1 ጎዳ ቃላይ ታኮ ዪዲ፥ 2 «ኢስራኤሌ ቢታ ጊሻስ፥ ‹ኣዋቲ ቃዉኤ ዎይኔ ሚን ናይታ ኣቺ ዚልኢዴስ› ጊዲ ኢንቴ ቶሴ ዮቲዛይ ኣዜ?

3 «ታኒ ኡባ ሃሪዛ ጎዳይ! ታኒ ዴኦ ጾሳ ጊዲዳይሳን ጫቃይስ፡ ሃይሳፌ ጉዬን ኢንቴ ሃይሳ ማላ ቶሴ ኢስራኤሌ ቢታን ዮቴኬታ። 4 ቤኢቴ ኣሳ ኡባ ሼምፖይ ታሳ፤ ዬሊዳይታ ሼምፖይ ታስ ጊዲዳ ማላ ኢስታ ናይታ ሼምፖይካ ታሳ፤ ናጋራ ኦዳ ሼምፖያ ሃይቃና።

5 ሱሬቴኒኔ ዎጋን ኦዛ ኢሲ ኣሲ ዲኮ፥

6 ዙምቡላታ ቦላ ኤቃ ጾሳታስ

ያርሼቲዳይሳ ኢዚ ሜና፤

ኢስራኤሌ ቢታንካ ዲዛ

ኤቃ ጾሳታኮ ጼሌና፤

ባ ላጌዛ ማቼይራ

ላይማቴና፤

ማጫሳ ዎጋይ ዪሺን

ማጫሳራ ኣቄና።

7 ኦናካ ኡንኤና፤

ጊዶ ኣቲን ኦይሶ ኤኪዳ

ሚሻካ

ታልኤ ኤኪዳዴስ ዛሬስ፤

ጋፊዳዴስ ባ ካ፥

ካሎቲዳዴስ ባ ማይኦ

ኢሜስ ኣቲን

ዎልቃራ ባስ ቦንቂ ኤኬና።

8 ኢዚ ዲቻስ ታልኤና፤

ቡቴ ዳሮ ዲቺካ ኤኬና፤

ባ ኩሼ ሞሮፔ ናጌስ፤

ኣሳስ ሱሬ ፒርዳ ፒርዴስ።

9 ታ ማራ ካሌስ፤

ታ ዎጋካ

ሱሬቴን ፖሌስ።

ሄሲ ጺሎ ኣሳ፤

ኢዚ ሼምፖራ ፓጻ ዳና» ጊዴስ።✝

10 ኡባ ሃሪዛ ጎዳይ፥ «ሃ ቢታኔዛስ ሼምፖ ዎዛ፥ ዎይኮ ሃይሳፌ ካሊ ዲዛይታፔ ኢሳ ኦዛ ኢሲ ማካላንቻ ናይ ዴኢኮ፥

11 ኢዛ ኣዋይ ሄይታፔ

ኢሳካ ኦንታ ኣጊኮ፥

ናዚ ዙምቡላታ ቦላ

ያርሾስ ሺቂዳይሳ ሚኮ፥

ባ ላጌዛ ማቼይራ

ላይማቲኮ፥

12 ሂዬሳኔ ሜቶቴቲዳዴ

ኡንኤኮ፥

ዎልቃራ ዳፊ ኤኪኮ፥

ኦይሶ ኤኪዳይሳ ዛሮንታ ኢጺኮ፥

ኤቃ ጾሳታኮ ሲሚኮ፥

ሃራሲዛ ኦሶታ ኦኮ፥

13 ዲቻስ ታልኢኮ፥

ቡቴ ዳሮ ዲች ኤኪኮ፥

ሄሳ ማላ ኣሲ ሼምፖራ ፓጻ ዳኔ? ሙሌካ ዴና! ኢዚ ሃይታ ሃራሲዛ ሚሻታ ኦዳ ጊሻስ ኢዚ ቱሙካ ሃይቃና፤ ባ ሱን ባርካ ኦይሼታና፤ ቱሙካ ሃይቃና።

14 «ሃ ኢታ ኣዴዛ ናዚ ጋኪዲ ና ዬሊኮ ኢዛ ናዚ ካሴ ኣዋይ ኦዳ ናጋራ ኡባ ቤኢዲ ኢዛ ኦንታ ኣጊኮ፥

15 ዙምቡላታ ቦላ

ያርሾ ሺሺዳይሳ

ኢዚ ሞንታ ኣጊኮ፥

ኢስራኤሌ ቢታን ዲዛ

ኤቃ ጾሳታ ጎይኖንታ ኣጊኮ፥

ባ ላጌዛ ማቼይራ

ላይማቶንታ ኣጊኮ፥

16 ኣስ ኡንኤንታ ኣጊኮ፥

ታልኤ ኢማናስ

ኦይሶ ኦይቾንታ ኣጊኮ፥

ዎልቃራ ቦንቂ ኤኮንታ ኣጊኮ፥

ጊዶ ኣቲን ባ ካ ጋፊዳዴስ፥

ባ ማይኦ ካሎቲዳዴስ ኢሚኮ፥

17 ባ ኩሼ ኢታ ኦሶፔ

ሺሺ ኤኪኮ፥

ዲች ዎይኮ ቡቴፔ

ዳሮ ዲች ኤኮንታ ኣጊኮ፥

ታ ዎጋ ናጊኮ፥

ታ ማራ ካሊኮ፥

ኢዚ ሼምፖራ ፓጻ ዳና ኣቲን ባ ኣዋ ናጋራን ሃይቄና። 18 ጊዶ ኣቲን ኢዛ ኣዋይ ኣሳ ማታ ናቂዳ ጊሻስ፥ ባ ኢሻፔ ዎልቃራ ቦንቂ ኤኪዳ ጊሻስ፥ ዴራ ጊዶን ቤሶንታ ሚሽ ኦዳ ጊሻስ ኢዚ ባ ናጋራን ሃይቃና።

19 «ኢንቴ ጊዲኮ፥ ‹ናይ ባ ኣዋ ናጋራን ኣይስ ቃጻዬቴኔ?› ጌታ። ናዚ ሱሬኔ ቱማ ኦዳ ጊሻስ፥ ታ ማራካ ሚን ናጊዳ ጊሻስ ኢዚ ሼምፖራ ፓጻ ዳና። 20 ሃይቃናስ ቤሲዛይ ናጋራ ኦዳ ሼምፖ። ናይ ባና ዬሊዳይታ ናጋራን ቃጻዬቴና፤ ሄሳ ማላንካ ዬሊዳይቲ ባ ናይታ ናጋራን ቃጻዬቴቴና። ጺሎይ ባ ጺሎቴ ኣይፌ ማና፤ ናጋራንቻይካ ባ ናጋራ ጋቴ ኤካና።✝

21 «ጊዶ ኣቲን ናጋራንቻይ ባ ኦዳ ናጋራ ኡባፌ ሲሚዲ ታ ማራ ኡባ ናጊኮ፥ ሱሬኔ ቱማ ጊዲዳ ኦሶ ኦኮ ኢዚ ሙሌካ ሼምፖራ ፓጻ ዳናፔ ኣቲን ሃይቄና። 22 ኢዛ ቆሆይ ኡባይ ቆዴቴና። ኢዚ ጺሎቴ ኦጌን ቢዳ ጊሻስ ሼምፖራ ፓጻ ዳና። 23 ቱማፔ ናጋራንቻ ሃይቆን ታ ኡፋዬታዚና? ጌስ ኡባ ሃሪዛ ጎዳይ። ሄሳፌ ቦላራ ኢዚ ባ ቢዛ ኢታ ኦጌፔ ሲሚዲ ሼምፖራ ፓጻ ዲኮ ታና ኡፋይሴኔ?

24 «ጊዶ ኣቲን ጺሎ ኣሲ ባ ጺሎቴፌ ሲሚዲ ናጋራ ኦኮ፥ ናጋራንቻይ ኦዛ ቱና ሚሽ ኦኮ ቱማፔ ኢዛዴይ ሼምፖራ ፓጻ ዳኔ? ኣካይ፤ ኢዚ ኦዳ ጺሎቴፌ ኢሶይካ ኢዛስ ቆዴቴና፤ ኢዚ ኣማኔቶንታ ኢጺዳ ጋሶኒኔ ኢዚ ኦዳ ናጋራ ኡባ ጋሶን ኢዚ ሃይቃና።

25 «ኢንቴ ጊዲኮ፥ ‹ጎዳ ኦጌይ ሱሬ ጊዴና› ጌታ። ኢንቴኖ ኢስራኤሌ ኣሳቶ! ሃኢ ሲዪቴ! ታ ኦጌይ ሱሬ ጊዴኔ? ጌላይ ኢንቴ ኦጌ ጊዴኔ? 26 ጺሎ ኣሲ ባ ጺሎቴፌ ሲሚዲ ናጋራ ኦዛ ዎዴ ባ ናጋራ ጋሶን ሃይቃና፤ ባ ኦዳ ቆሆ ጋሶን ኢዚ ሼምፖራ ፓጻ ዴና። 27 ናጋራንቻይ ጊዲኮ ባ ኢታ ኦሶፔ ሲሚዲ ኣማኔቴን ዲኮ ኢዚ ባ ሼምፖ ኣሻና። 28 ኢዚ ባ ኦዳ ቆሆ ኡባ ዩሺ ኣኬኪዲ፥ ባ ኦዳ ኢታቴ ኦሶ ኡባፌ ሲሚዳ ጊሻስ ኢዚ ሼምፖራ ፓጻ ዳና ኣቲን ሃይቄና። 29 ኢስራኤሌ ኣሳይ ጊዲኮ፥ ‹ጎዳ ኦጌይ ሱሬ ጊዴና› ጊዳ። ኢንቴኖ ኢስራኤሌ ኣሳቶ! ታ ኦጌይ ሱሬ ጊዴኔ? ጌላይ ኢንቴ ኦጌ ጊዴኔ?

30 «ሄሳ ጊሻስ ኢንቴኖ ኢስራኤሌ ኣሳቶ! ሄሳ ጊሻስ ኢንቴ ኦሶ ኦሶ ማላ ታ ኢንቴ ቦላ ፒርዳና፤ ሃኢ ማሮቴን ጌሊቴ፤ ኢንቴ ናጋራን ዮንታ ማላ ኢንቴ ናጋራ ኡባፌ ሲሚቴ። 31 ኢንቴ ታ ቦላ ኦዳ ቆሆ ኡባ ዎራ ኦሊቴ፤ ኢንቴስ ኦራ ዎዚናይኔ ኦራ ኣያናይ ዴኦ፤ ኢንቴኖ ኢስራኤሌ ኣሳቶ ኣይስ ሃይቄቲ? 32 ኦኒካ ሃይቃናይሳ ታ ኮይኬ ጌስ ኡባ ሃሪዛ ጎዳይ፤ ታኮ ሃ ሲሚዲ ሼምፖራ ፓጻ ዲቴ» ጊዴስ።