1 Ɛmɛnɛ mi, iso iyi kwuye mbala afyi iyi igbama iyi Ɔkwu nzu Ɔzhizɔsi Okrasi, i fa te lɔ zɔ yi izɔma fo, 2 moo lunyi lu yitu sɛsɛsɛ te igbama iyi Ɔkwu nzu, Ɔzhizɔsi Okrasi mu kwudu kwɔlɛ i ŋii yi kyamate uwɛlɔ bɔkɔ e fye mogba uwu onzu mutu tayi. 3 Kwuye kwɔngu enzu o ma badaa akwɛyi o le mu isomo te, <<Egbo egidigidi iyinayina i yi fo>> akwɛyi kporo inyashi i du mbo kyamate kwomba bɔkɔ kwu yi oko uwu rifo mo tayi, onzu uwu a vuluma ba e yi mo.

4 Ɛmɛnɛ mi, lunyi ba lu yi mu ipu tee, kwɔfyi kwɔngu kwu-u du yi kporo, kyamate uwɛlɔ bɔkɔ e bo mutu tayi mo. 5 Lunyi lɛɛbi lu kwu enzu umba ɛbɛ mbala ɔnɔnda, lu kwu ɛmɛ umba utu mbala ipwu mo. 6 Kwuwo ngwɔlɛ, kinzu la ki yi mate umbafo bɔkɔ o yi mu ondo ikpolomo awu mo. la ki yi ɛnwu nzu ma, la ki kyo ki ngbɛndu, 7 mo mutu gba enzu o kpondo le, mutu tete gba o wo atɛ gba o yi mbomo le. 8 Kinzu ba ki kwu enzu umba ɔnɔnda awu, la ki yi ɛnwu nzu ma. La ki ra la ikwu idu fulo nzu mbala idɛnyi nzu kyamate kwɔkpata tayi, mbala eyifulomo iyi isama nzu mbala kwokata ungwu kwoso. 9 Ukpo a ŋa nzu te ka le lo nzu inyashi mo. A ŋa nzu ka la ki fya isama mba Ɔkwu nzu, Ɔzhizɔsi Okrasi. 10 Ɔzhizɔsi e kpomo kwuwo nzu kaka ka, kwuyengwu a ba gbama awu, akwu wa mbwalu wu umba bɔkɔ o kpomo o mbala umba bɔkɔ o degbo la reyi e re mbo moshi ka la ki ŋɔ mbala wu ɔkpɔ bɔ ɔkpɔ. 11 Kwuwo ngwɔlɛ, la lu kyakpɔ mu esu ɛnwu ikama, la lu mbwala esu ma kyamate lu yi mu iwomo awu.

12 Ɛmɛnɛ mi, ishoshi te wa to keyi yi umba bɔkɔ ɔ zɔ yi ɔgwuzɛ uwu Ukpo mu ɛshɔshi awu, la lu lo mbo mo. 13 La lu to mbo la ɔlu kwuwongu ɛduma iyi o wo mekeka yi. La lu ŋɔ moloto mbala esu. 14 Ɛmɛnɛ mi, ki so yi te, umba bɔkɔ akwu akyɔbwɔ mekeka yi, la lu tu mbo mo, umba bɔkɔ o wiyi, la lu kamba ɛnwu ma, umba bɔkɔ o yi ekpasu mo, ba la lu mbwamba ma. La lu yidu mbala uwewe. 15 Onzu uwunawuna uwu bɔkɔ o wo wu ira, la wakusa mo. La lu wo iyeshi iyɔkpɔɔ mbala esu mbala onzu uwunawuna.

16 La lu koko lu mwɔnyɛ iyɔkpɔɔ, 17 la lu lɛ Ukpo kwuye ngwunangwuna, 18 kiya ingyinangyina ingyi ki du yi, la lu gbɛlɛ Ukpo ɛnyi, mo apula ɛlɛ lɛɛbi gba Ukpo a gyi te li wo le mu ɛnyi iyi Ɔzhizɔsi Okrasi.

19 La lu nyi Kwundu uwu Ukpo ɛduma iwomo ma yi mo, 20 la lu zhi ɛlɔgbulɔ iyi Ukpo ma mo, 21 tetete la lu mondo iyinayina ma dɛ,, kaa la lu ra la iyi bɔkɔ akwu iyeshi. 22 Ira iyinayina, la lu to yi mo.

23 Ki lɛ Ukpo, uwu bɔkɔ akwu ɔkwu uwu e shi iŋɔma iyolotu awu te, la wuluyi ma sɛsɛsɛ. U wu le shi kwundu yi mbala ɛnwu yi ekpasu ka li ŋɔ sɛsɛsɛ nzhii ba ɔnuwu bɔkɔ Ɔkwu nzu, Ɔzhizɔsi Okrasi a ba gbama mu kwudu kwɔlɛ. 24 Edego-ala uwu bɔkɔ a ya yi ma le, e wo yimo, mo uwu akwu Ukpo uwu ɔ wɛ kwɔlɛ mawu.

25 Ɛmɛnɛ mi, lunyi tete la lu lɛ Ukpo kwuwo nzu. 26 La lu gbɛlɛ ɛmɛnɛ lɛɛbi ɛnyi, la lu kpa esu idu. 27 Mi gyite la lu wa kwupwu kwɔlɛ ma la ɛmɛnɛ lɛɛbi mu idomo iyi Ɔkwu. 28 Ki lɛ Ukpo te ka esheshi iyi Ɔkwu nzu, Ɔzhizɔsi Okrasi li yi mbala yi lɛɛbi.