1 Iso iyi bɔkɔ o so o shi mɛzhi iyi kwonze awu i yi ɛrama yi iyi oya igbomo mbala riyi ingyi oya igbomo tete. 2 O bɔ kwunu, kwudu ungwu kunu ngwɔlɛ o ya ngwu te kizɛ kɛ kɛrikɛri. Mɛmi iyi ugu awu kambyɔyi mbala eteburu mbala koburedi ungwu oo wo rɛshi la Ukpo i yi mɔmɔ. 3 Mu izhikembo iyi eregye iyopo enyi ugu uwufo e yi mɔmɔ uwu o ya te Kizɛ Ki Ka Kɛrikɛri le. 4 Kizɛ ngyɛlɛ ki yi kwumbu ungwu isabɔ ungwu egolu ungwu o pwu apula iyi umbwɔ ferere mbala Kwokpati ungwu iso i shi mɛzhi ungwu bɔkɔ o kpa ngwu embyi umba egolu lɛɛbi mɛnwu, kwu yi ogya uwu egolu akwɛyi omana e yi mɛmi ngwu, mbala upi uwu Ɛrɔnu uwu bɔkɔ e tumo a wa la epu awu, mbala ekyi epo iyi bɔkɔ o ka ɛrama iyi Omosisi ma yi awu. 5 Ashɛrɔbi umba bɔkɔ akwu inzumbɛku iyi Ukpo le o yi mu kadu unga Kokpakyi kwɔngu, ekowo mbo ba i koko riyi ingyi bɔkɔ oo gba la ingbomo oo kpa awu. Kekelele ba kwuyengwu bɔkɔ ki so iso ɛlɛ ma marimari kwu yi mo.

6 Kwuye ungwu o mbwa iyinayina inɔngɔma ma, akwɛyi ebwoshi o koko o fyemo mɛmi iyi kunu ungwu kwudu kaa lo wo ɛduma mba, 7 ba Oboshi Uwakɔ awu kɛɛkyi gba e fyemo mu Kunu ungwɛmi kwɔngu le, ba e fyemo mangwu izhɛnyi kari. Aa za la ɛnzhi umba isabɔ iwomo lɛwu mbala umba ingbomo iyi enzu lɛɛbi, ikyo ingbomo iyi enzu o wo ba akwu mu iyitu mbo mo. 8 Mu iwomo ɛlɛ te, Kwundu uwu Ukpo e yi mu enzu izɔma gedegede tee ɔgwuzɛ uwu o fye mu Riyi Ingyi Ri Ka Kɛrikɛri le o do wu wu ma mo mate bɔkɔ Kwunu ungwu kwudu kwu degbo bɛnɛ le. 9 Apula ɛnyi kpɛkpɛyi akwu mate kwuwo izɔma mu iyi kwuyengwu kekelele. I zɔ tee rɛshi mbala isabɔ iyi izɔfyi iyi bɔkɔ eboshi o wo awu i do tee i gbɔ egbo iyi enzu umba bɔkɔ oo gbo oya ma sɛsɛ mo, 10 moo ɛrama ɛnyi akwu meka iyi kiya irimo mbala embyi iwomo byi mbala ɛgwuzɛ ikikɔ ikikɔ iyi bɔkɔ enzu o wulu ɛmba ma. Ɛrama ɛnyi akwu kwuwongu apula iyi kwudu byi ba i yɔmɔ i rigbo kwuyengwu bɔkɔ Ukpo a ba nyɔ laa apula iyepo.

11 Okrasi ba e bo-o kaa la kwu Oboshi uwakɔ meka iyi apula iyeshi iyi bɔkɔ i yi ee awu. Kwunu ungwu bɔkɔ e wo ɛduma kwu ka inzumbɛku le, kwu gba kwu shiri le; kwunu kwɔlɛ o mbo mu ewo iyi onzu mo, iyi bɔkɔ mi so gba i yi tee, kwu kyo mbala kwudu kwɔlɛ ungwu o ndo kwondo ngwu ele mo. 12 Kwuye ungwu bɔkɔ Okrasi a zɛ mu kwunu akwɛyi e fye mu Riyi Ingyi Ri Ka Kɛrikɛri le awu, e fye izhɛnyi bi ba iyɔkpɔɔ ba ɔkpɔɔ, e wo ɛduma mu ɛnzhi umba ɛmu mbala endo kaa le wo isabɔ mo; uwu ba e wo ɛduma mu ɛnzhi wu akwɛyi e shi nzu isama iyɔkpɔɔ ba ɔkpɔɔ. 13 Ɛnzhii umba ɛmu mbala umba endo anu mba mbala kwulɔ ungwu umɛ uwu endo akwɛyi obwoshi ee kpo ngwu mu ɛnwu iyi enzu umba bɔkɔ o wuluma mo kaa lo wulu mba ma mu apula iyi bɔkɔ i shi mbo o wuluma mo awu. 14 Kwuwongwu bɔkɔ te gba i yi le awu, i zɔ te ɛnzhi umba Okrasi o ka ekpasu laa umba ɛmu mbala endo mo! Mu ekpasu iyi Kwundu uwu Ukpo, Okrasi e shi ɛnwu laa Ukpo kaa lakwu isabɔ iyi i ka le. Ɛnzhii wu o gbɔ egbo nzu mo mu apula iyi umbwa kaa la ki gbo Ukpo uwɔkpɔɔ ɔya.

15 Kwuwo kwɔlɛ Okrasi gba a nɔngɔ kenzu igyirima unga epo le, kaa enzu umba Ukpo a ya mba ma oo fya esheshi iyɔkpɔɔ iyi bɔkɔ e wo mbo. Moo Okrasi e kpomo kaa la wa mba ma mu rinye igbomo ingyi ingbomo iyi bɔkɔ umba o wo kwuyengwu kenzu igyirima iyi kwonze i yi awu.

16 Mɛka iyi iso iyi ogu uwu apula iyi ukpɛzhi, akwu mega tee onzu uwu e so yi awu e kpomo dɛ, 17 moo iso ɛnyi iyi ekpasu mo akwiyi gba onzu uwu e so yi e degbo la kwunyɔ bɛnɛ; iso ɛnyi iyi ekpasu mu izhikembo iyi lukwu undu onzu awu. 18 Akwu kwuwo kwɔlɛ gba kenzu igyirima unga kwonze kanga lala ke yi ekpasu mu ɛnzhi kɛɛkyi le.

19 Iyi kwonze, Omosisi a wa ɛrama ma la enzu lɛɛbi mate bɔkɔ a ka yi ma awu. Akwɛyi e to ɛnzhi umba ɔgbɛbɛ uwu endo ɔnumba mbala ɛmu, akwɛyi a vyi mba ma mbala embyi, akwɛyi a fya mba mu kwokpo ungwu ɛrama akwɛyi a vyɛ enzu ma lɛɛbi, ee wo ɛduma mu epu iyi bɔkɔ o ya yi te isopu mbala inyi ifyobyo iyi ilɔ. 20 Omosisi a za la enzu tee, <<Ɛnzhii mbɔlɛ gba o ma nzu ma mbala kenzu igyirima unga bɔkɔ Ukpo a zɔ te la lu mbwalu le awu.>>

21 Tatayi gba Omosisi tete a fya ɛnzhi mu Kunu ungwu Ukpo mbala apula iyinayina iyi bɔkɔ o wo ɛduma ma yi kwuyengwu ɔya igbomo le. 22 Tayi gba i yi le, ɛrama iyi Omosisi i zɔ te kiya ingyinangyina o wulu ngyi ma mu ɛnzhi, gba o fu ɛnzhi ma mo Ukpo a gbala ingbomo a kpa mo.

23 Apula ɛnyi iyi bɔkɔ akwu u wɔ uwu apula iyoshi ireyi awu, akwu mega te lo wulu yi ma mu ɛnzhi umba izɔfyi. Apula iyoshi ɛnyi mafyi yi ba isabɔ yi i koshi la ɛlɛ gba i gyi le. 24 Moo Okrasi e fye mu Kizɛ kɛ Kɛrikɛri ingyi bɔkɔ enzu o mbo le mo, kizɛ ingyi bɔkɔ ki kwu u wɔ uwu kizɛ kireyi. Ɔzhizɔsi e fye moshi shɛ, mbaa bɔkɔ kekelele a ri midu iyi Ukpo kwuwo nzu. 25 Obwoshi uwu Ukpo uwakɔ uwu Azhu e fye mu Riyi Ingyi Ri Ka Kɛrikɛri le kari kari la ɛnzhi umba izɔfyi. Okrasi ba e fye mɔmɔ kaa la ra la ɛwu le shi izhi riba riba mo, 26 moo lakwu tayi de ba Okrasi la ba ma inyashi izhi riba riba ngbaa te bɔkɔ o wo kwudu kwɔlɛ awu. Okrasi kekelele ba, a wɔ izhɛnyi kɛɛkyi mu imbwama iyi ɔyi lɛɛbi kaa le to ingbomo mo mu isabɔ iyi ɛnwu iyi bɔkɔ e shi. 27 Onzu uwunawuna e kpomo izhɛnyi, mizhikembo iyi ɛnyi akwɛyi Ukpo ee fu wu ombu. 28 Tatayi Okrasi tete a ra lɛnwu wu e wo isabɔ izhɛnyi kaa le to ingbomo iyi enzu gyɔɔ ma le. Aa gba a nyɔ ungwopo, akwu tee kaa le to ingbomo ma mo, ba a nyɔ kaa la sa enzu umba bɔkɔ o rigbo wu awu ma.