ሂዚቄላ ቲንቢቴ 27

ጺሮሲስ ዚላሌቲዳ ዚላስ

1 ጎዳ ቃላይ ታኮ ዪዲ፥ 2 «ሃይሶ ኣሳ ናዉ! ጺሮሲ ጊሻስ ዚላላ። 3 ኣባን ጌሊዛሶ ፔንጌን ዲዛሪሲኔ ዳሮ ኣባ ጋጻታን ዲዛ ዴሬታራ ዛልኢዛ ጺሮሲስ፥ ኡባ ሃሪዛ ጎዳይ፥

«ሃኔ ጺሮሴ!

‹ኔኒ ኔና ኬሂፔ

ሎኦ› ጋዳሳ፤

4 ኔ ዛዋይ ኣባ ጊዶን ዴስ፤

ኔና ኦዳይቲ ኬሂ

ሎኤ ኦዳ።

5 ኔ ሳንቃታ ኡባ፥

ሳኒሬፔ ዪዳ

ጺዳን ኦዳ፤

ማርካቤ ቱሳቲ

ሊባኖሴፔ ዪዳ

ዚጋፔ ጊጊዳ።

6 ባሳኔፔ ዪዳ ዎላፔ

ማርካቤ ላጊዛ ሚሽ ኦዳ፤

ቆጲሮሴ ዛዋፔ ዪዳ

ዚጋ ሚ፥

ዳንጋርሳ ዛሌን ኣሌቄሲዲ

ኔ ዉይጌዛ ኦዳ።

7 ኔ ማርካቤዛ ጺባቤይ

ጊብጼ ቢታ ላይኖፔ ኦሴቲዴስ፤

ሄሲ ኔና ባንዲራ ማላ ጎኢዴስ።

ሳሎ ሚሳቲዛኔ ኦቻ

ቴራ ሚሳቲዛ

ኔ ሻራቲ ቆጲሮሴፔ ዪዳ።

8 ማርካቤ ሶሎሊሲዛይቲ

ሲዶናፔኔ

ኣርዋዴፔ ዪዳይታ፤

ሃኔ ጺሮሴ፥

ኔ ማርካቤ ላጊዛይቲ

ሎሂዳ ኔ ኣሳታ።

9 ጌባሌፔ ሎሂዳ ዳናቲኔ

ሂላንቻቲ

ኔ ማርካቤታ ኮላናስ

ኔ ጊዶን ዴቴስ፤

ኣባ ቦላራ ቢዛ ማርካቤቲኔ

ማርካቤ ላጊዛይቲ ኡባይ

ሄሬጌቲዲ ኔናራ ዛልኤታናስ

ኔኮ ዬቴስ።

10 «ፓሪሴ፥ ሉዴኔ ፑጼ ኣሳቲ

ዎታዳራ ጊዲዲ

ኔ ኦላንቻታ ጊዶን

ኔና ሃጋዜቴስ፤

ኔስ ቴማ ጊዳና ማላ

ባንታ ጎንዳሌኔ

ባንታ ቢራታ ቆቤ

ኔ ጎዳ ቦላ ካቂዳ።

11 ኣርዋዴኔ ሄሌኬ ኣሳቲ

ኔ ጊምቤታ ኡባሶራ

ናጌቴስ፤

ጋማዴፔ ዪዳ ኣሳቲ

ኔ ጊምቤ ጊዶን ዴቴስ፤

ኢስቲ ባንታ ጎንዳሌ

ኔ ጊምቤዛ ዩሾን ካቂዳ፤

ኔ ፑላቴ

ኩሜ ኦዳ።

12 «ኬሂ ዳሮ ጊዲዳ ኔ ዱሬቴ ጋሶን ታርሴሴይ ኔናራ ዛልኤን ጋይታዱስ፤ ኢዛ ቢራኔ ቢራታ፥ ቆርቆሮኔ ኢርሳሴ ኤሃዳ ኔ ሻቃጬታ ላሜ ኤካዉስ።

13 «ያዋኔይ፥ ቱባሌይኔ ሜሼኬይ ኔናራ ኢሲፌ ዛልኤቴስ፤ ኣይሌታኔ ጻርቂማላፔ ኦሴቲዳ ሚሻታ ሻቃጬራ ላሜቴስ።

14 «ቤቲ-ቶጋርማ ኣሳቲ ጫና ፓራታ፥ ኦላ ፓራታኔ ባቁሎታ ሻቃጬን ላሜቴስ።

15 «ኤሮዶሴ*27፡15 ኤሮዶሴ ጊዛይሳ ሃራ ሃራ ቢርሼቲ ዴዳኔ ጌቴስ። ኣሳቲ ዛልኤን ኔናራ ጋይቲዳ፤ ዳሮ ሃሩሮ ዴሬቲ ኔ ሻቃጬታ ዳንጋርሳ ዛሌኒኔ ዞጴ ጌቴቲዛ ሚን ላሜቴስ።

16 «ኬሂ ዳሮ ጊዲዳ ኔ ኣቆታ ጋሶን ኣራሜይ ኔናራ ዛልኤን ጋይታዱስ፤ ኔ ሻቃጬካ ቤሉሬን፥ ኦቻ ቴራ ሚሳቲዛ ጫርቃን፥ ጺባቤን፥ ሎኦ ላይኖን፥ ሄሌሎኒኔ ዞኦ ኢንቁን ላሜቴስ።

17 «ዩሁዳይኔ ኢስራኤሌይካ ኣቶንታ ኔናራ ዛልኤን ጋይቲዳ፤ ኢስቲ ሚኒቴፔ ዪዳ ጊስቴ፥ ማሊዶ፥ ኤስ፥ ዛይቴኔ ባላሳኔ ጌቴቲዛ ሊዛ ዛይቴ ኔ ሻቃጬዛራ ላሜቴስ።

18 «ኔ ዳሮ ዱሬቴኔ ኢሻሎ ዱሳ ጋሶን ዳማስቆ ኣሳቲ ሄልቦኔ ዎይኔ ኡሺኔ ዛሃሬ ዴሬ ዶርሳ ኢስኬ ሺሺዲ ኔናራ ዛልኤቲዳ።

19 «ኦዜሌን ዲዛ ዳኔይኔ ጊርኬ ኣሳይ ኔ ዱማ ዱማ ሚሻ ሻሚዳ፤ ኢስቲ ኔ ሚሻራ ላማናስ ኣሌቄቲዳ ቢራታ፥ ዱማ ዱማ ሳዎታኔ ቃራፋ ኤሂዳ።

20 «ዳዳኔይ ኔ ሻቃጬ ጊላሴራ ላማዉስ።

21 «ኣራቢያ ሃላቃቲኔ ቄዳሬ ሃላቃቲ ኡባይ ኔ ላጌታ፤ ኢስቲ ላቃ፥ ርሾኔ ዴይሼ ኤሂዲ ኔናራ ዛልኤቴስ።

22 «ሳባ ዛልኣንቻቲኔ ኤራኢሜ ዛልኣንቻቲ ኔናራ ዛልኤቴቴስ፤ ዶሬቲዳ ቂማሜ ኡባ፥ ኣልኦ ሹቺኔ ዎርቃ ሺሺዲ ሻቃጬን ኔናራ ዛልኤቴቴስ።

23 «ካራኔ፥ ካኔ፥ ኤዴኔ፥ ሳባ፥ ኣሶሬኔ ኪልማዴ ዛልኣንቻቲ ኔናራ ዛልኤቴቴስ። 24 ሄይቲካ ኔ ጊያ ጊዶን ሎኦ ማይኦ፥ ሳሎ ሚሳቲዛ ካባ፥ ጺባቤ፥ ሄሳካ ቢራታ ቃላሜን ጶሊዛኔ ሚኒ ዳዴቲዳ ሲጋጃ ኤሂዲ ኔናራ ዛልኤቴቴስ።

25 «ታርሴሴ ማርካቤቲ

ኔ ሻቃጬ ጫኒ ጫኒ ኤፊዳ፤

ኔኒ ኣባ ጊዶን ዴጾ ጫና

ጫኔታዳ ዳሳ።✝27፡25-36 ኣጁ 18፡11-19

26 ማርካቤ ሶሎሊሲዛይቲ ጪማ

ኣባ ጊዶን ኔና ኤፊዳ፤

ጊዶ ኣቲን ኣርሼይ

ሞኪዛ ባጋ ጫርኮይ

ኣባ ጊዶን

ኔና ሜንሬዴስ።

27 ማርካቤ ዳፋይ

ኔ ቦላ ጋኪዛ ጋላስ

ኔ ኣቆታይ፥ ኔ ሻቃጬይኔ

ኔ ዛልኤ ሚሻይ፥

ኔ ማርካቤዛ ሶሎሊሲዛይቲ፥

ማርካቤዛን ቢዛይቲኔ

ማርካቤ ኦሳንቻቲ፥

ኔ ዛልኣንቻቲኔ

ኔ ዎታዳራቲ ኡባይ፥

ማርካቤዛን ዲዛይቲ ኡባይ፥

ዱጌ ጪማ ኣባን ሚቴታና።

28 ኔ ማርካቤ ሶሎሊሲዛይቲ

ዋሲሺን፥

ኣባ ጋጻን ዲዛይቲ

ያርኪያርኬቴስ።

29 ማርካቤ ሶሎሊሲዛይቲ ኡባይ

ባንታ ማርካቤታ ኦሊ ባና፤

ማርካቤ ሶሎሊሲዛይቲኔ

ማርካቤን ዲዛይቲ ኡባይ

ዎዲ ኣባ ጋጻን ኤቃና።

30 ባንታ ቃላ ቁ ሂስቲዲ

ጫሞ ዬሆ ኔስ ዬካና፤

ባንታ ሁኤን ጉዱላ ቆሊዲ

ቢዲን ቦላ ቡሉሌታና።

31 ኔ ጊሻስ ካዮቲዲ

ባንታ ሁኤ ቡሉሳና፤

ማቃካ ማይኣና፤

ዎዚናፔ ጬጪዲ

ጫሞ ዬሆ ኔስ ዬካና።

32 ኔ ጊሻስ ኢስቲ ዋሲሼ

ዬካና፤

ኢስቲ ኔስ ዚላሊሼ፥

‹ኣባን ሚቴቲ ጮኡ ጊዳይ፥

ጺሮሴ ማላይ ኦኔ?› ጋና።

33 ኔ ሻቃጬይ

ኣባፌ ፒኒ ኬዚዳ ዎዴ፥

ዳሮ ዴሬታ ካልሳሳ፤

ኔኒ ኔ ጊታ ኣቆታኒኔ

ኔ ሻቃጬዛን ቢታን ዲዛ

ካዎቴታ ዱሬሳዳሳ።

34 ሃኢ ጊዲኮ ጪማ ሃን

ኣባ ጊዶን ሜቄሬታ

ኩንዳዳሳ፤

ኔ ጫናይኔ ጫኔቲዳ

ኣሳይ ኡባይ

ኔናራ ኣባን ሚቴቲዳ።

35 ኣባ ጋጻን ዴኢዛ ኣሳይ ኡባይ

ኔ ቦላ ጋኪዳይሳ ቤኢዲ

ዳጋሚዳ።

ኢስታ ካዎቲካ ሂርጋን ኮኮሪዳ፤

ኢስታ ኣይፌሶይ ላሜቲዴስ።

36 ሃራ ካዎቴታ ጊዶን ዲዛ

ዛልኣንቻቲ

ኔ ቦላ ኣይ ኬና ዋይቂዶ!

ኔ ዉርሴይ

ዳጋንዛዝ ጊዲዴስ፤

ኔ ሜርናስ ቤታካ» ጊዴስ።