iyi; 29 moo Ukpo nzu akwu ɔyi uwu bɔkɔ u pwu kiya ma shɛ.