ዲስቴ ሌሚሶ
1 ኑኒ ዲኤቲዳ ኡዱፉን ላይን፥ ታማን ኣጊናን፥ ታማን ጋላሳን ጎዳ ቃላይ ታኮ ዪዲ፥ 2 «ሃይሶ ኣሳ ናዉ! ሃች ሃኖ ጋላሳዮ ዱማ ማዝጋባ፤ ባቢሎኔ ካዎይ ዬሩሳላሜ ሃ ጋላሳይን ዶዲ ኦይኪዴስ።24፡2 2ካዎ 25፡1፤ ኤር 52፡4 3 ሃ ማካላንቻ ኬስ ሃይሳፌ ካሊ ዲዛ ሌሚሶዛ ዮታ፤ ኡባ ሃሪዛ ጎዳይ፥
« ‹ቢራታ ዲስቴ ታማ ቦላ ዎ፤
ሄሳፌ ጉዬ ኢዛን ሃ ጉጃ።
4 ጌዳፔኔ ሚሳፌ ቃንጻዳ፥
ሎኦ ሎኦ ኣሾ ሙጻዳ፥
ዶሬቲዳ ሜቄታ
ጩኬሬዳ
ኢዛን ዬጋ።
5 ዉዴዛፔ ሞ ዶርስ
ኤካ ሹካ፤
ኢዛ ሜቄ ዶይሳናስ
ኤሶ ሚ ዳርሳ ዎ፤
ሱ ጋናሼ
ጋካናስ ዶይሳ፤
ሜቄዚካ ካጾ› ጌስ።
6 «ኡባ ሃሪዛ ጎዳይ፥
‹ሺኢዳ ቢራታ ዲስቴይስ፥
ኢዚ ሺኢ ዬዶንታሪስ፥
ሱ ጉሲዳ ካታማይስ
ኣዬ ኣና!
ሻካናስ ሳማ ዬጎንታ
ኢሳ ኢሳ ኬሳዳ ካይስ ኣሻ።
7 ኢዚ ጊዶን ኣሳ ሱ ዴስ፤
ዛላ ቦላ ቆንጬሶን
ጉሳዱስ ኣቲን
ቢታይ ካማናስ ዳንዳይዛ
ጋዴን ጉሳቤኩ።
8 ታ ሃንቆይ ኤጻና ማላኔ
ሃሎ ኬሳናስ
ታስ ኢንጄታና ማላ፥
ኢዚ ካማናስ ዳንዳዮንታ ማላ፥
ኢዚ ሱ ዛላ ቦላ
ቆንጬሶን ጉሳዲስ› ጌስ።
9 «ሄሳ ጊሻስ
ኡባ ሃሪዛ ጎዳይ፥
‹ሱ ጉሲዳ ካታማይስ
ኣዬ ኣና!
ታኒ ኢዛ ጹጌታና
ሚ ጉፓና።
10 ኤሶ ሚ ዶራ፤
ታማካ ኤ።
ሳዎ ጉጃዳ ኣሾዛ
ሎኤ ዶይሳ፤
ሜቄዚካ ሚጮ።
11 ሺኣዚ ሴራና ማላኔ
ቢራታ ሺኣዚ
ታማን ጹጌታና ማላ፥
ሜላ ዲስቴይ ሴላና ጋካናስ፥
ታማዚ ቦንቃናሼ ጋካናስ
ጮጬዛ ቦላ ዎ።
12 ዳሮ ዎልቃይ ዉሪኮካ
ዶሬቲዳ ቢራታ ሺኢ
ታማንካ ዬዳና ዳንዳዬና።
13 « ‹ኔ ቱኒዳይ ኔ ባላጌ ኦሶና፤ ታ ሃንቆይ ኔ ቦላ ፖሌታናሼ ጋካናስ ሃይሳፌ ጉዬ ኔ ጌሽ ጊዳካ፤ ጋሶይካ ታኒ ኔና ኔ ቱናቴፌ ጌሻና ኮዪንካ ኔ ጌያና ዶሳቤካ።
14 « ‹ታኒ ጎዳይ ሃይሳ ዮታዲስ፤ ታ ኦናስ ዎዴይ ጋኪዴስ፤ ታ ጉዬ ጊኬ፤ ቃቲኬኔ ሲኬ፤ ኔ ኦጌ ማላኔ ኔ ኦሶ ማላ ኔ ቦላ ፒርዴታና› ጌስ» ጊዴስ።
ሂዚቄላ ማቼይ ሃይቆ
15 ጎዳ ቃላይ ታኮ ዪዲ፥ 16 «ሃይሶ ኣሳ ናዉ! ኔኒ ኔ ኣይፌ ሼምፒሲዛ ሚሽ ታኒ ታ ሃንቆን ኔፔ ኤካ ዲጋና፤ ኔኒ ጊዲኮ ዋሶፋ፤ ዬኮፋ፤ ኣፉንካ ጉሶፋ። 17 ኔ ቃላ ዚቂ ሂስታዳ ካዮታሼ ሚላላ ኣቲን ሃይቂዳይሳስ ዬኮፋ፤ ኔ ሁኤፔ ቁራጬ ዲጎፋ፤ ኔ ቶሆፔ ጫማ ኬሶፋ፤ ኔ ዶና ጋ ካሞፋ፤ ሾቺካ ሞፓ» ጊዴስ።
18 ታኒካ ዎንታራ ዴራስ ሄሳ ዮታዲስ፤ ሄ ጋላሳ ኦማርሳ ዎዴ ታ ኬ ኣዬያ ሃይቃዱስ፤ ዎንቴ ጋላስ ማላዶ ጎዳይ ታና ኣዛዚዳ ማላ ኦዲስ። 19 ዴሬዚ ታና፥ «ኑስ ኣይ ኪታ ዮታና ኮያዳ ኔ ሃይሳ ኦዳኮ ኑስ ዮቲኪ?» ጊ ኦይቺዴስ።
20 ታኒካ ዴራስ ዛራዳ፥ «ጎዳ ቃላይ ታኮ ዪዲ፥ 21 ኢስራኤሌ ኬስ ኡባ ሃሪዛ ጎዳይ፥ ‹ኢንቴ ጬቄቲዛ ዎልቃ፥ ኢንቴ ኣይፌ ሼምፒሲዛሶዛኔ ኢንቴ ዎዚናስ ኡፋይስ ጊዲዳ ጾሳ ኬ ታይሳ ታ ቱኒሳና። ኢንቴ ዬጊ ቢዳ ኢንቴ ማጫ ናይቲኔ ኣቱማ ናይቲ ማሻን ዉራና። 22 ታ ኦዳ ማላ ሄ ዎዴ ኢንቴካ ኦና፤ ኢንቴ ዶና ጋ ካሜኬታ፤ ሾቺካ ሜኬታ። 23 ኢንቴ ሁኤፔ ቁራጬ ዲጌኬታ፤ ኢንቴ ቶሆፔ ጫማ ኬሴኬታ፤ ኢንቴ ኢንቴ ናጋራን ጊልቃና፤ ኢሶይ ኢሳራ ቶኪ ሼምፓና ኣቲን ካዮስ ኡቴኬታኔ ዬኬኬታ። 24 ሄ ዎዴን ሂዚቄሊ ኢንቴስ ማላታ ጊዳና፤ ኢዚ ኦዳ ማላ ኢንቴካ ኦና› ጊዴስ። ኡባ ሃሪዛ ጎዳይ ታና ጊዲዳይሳ ሃይሲ ሃኒዛ ዎዴ ኢንቴ ኤራና» ጌስ።
25 ጎዳይ ታና፥ «ሃይሶ ኣሳ ናዉ! ባንታ ዎልቃ፥ ባንታ ኡፋይሳ፥ ባንታ ቦንቾ፥ ኢስታ ኣይፌስ ሼምፖሶኔ ኢስታ ዎዚናስ ኡፋይስ ጊዲዳ ኢስታ ማጫ ናይታኔ ኣቱማ ናይታ ጋ ታ ኢስታፌ ኤኪዛ ዎዴ፥ 26 ሄ ጋላስ ኬሲ ኤኪ ኣቲዳ ኣሲ ሄ ፓፑን ዮታናስ ኔኮ ያና። 27 ሄ ጋላስ ኔ ዶናይ ዶዬታና፤ ኔኒካ ኢዛራ ሃሳያና፤ ሄሳፌ ጉዬ ኔ ዶና ዱዴ ጊዳካ፤ ኔ ኢስታስ ማላታ ጊዳና፤ ታኒ ጎዳ ጊዲዳይሳ ኢስቲ ሄ ዎዴ ኤራና» ጊዴስ።