1 Ɛmɛnɛ mi, lunyi umba bɔkɔ lu kwidu lu fulo mu Ɔkwu nzu Ɔzhizɔsi Okrasi uwu inzumbɛku awu, la lu zɔ kusɛ mo. 2 Akwiyi gba enzu wepo o bo mbaa ɛlu ikpalama yi, akwɛyi ukpɛnyi mba e lo karika unga egolu mbala ekpayi iyi abwa, akwɛyi uwufo ba akwu ɔyirewa uwu bɔkɔ e lo ashɔgiri e kyo e fyemo tete. 3 Akwɛyi lu yese mbaa onzu uwu bɔkɔ e lo ekpayi iyi abwa awu akwɛyi lu za wu te, <<Bo kaa ŋɔ mu kagyi ungeshi kɛlɛ te, <<Ɔyirewa awu ba lu za wu te, <<Uŋɔ ri tayi>> mo de ba <<Ŋɔma mɛzhi mbaa alɛ mi te,>> 4 Gba lu wo tayi, lu zɔ kusɛ meka yi akwɛyi lu zɔ ombu la egbo iyira.

5 La lu ngbɛ kwɔlu kaa la lu pwa ɛmɛnɛ mi, Ukpo a ŋa ayirewa umba kwudu kwɔlɛ kaa lo kwu enzu umbakwu kwuwongu o mbwalu Ɔzhizɔsi kaa lo ri ogu uwu ɛzhi iyi bɔkɔ e so te e shi umba bɔkɔ o pwu idɛnyi wu mo? 6 Lunyi ba lu kpo ayirewa eseye. Akwu enzu umbakwu mbɔlɛ gba o kpa yi ata le mo re? Akwu umba gba o pyipyi yi o ka mbaa ombu le mo re? 7 Akwu umba gba o so iyira iyi Ɔzhizɔsi uwayi awu le mo re?

8 Akwiyi gba lu mbwalu ɛrama iyi Ada Ɔsu Ukpo iyi bɔkɔ o ka mu kwokpo ungwu Ukpo te, <<Pwidɛnyi iyi onzu unɔ kpaŋa kyamate ɛnwu ŋɔ te.>> Gba lu wo tayi de ba lu wo ɔnyɛ. 9 Akwiyi gba lu zɔ kusɛ, de ba lu ngbomo-o, Ukpo ba e yi yi ombu kwuwongu lu fo ɛrama wu ma. 10 Gba onzu a mbwalu ɛrama iyi Ukpo lɛɛbi ba e fo ikpɛnyi ma, i zɔ te e fo yi mo lɛɛbi ma. 11 Mo Ukpo uwu bɔkɔ a zɔ te <<Lo to kaya mo le>> uwu gba a zɔ te <<Lo ngbɛ onzu mo tete le.>> Gba ŋɔ to kaya mo ba ŋɔ ngbɛ onzu, de ba ŋɔ kwu u fo ɛrama ma mo.

12 Iso isomo mbala iwomo yi li yi mate enzu umba bɔkɔ Ukpa a ba zɔ mba ombwu mu ɛrama iyi i wanzu ma tayi. 13 Ɔnu uwu ombu izɔma, Ukpo a ma eyembembyi iyi onzu uwu bɔkɔ a ma eyembembyi iyi enzu, moo eyembembyi i ka ombwu mo.

14 Ɛmɛnɛ mi akwiyi gba onzu a zɔ te e yi ikwu idu lu fulo ba e yi ɛduma iyeshi mo, esheshi yi ba akwu mbɛ? Ikwidufulo wu ɛnyi i do wu isama? 15 Akwiyi gba ugɔ uwu okpayi mbala uwu kiya ingyirimo a kpa *umɛnɛ ɔnzɔnu naa okokpayi ma, 16 akwɛyi onzu uwufo a za wu te, <<So moloto Ukpo le shi ŋɔ ekpayi mbala kiya ingyirimo ingyi bɔkɔ ŋɔ gyi awu,>> ba e wo kinyinyi kaa la sa wu ugɔ awu ma mo, a mbwa wu ma mungye? 17 Tegba ikwu idu lu fulo i yi le, akwiyi gba i kyo mbala ɛduma mo i yi kyamate ukpɛzhi uwu onzu tayi.

18 Onzu uwufo ba aa zɔ te, <<Uŋɔ ŋɔ yi ikwu idu lu fulo imi ba mi yi ɛduma.>>

Zɔ mi ɛduma ŋa iyi bɔkɔ i kyo mbala ikwu idu lu fulo mo akwɛyi imi ba mi zɔ ŋɔ ɛduma mi iyi mi wo mbala ikwu idu lu fulo mi. 19 Ŋɔ nyama te Ukpo akwu ukpɛnyi? Ee te gba i yi le! Eyo umbeyi lala o nyama tete ba o pulama kwuwongu o wiyi.

20 Uŋɔ orondo ele, o zɔ ŋɔ dɛ gba ŋɔ yitu te ikwu idu lu fulo iyi bɔkɔ iyi ɛduma mo akwu shaa bi le? 21 Usɔkwu nzu Aburamu kɔ, o ma ototo wu kwuwongu ɛduma iyi bɔkɔ e wo bɔkɔ a ra la umɛ wu Aziki e shi rɛshi mu kwumbwu ungwu isabɔ awu mo re? 22 Ŋɔ ma, ikwu idu fulo wu mbala ɛduma wu bɔkɔ i zɛ kya, akwɛyi ikwu idu fulo wu ba i nyɔlɔma kwuwongu ɛduma iyi bɔkɔ e wo. 23 Kwokpo ungwu Ukpo ba kwu nyɔlɔ ma bɔkɔ kwu zɔ te, <<Aburamu e kwidu e fulo mu Ukpo, akwɛyi Ukpo ba a wa wu te akwu onzu uwu ototo,>> akwɛyi Ukpo a ya wu te, <<Umɛza mi>>. 24 Kekelele i zɔ te, onzu akwu ototo kwuwongu ikwu idu fulo kɛɛkyi mo, i kyo ɛduma tete. 25 Tatayi gba i yi le, Orahabu u to kaya awu o ya wu te onzu ototo kwuwongu ɛduma iyi bɔkɔ e wo bɔkɔ e shi riyi oga la enzu umba Izirɛ bɔkɔ o wɔ o bo o ŋanda kizɛ awu ma akwɛyi ba e shi mbo o kama mu ɔgwuzɛ owa awu. 26 Kyamate ɛnwu iyi bɔkɔ i yi kwundu mo akwu ukpɛzhi uwu kiya awu, tatayi gba ikwu idu fulo iyi bɔkɔ iyi ɛduma mo i yi le.