1 Mu imbwama yi, ɛmɛnɛ mi lunyi la lu vɔngɔ mba nzu luzɛ undu lu zɛ kaa la lu she la Ukpo. Inyi gba akwu ɔgwuzɛ uwu bɔkɔ lu yi ma wu awu. Kekelele ki kpayi ɛshɛku mu ɛnyi iyi Ɔkwu Ɔzhizɔsi kaa la lu wo iyi bɔkɔ ika tayi ma. 2 Kwuwongwu lunyi lu yitu te ɛzɔ iyi ki zɔ yi awu akwu mu idomo iyi Ɔkwu Ɔzhizɔsi.

3 Ukpo a gyite kaa la lu yi kɛrikɛri: La lu lafya la iyama. 4 onzonzu le gbo ɛnwu wu baa ekweyi iyi iyama, la lu wuluma kɛrikɛri kaa enzu lo ma te lu kwu enzu umba esheshi. 5 Lunyi la lu wo kwupapa iyi iyama mo kyamate enzu umba bɔkɔ o yi Ukpo mo, 6 meka iyi iso ɛlɛ gba Ukpo a gyite onzu uwunawuna le ngbomo la umanyi wu mo le. Onzu uwunawuna ba le ri utu uwu umanyi wu mo. Ki so yi dɛɛ, ki gba ki so yi kpɔ te, enzu umba bɔkɔ o wo ɛnyi tayi o ma kwuwo ungwu Ukpo. 7 Moo Ukpo a ya nzu ma te la ki kwu enzu wasɛsɛ, la ki kwu enzu umba ingbomo mo. 8 Kwuwongwu ɔlɛ onzu uwunawuna uwu e towo ɛzɔ ɛlɛ ma, akwu onzu gba e towo wu mo le mo, Ukpo gba e towo wu mo le. Moo Ukpo gba e shi yi Kwundu uwu Ukpo le.

9 Mekeka iyi idɛnyi ipwumo iyi esu, o zɔ yi izɔma shaa fo, moo Ukpo a zɔ yi-a te la lu pwu idɛnyi iyi esu. 10 Ongbulolo gba e yi te lu yi mu idɛnyi ɛlɛ izɔma la ɛmanyi yi wa mbwalu mu ɛzhi iyi Omasedoniya. Kwuwongwu ɔlɛ, ki kpayi ɛshɛku kaa la lu wo iyi bɔkɔ i ka tayi ma.

11 Onzu uwunawuna la kyakpɔ kaa la ŋɔma iyi oloto mbala enzu, onzonzu la bɔ eyi mu ɛduma iyi ewo wu kyamate bɔkɔ ki so yi tayi. 12 Gba lu wo ɛlɛ enzu umba bɔkɔ o yi Ukpo mo awu o lo yi mo, akwɛyi lunyi ba lu fulo eyi mu kiya ingyi onzu fo.

13 Ɛmɛnɛ mi, ki gyite kaa la lu yi ongbulolo uwu enzu umba bɔkɔ o kpomo-o awu, kaa la lu wo ubugyi kyamate enzu umba bɔkɔ o yi eyifulomo mo o wo tayi. 14 Ki kwu idu ki fulo te, Ɔzhizɔsi e kpomo akwɛyi Ukpo a gba wu la iyimo mu kwuvɔ, tatayi gba enzu umba bɔkɔ o kpomo mɛnyi iyi Ɔzhizɔsi awu, Ukpo a gba mba la iyimo akwɛyi o re moshi mbala Ɔzhizɔsi. 15 Kwokpo ungwu Ukpo kwu zɔ te kinzu umba bɔkɔ ki degbo la reyi le, ɔnu uwu kwɔfyi ungwu Ukpo a ba gbama awu, ki to keyi la enzu umba bɔkɔ o kpomo o awu mo. 16 Moo Ɔkwu nzu Okrasi mafyi wu aa wɔ moshi a nyɔ la anu itama mu opwu uwɔkwu, akwɛyi ɔlɔgbulɔ uwakɔ a kpa kwongangaraki akwɛyi wa mbwalu umba bɔkɔ o kpomo-o awu o da la iyimo keyi. 17 Mizhikembo iyi ɛnyi, kinzu umba bɔkɔ ki degbo lakwunyɔ bɔkɔ ki shimo, Ukpo akwu nzu ma ki bi kpolo esu mbala mba moshi. Tayi gba ki yi mbala Ɔkwu Ɔzhizɔsi le iyɔkpɔɔ. 18 Kwuwo kwɔngu la lu ka esu ɛnwu ma mu iso ɛlɛ.