1 Imi Ɔpɔlu, mbala Osalasi mbala Otimoti gba ki ka yi kwupu kwɔlɛ le,

Lunyi enzu umba ɔshɔshi uwu Otesalonika, umba bɔkɔ lu kwu enzu umba Ukpo Ete nzu mbala Ɔkwu nzu, Ɔzhizɔsi Okrasi:

Esheshi mbala oloto li yi mbala yi.

2 Kinzu ki gbɛlɛ Ukpo ɛnyi kwuwo yi lɛɛbi iyɔkpɔɔ, ki koko ki lolo yi kwuyengwunanguna bɔkɔ ki lɛ Ukpo. 3 Ɛduma iyi bɔkɔ lu wo kwuwongu ikwu idu lu fulo yi, mbala idɛnyi iyi lu yi yi, mbala idu iyi lu yi yi kwuwongu lu yi eyifulomo mu Ɔkwu nzu, Ɔzhizɔsi Okrasi iyi bɔkɔ i shi lu rima ngiri awu, i shi ki lolo yi iyɔkpɔɔ mu idu iyi Ukpo nzu mbala Ete nzu. 4 Ɛmɛnɛ mi, kinzu ki yitu te Ukpo e pwu idɛnyi yi gba a ŋa yi te la lu kwu umba wu le. 5 Moo ki ka yi la Iso Iyi esheshi ɛlɛ mu iso iyi kenzu bi mo, i kyo mbala ɛkpasu, mbala Kwundu uwu Ukpo, mbala inyama yi la egbo ikpɛnyi te inyi gba akwu ongbulolo le. Lunyi lu yitu iyi iŋɔma iyi ki ŋɔ mbala yi; akwu kaka kaa li mbwa yi ma le. 6 Lunyi lu mondo nzu mbala Ɔkwu; lu ma inyashi gyɔɔ, tetete lu na rɛnu ingyi Ukpo ma la ɔnyɛ uwu bɔkɔ ee ngyi mbaa Kwundu uwu Ukpo awu. 7 Ɛlɛ gba i shi Wa mbwalu lɛɛbi mu ese iyi Omasedoniya mbala Akaya o vɔngɔ luzɛ yi le. 8 Moo iso iyi Ɔkwu ɛlɛ iyi lu ta anu yi ele i fulama munamuna mu ese iyi Omasedoniya mbala Akaya, akwu ɛlɛ kɛɛkyi mo, ɛza iyayi iyi ikwu idu lu fulo mu Ukpo i fulama munamuna tete. Kwuwo kwɔlɛ, ki yi iso iyi isomo ma yi fo. 9 Moo enzu mbamba mafyimba o so uwewe ewo iyi lu na nzu kwuyengwu ki ka mbaa yi awu, o kyo ɔ zɔ te lu lafya la eshi ibyima lu mbwalu Ukpo, kaa la lu gbo ɔya laa Ukpo ongbulolo ureyi ŋa, 10 kaa la lu rigbo igbama iyi Umɛ wu moshi, Umɛ wu Ɔzhizɔsi, uwu Ukpo e yi wu mo mu kwuvɔ, uwu a wanzu ma mu amba umba Ukpo umba o yi mu inyɔma awu.