1 Moo Ukpo e so e shi mɛzhi te ki fye mu ɛnwu igbomo wu kwuwo ngwɔlɛ la ki ngbɛndu, kaa ɔnzɛnzɛnyi te la fɔma la ifyemo ma yi mo. 2 Moo kinzu tete ki pwa anu itama iyi ɛza iyeshi kyamate umba tete e. O pwa ilɔ ɛnyi, ba o ri kwule yi mo, kwuwongu o pwa yi ba o na yi mbala ikwu idu lu fulo mo. 3 Kekelele kinzu umba ki kwu idu lu fulo le gba ki fye mu ɛnwu igbomo ɛnyi le, kyamate bɔkɔ Ukpo e so tee,

<<Mi wo amba akwɛyi mi vungɔma tee:

<O fye mu riyi ingyi ɛnwu igbomo mi gbee mo!>>>

E so ɛlɛ le moo ɛduma wu lala a mbwa yi ma ngba mu iyemo iyi kwudu kwɔlɛ. 4 Moo e siso iyi afyi erewo mu kwokpo ungwu Ukpo mu riyi ingyi fo tee: <<Ɔnu uwu kwɔfyi ungworowo, ɛnwu i gbo Ukpo mo mu ɛduma wu lɛɛbi.>> 5 Iso ɛlɛ o gba ya laa isomo tee: <<O fye mu riyi ingyi ɛnwu igbomo mi gbee mo.>> 6 Enzu umba bɔkɔ o pwa ɛza iyeshi ɛnyi keyi, o fyemo mu ɛnwu igbomo ɛnyi mo, kwuwongu o kwu idu lu fulo mo. Tetete umbafo o shi mbo te lo fye kaa ɛnwu li gbo mbo mo mbala Ukpo. 7 Kwuwo kwɔngu Ukpo e shi kwɔfi kwowa ungwu ifyemo mu ɛnwu igbomo wu. <<Ɔnɛ>> gba akwu kwɔfi kwɔngu le. Mizhikembo iyi lɔri gyɔɔ e siso ɛnyi mu kenzu unga Odevidi mu iso iyi Ukpo iyi bɔkɔ o ka yi ma kpeke awu tee

<< Ɔnɛ, akwiyi ŋɔ pwa opwu uwu Ukpo,

ki towo ipwama mo.>>

8 Moo gba Ozhoshuwa e shi mbo ɛnwu igbomo iyi bɔkɔ Ukpo e siso yi e shi mɛzhi awu, Ukpo e be siso iyi kwɔfyi kwowa fo. 9 Tetete kwɔfyi ungwu ɛnwu igbomo kwu yɔmɔ laa enzu umba Ukpo kpɔ, kyamate bɔkɔ ɛnwu i gbo Ukpo ma mu kwɔfyi ungwu orowo awu.

10 Akwɛyi enzu umba bɔkɔ o fye mu ɛnwu igbomo iyi bɔkɔ Ukpo e siso yi e shi mɛzhi awu, ɛnwu ii gbo mbo mo mu ɛduma mba kyamate bɔkɔ ɛnwu i gbo Ukpo mo mu ɛduma wu tayi. 11 Kwuwongwu ɔlɛ, la ki wo ogbo nzu mo kpiri kaa la ki fyemo mu riyi ingyi ɛnwu igbomo ngyɛngyi, kaa onzu ukpukpɛnyi nzu la fɔma kaa le fye mu riyi ngyɛngyi mate umba tayi mo kwuwongu o kwu idu lu fulo mo.

12 Iso iyi Ukpo iyi la reyi, ba i yi mu ɛduma iwomo, i rimo i ka ukpandɛrɛ uwu e rimo mu ɛsu epepo yi mo, i kpolo nzhii ba mɛmi mba bɔkɔ kwunyɔ mbala kwundu i kpolo esu, laa esa laa ingyi. Iyi bɔkɔ onzu a ra yi mu egbo wu iso iyi Ukpo ii wa yi kwudu. 13 I yi kiya ingyi bɔkɔ oo nvye ngyi mo la Ukpo mo; kiya ingyinangyina bɔkɔ Ukpo e wo ki ta ndunduu meyi wu. Uwu gba ki wa kiya ingyi ɛnwu nzu i wo lɛɛbi kii shi wu le mɛga.

14 Kwuwongwu ɔlɛ, la ki rala ikwu idu lu fulo nzu iyi bɔkɔ ki so awu gbagiri. Moo ki yi Oboshi Uwakɔ uwu ekpasu, uwu bɔkɔ a ya kadu a ka mu idu iyi Ukpo Ɔzhizɔsi umɛ uwu Ukpo. 15 Moo Oboshi Uwakɔ nzu akwu uwu bɔkɔ a ma eyembembyi nzu kwuwongu ifɔma nzu. Ki yi uwu bɔkɔ o pwa wu ma mu ɛgwuzɛ riba riba mate kinzu tete ba e ngbomo mo.

16 Kwuwongu ɔlɛ laa ki turugba laa ukpa uwu Ukpo la egbo ikpɛnyi. Mɔmɔ gba kii na eyembembyi wu le, gba ki fya esheshi kaa li mbwa nzu ma kwuye ngwu ugɔ a kpa nzu ma le.