1 O ŋa obwoshi uwakɔ uwunawuna meka iyi enzu wu ba o to wu kaa la kwu u bɔ kwuzu uwu enzu wu mu ɛduma iyi Ukpo i womo, kaa le wo isabɔ mbala rɛshi kwuwongu ingbomo mbo. 2 Mate uwu mafyi wu e kpɔfɔ mu ɛgwuzɛ riba riba awu, a zɛ bɛtɛ mbala enzu umba bɔkɔ o ngbomo ba o yitu te o ngbomo mo. 3 Akwu kwuwongu ikpɔfɔ wu gba a nya la kiya ingyi isabɔ ingya wu mbala ingyi enzu tete le. 4 I yi onzu uwu bɔkɔ e to inzumbɛku ɛnyi la ɛnwu wu kaa la kwu obwoshi uwakɔ mo; Ukpo kɛɛkyi wu gba a ŋa wu le mate bɔkɔ a ŋa Ɛrɔnu awu. 5 Tatayi Okrasi e to inzumbɛku iyi obwoshi uwakɔ e fulo ɛnwu wu mo, Tetete, Ukpo a za wu te,

<<Uŋɔ ŋɔ kwu Umɛ mi;

ɔnɛnɛ mi kwu Ada ŋa.>>

6 A gba zɔ mu riyi ingyi fo tee,

<<Uŋɔ ŋɔɔ kwu obwoshi uwɔkpɔɔ,

kyamate Ɔmɛkizɛdɛ tayi.>>

7 Kwuye ungwu bɔkɔ Ɔzhizɔsi e yi mu kwudu kwɔlɛ awu a lɛ Ukpo la oga ilomo gbɔrɔrɔ la Ukpo, uwu bɔkɔ a sa wu ma mu lukwu. Kwuwongwu uwu a gyi ɛnwu wu ma ba ewo iyi bɔkɔ Ukpo a gyi, Ukpo ba a pwa wu. 8 Uwu uwu bɔkɔ akwu Umɛ uwu Ukpo lala, a ma inyashi dɛ gba a vɔngɔ ilomo le. 9 Kwuye ungwu bɔkɔ Ukpo e shi wu a mbwa ɛduma wu ma, akwɛyi e shi wu akwu undu uwu isama la enzu umba bɔkɔ o lo wu mo lɛɛbi. 10 Akwɛyi Ukpo a ya wu te obwoshi uwakɔ mate Ɔmɛkizɛdɛ tayi.

11 Ki yi apula gyɔɔ iyi bɔkɔ ki gyi la ki so mu iso ɛlɛ, ba ikɔma ka la ki so yi yi, moo lu zɔngɔma kiya ma efya mo.

12 Ta kekelele te ishoshi te ka la lu kwu wazɔkiya ŋa, ɔbulɛ lu gyi te onzu la zɔ yi igwumo iyi iso iyi Ukpo kpɔ. Ifate kaa la lu ri ɔwɛ ŋa ba lu wo kwɔmɛ bɛnɛ. 13 Onzu uwunawuna uwu bɔkɔ e wo kwɔmɛ akwu umɛ uwelu bɛnɛ, e yitu iyi ikikɔ iyeshi mbala iyira-a mo.

14 Ɔwɛ ba akwu kwuwongu enzu umba bɔkɔ o kɔma-a, umba bɔkɔ mu ivɔngɔma mba kwɔfyi kwɔyi, o da iyeshi mbala iyira ma.