1 Ɛmɛ umba ɛnɛ mi, lunyi lu yitu tee ibomo nzu mbaa yi akwu shaa mo.

2 Lunyi lu yitu iyi inyashi iyi ki ma mbala ari iyi o kpanzu mu Ofilipayi dɛ ishi ki bi ka mbaa yi mu Otesalonika le. Enzu o towo nzu mo gyɔɔ, tetete Ukpo a ka nzu ɛnwu ma kaa la ki so yi Iso Iyesheshi ɛnyi iyi bɔkɔ i ngyi munyi wu awu. 3 Moo ɛshɛku iyi ki kpa yi ele i ngyi meka iyi iŋama nana egbo iyira nana ki gyi tee la ki kyoro yi mo le mo. 4 Kinzu ba ki so iyi bɔkɔ Ukpo a gyi tee la ki so iyɔkpɔɔ, moo uwu a nyama la nzu akwɛyi e to Ilɔ Iyesheshi ɛlɛ e shi nzu.Kinzu ki wo ɛlɛ kaa la ki she laa Ukpo uwu bɔkɔ a pwa egbo nzu ma awu, moo akwu enzu gba ki gyi tee la ki she mbo le mo. 5 Lunyi lu yitu tee kinzu bo munyi yi laa iso iyi inyima kaa la ki fya kiya munyi yi le mo, nana ki kpo yi ewo meyi kaa la ki nvye ekweyi nzu ma mo, Ukpo gba akwu u uzɔgɔ nzu le! 6 Kinzu ki gagyi ipwɔma mbaa onzu uwunawuna mo, munyi yi nana mbaa enzu mbawa mo, 7 moo tabɔkɔ ki kwu wa zɛ ilɔ umba Okrasi le, ki yi ɛkpasu iyi ki gagyi kiya mu munyi yi. Kinzu ba ki yi kyo kwuyengwu ki yi mbala yi awu, mate ɛnɛ a bɔ eyi mbaa umɛ wu tayi. 8 Kinzu ki pwu idɛnyi yi gyɔɔ, inyi gba i shi ki mwɔnyɛ tee la ki shi yi Ilɔ Iyesheshi iyi i ngyi mbaa Ukpo le. Akwu ɛlɛ kɛɛkyi mo, ki kyo kwunyɔ nzu tete kwuwongu lunyi lu yi mu egbo nzu gyɔɔ! 9 Ɛmɛ umba ɛnɛ mi, lu lolo ɛduma iyi ki wo mbala inyashi iyi ki ma kwuyengwu bɔkɔ ki ye yi mu Ilɔ Iyesheshi iyi Ukpo izɛma awu! Kinzu ki wo ɛduma lutu lɔnu kaka kaa la ki fulo ɔnzɛnzɛnyi te ewulo mo.

10 Lunyi lu kwu azɔgɔ, Ukpo tete akwu u uzɔgɔ tee luzɛ undu ki zɛ mekeka yi lunyi wambalu lɛɛbi akwu luzɛ undu ɔsɛsɛ mbala ongbulolo ɔsɛkɛnɛ. 11 Lunyi lu yitu tee ki wo mbala yi kɛnyikɛnyi kyamate ada e wo mbala ɛmɛ wu tayi. 12 Ki ka yi ɛnwu ma, ki so yi iso iyi idu igbomo, ba ki so yi iso ngiri tee, la lu zɛ luzɛ marimari undu bɔkɔ lu she laa Ukpo uwu bɔkɔ a ya yi ma kaa la lu yi ogbo mu Irɛsu wu mbala inzumbɛku wu awu.

13 Kwuwo kwɔlɛ, ki gbɛlɛ Ukpo ɛnyi iyɔkpɔɔ, moo kwuyengwu bɔkɔ ki ka yi laa ɛlɔgbulɔ iyi Ukpo awu, lu na yi tee akwu iso iyi Ukpo, moo akwiyi onzu mo. Moo Ukpo e yi mu ɛduma iwomo ma yi lunyi umba bɔkɔ lu kwu idu lu fulo. 14 Ɛmɛ umba ɛnɛ mi, lunyi lu ma la Ɛshɔshi iyi Ukpo iyi bɔkɔ iyi mu Ozhudiya, so mbaa enzu umba bɔkɔ akwu umba Okrasi Ɔzhizɔsi. Lunyi lu ma inyashi kyamate Azhu ɛmanyi yi umba o lo mbo tayi, 15 Enzu mbamba ɔ ngbɛ Ɔzhizɔsi Okrasi mbala Anukenzu umba Ukpo ma akwɛyi o ra nzu renya. O she la Ukpo mo ba o wo enzu lɛɛbi ira 16 o wo te kaa la ki lafya la iso isomo la enzu umba bɔkɔ akwu Azhu mo kwuwongu kaa lo sa mba ma mo. Mu iwomo mbo ɛlɛ, ingbomo mbo ikyomo gyɔɔ akwɛyi amba umba Ukpo o kpo mamba.

17 Ɛmɛmbɛnɛ mi kwuye bwɛ ungwu bɔkɔ o ka nzu ma mbala yi, egbo nzu ba i yi mbala yi. Kwongwu ki gyi te la ki ma yi, akwɛyi ki wo ekpasu gyɔɔ te la ki gba la ki bo munyi yi. 18 Ki gyi te la ki bo munyi yi. Imi Ɔpɔlu mi wo ba mi wo, onzu uwoyi ba ese nzu ɔgwuzɛ ma. 19 Kimbe bɔkɔ akwu eyifulomo nzu, ɔnyɛ nzu, naa ɛnuma nzu iyi bɔkɔ oo shi nzu inzumbɛku midu iyi Ɔkwu Ɔzhizɔsi kwuyengwu bɔkɔ a gbama? A kwu lunyi mo re? 20 Lunyi gba lu kwu ɛnwu ikwumo nzu mbala ɔnyɛ nzu le.