1 Kwuwo kwɔlɛ, ikama nzu mbala yi akwɛyi ki mate i shi woshi gba o lunzu afyima mu Atɛsi kɛɛkyi nzu. 2 Akwɛyi ki lɔ Umanyi nzu Otimoti uwu ki wo ɛduma iyi anu itama iyi Ukpo iyi Okrasi kyaa awu te la kɔ yi ɛnwu ma kaa la lu rima gbagiri mu Ɔzhizɔsi imbwaluma, 3 kaa uwewe la gba kembo mu Ɔzhizɔsi imbwaluma kwuwongu inyashi iyi lu yi mu imama le mo. Lunyi mafyi yi lu yitu te akwu igyima iyi Ukpo te la ki ma inyashi ɛlɛ. 4 Mo kwuyengwu bɔkɔ ki yi mbala yi awu, ki za yi keyi dɛ te enzu o lo nzu inyashi, ba tegba i wɔ le yɛriri mate bɔkɔ lu yitu awu. 5 Kwuwo ngwɔlɛ, bɔkɔ mi fa la idu iyimo akwɛyi mi lɔ Otimoti mbaa yi kaa la mi yitu iyi idukwufulo yi mu Ɔzhizɔsi. Mo kinzu ki wiyi te, ingboshimo onzu uwoyi ele e kyoro yi mo akwɛyi lu lafya la Ɔzhizɔsi imbwaluma-a, akwɛyi ba ɛduma iyi bɔkɔ ki wo meka yi ele akwiyi umbwa.

6 Otimoti uwu a ka munyi yi awu, kekelele ba a gbama a ka nzu la ilɔ iyesheshi te lu degbo lu ra la Ɔzhizɔsi mu akɔ yi. A za nzu kpɔ te lu koko lu lolo mbaa nzu la ɔnyɛ ba lu fa te ɔnuna lu ma nzu, kyamate bɔkɔ kinzu tete ki fa te ɔnuna ki ma yi awu. 7 Kwuwo kwɔlɛ ɛmɛnɛ mi, mu inyashi iyi bɔkɔ enzu o ye nzu mu ilomo le, iso ɛlɛ i ka nzu ɛnwu ma kwuwongu ki pwa te lu degbo mu idu i fulomo mu Ɔzhizɔsi. 8 Kekelele egbo nzu i yi mɛzhi ee la ɔnyɛ kwuwongu ki yitu te lu rima gbagiri mu iso iyi Ɔzhizɔsi. 9 Kwuye ungwu ki lɛ Ukpo, ki gbɛlɛ Ukpo ɛnyi gyɔɔ kwuwongu lu shi egbo nzu i yi ɔnyɛ. 10 Utu la ɔnu kii lɛ Ukpo iyɛkɔkɔ kaa le shi nzu kaa la ki ma yi, kaa la ki zɔ yi ɛzu iyi bɔkɔ ishoshi te la lu yitu yi kaa idu kwu fulo yi mu Ɔzhizɔsi li kɔma li kyo. 11 Kwuwo kwɔlɛ, ki lɛ Ukpo uwu bɔkɔ akwu ete nzu awu mbala Ɔzhizɔsi Ɔkwu nzu te lɛ wo ɔgwuzɛ kaa la ki gba la ki bo mbaa yi. 12 Ki lɛ Ukpo Ɔkwu nzu Ɔzhizɔsi te le shi igyi esu iya yi mbala uwewe li kyomo gyɔɔ kyamate bɔkɔ igyima iya yi mu akɔ nzu i yi awu. 13 Kii lɛ Ukpo te la kɔ yi egbo ma mu Ɔzhizɔsi kaa Ukpo ete nzu le yi yi ombu mo ɔnuwu ombu izɔma akwɛyi a mu ɔnyɛ mbala yi kwuyengwu bɔkɔ Ɔzhizɔsi a ba gbama mbala enzu wu umba Ɔkɛrikɛri.