ሂዚቄላ ቲንቢቴ 21

ፒርዳስ ጊጊ ኡቲዳ ጎዳ ማሻ

1 ጎዳ ቃላይ ታኮ ዪዲ፥ 2 «ሃይሶ ኣሳ ናዉ! ኔ ኣይፌሶ ጌዴ ዬሩሳላሜኮ ዛራ፤ ጾሳ ኬ ቦላ ቃላ ዮታ፤ ኢስራኤሌ ቢታ ቦላ ቲንቢቴ ዮታ። 3 ኢስታስ ጎዳይ፥ ‹ታ ኔ ቦላ ዴንዳዲስ፤ ታኒ ታ ማሻ ኮሆፔ ሾዳዳ ጺሎ ኣሳኔ ኢታ ኣሳ ኔ ጊዶፌ ዲጋና። 4 ጺሎኔ ዎርዶ ይሳና ታ ማሻይ ዱጌሃፔ ፑዴሃ ጋካናስ ዲዛ ዴራ ኡባ ቦላ ኮሆፔ ሾዴታና። 5 ታኒ ጎዳይ ታ ማሻ ኮሆዛፔ ሾዲዳይሳኔ ዛራዳ ጉዬ ኮሆን ጉዬ ጌልንታይሳ ኣሲ ኡባይ ኤራና።›

6 «ሄሳ ጊሻስ ሃይሶ ኣሳ ናዉ! ሜቂዳ ዎዚናን ጫሞ ኦሌ ኦላ። 7 ኢስቲ ኔና፥ ‹ኣይስ ኦላይ?› ጊ ኦይቺኮ፥ ኔኒ፥ ‹ሲንራ ዪዛ ኢታ ዎሬ ጊሻስ ኦላይስ፤ ዎዚና ኡባይ ታሃና፤ ኩሼ ኡባይ ዶጫና፤ ሼምፖ ኡባይ ፖ ጋና፤ ጉልባቴ ኡባይ ሃጻና› ጋ ዮታ። ኡባ ሃሪዛ ጎዳይ፥ ‹ቤኢቴ ሄሲ ያናኔ ፖሌታና› ጌስ» ጊዴስ።

8 ጎዳ ቃላይ ታኮ ዪዲ፥

9 «ሃይሶ ኣሳ ናዉ! ቲንቢቴ ዮታ፤

ጎዳይ፥ ‹ማሻ! ማሻ፥

ሌፌቲዳኔ ቁጬቲዳ ማሻ!

10 ሌፌቲዳይ ሲፋናስ፥

ቁጬቲዳይ ዎልቃን ማላ

ጶላናሳ።

ሂስቲን ሄሲ ኑና

ዋኒ ኡፋይሳና ዳንዳይዜ?

ኢዛ ማሻዚ ታ ናዛ

ካዎቴ ጉፌ

ጮ ጉፌ ማላ ካዴስ።

11 ኩሼን ኦይካና ማላ

ማሻይ ቁጬቲዲ ኢሜቲዴስ፤

ዎዛይሲ ኩሼን ኦይካናስ

ማሻይ ሌፌቲዲ ኢሜቲዴስ።

12 ሃይሶ ኣሳ ናዉ!

ሃይሲ ታ ዴሬ ቦላ

ኢስራኤሌ ዳናታ

ኡባ ቦላ ዪዴስ፤

ሄሳ ጊሻስ ዬሆኔ

ዋሶ ሲሳ፤

ኢስቲ ታ ዴሬዛራ ኢሲፌ

ማሻስ ኢሜቲዳ፤

ሄሳስ ኔ ጊሻስ ኔ ቲራ ኢጫ።

13 ቱማፔ ፓጬይ ያና፤

ኢዛ ማሻይ ካዳ

ካዎቴ ጉፌዛስ

ዉርሴ ባይንዳ

ኣጊኮ ዋናኔ?› ጌስ።

14 «ሃኢካ ኣሳ ናዉ! ቲንቢቴ ዮታ፤

ኔ ኩሼካ ባቃ።

ማሻይ ናምኡቶ ዎይኮ

ሄቶ ሾጮ፤

ሄሲካ ኬሂ ዎዛ፥ ሲፊዛኔ

ኡባሶራ ኢስታ ዶዲ

ኦይኪዳ ማሻ።

15 ዎዚና ኡባይ ታሃና ማላ፥

ኩንዲዛይቲ ዳራና ማላ፥

ታኒ ኢስታ ፔንጌታ ኡባን

ፖፖልኡ ጊዛ ማሻ

ዎዲስ።

ኣዬ ኣና፥ ፖፖልኡ

ጋና ማላ ቁጬቲዴስ፤

ሲፋናስካ ኮሆፔ

ሾዴቲዴስ።

16 ሃይሶ ማሻዞ!

ኔ ቃራቲዳ ባጋራ ሃዲርሲኔ

ኡሻች ቃንጻ።

17 ታኒካ ታ ኩሼ ባቃና፤

ታ ሃንቆይካ ኢርጻና ጋዲስ

ታኒ ጎዳይ» ጊዴስ።

ባቢሎኔ ካዎዛ ማሻ

18 ጎዳ ቃላይ ታኮ ዪዲ፥ 19 «ሃይሶ ኣሳ ናዉ! ባቢሎኔ ካዎዛ ማሻይ ዪዛ ናምኡ ኦጌታን ማላታ ቱስ ኤሳ። ናምኡ ኦጌቲካ ኢሲ ዴሬፔ ዶሜቴስ። ካታማ ኤፊዛ ኦጌቲ ሻኬቲዛሶን ማላታ ቱስ ኤሳ። 20 ኣሞኔታ ካታማ ኤራባ ቢዛ ማሻስ ኢሲ ኦጌዛን ማላታ ቱስ ኤሳ፤ ቃሴ ዩሁዳኔ ጊምቤቲዳ ዬሩሳላሜ ካታማ ቢዛ ማሻስ ናምኣን ኦጌዛን ማላታ ቱስ ኤሳ። 21 ባቢሎኔ ካዎዚ ባ ባናሶ ማሮ ዴማናስ ዳጋላ ኦጌታን ኤቃና፤ ባ ዎንዳፌታ ቃሴዲ ሳማ ዬጋና፤ ባ ኤቃ ጾሳታካ ዞሬ ኦይቻና፤ ቲሬ ሚጪ ጼላና። 22 ኢዚ ቢዲ ጊምቤ ፔንጌ ላሊዛ ዱሩማታ ኤሃና ማላ፥ ዎናስ ኣዛዛና ማላ፥ ጬቄቴ ሲሳና ማላ፥ ጊምቤ ፔንጌዛ ላሊዛ ዱሩማታ ካታማታ ፔንጌን ኤሳና ማላ፥ ቢታ ሺሺ ዶራና ማላኔ ሚጻታ ጊጊሳና ማላ ዬሩሳላሜ ሳማይ ኢዛስ ኡሻቻ ኩሼን ኬዚዴስ። 23 ሄሲካ ኢዛራ ጫቄቲዳ ኣሳታስ ባላ ካሌ ሚሳቲዴስ። ኢዚ ጊዲኮ ኢስታ ቆሆ ኢስታ ቆፍሳና፤ ኢስቲ ዲኢ ኤኪዲካ ባና።

24 «ሄሳ ጊሻስ ኡባ ሃሪዛ ጎዳይ፥ ‹ኢንቴ ኦዳ ሚሽ ኡባን ኢንቴ ቆንጬራ ናጋራ ኦዲ ኢንቴ ቆሆዛ ኢንቴ ቆፍሲዳ ጊሻሲኔ ሄሳካ ኢንቴ ኦዳ ጊሻስ ኢንቴ ዲኤቲ ባና።

25 « ‹ሃይሶ ጌኔኔ ቱና ጊዲዳ ኢስራኤሌ ዳናዞ! ኔ ቃጻዬቲዛ ዎዴይ ጋኪዴስ› ጌስ፤ ቱናኒኔ ኢታቴን ኩሚዳ ኢስራኤሌ ዳናዞ፥ 26 ኡባ ሃሪዛ ጎዳይ፥ ‹ኔ ሁኤን ዲዛ ጎሳ ቢርሻ፤ ኔ ካላቻ ዴን። ሃይሳፌ ጉዬ ካሴይሳ ማላ ሃኔና፤ ዚቂ ጊዳይ ቁ ጋና፤ ቁ ጊዳይካ ዚቂ ጋና። 27 ቡላሳና! ቡላሳና! ኣዋቴ ቤሲዛዴይ ያና ጋካናስ ኢዛ ቤኒ ማላ ሃኑኩ፤ ታ ኢዛስ ኢዞ ኣ ኢማና› ጌስ።

28 «ሃይሶ ኣሳ ናዉ! ኡባ ሃሪዛ ጎዳይ ኔና ኣሞኔታ ጊሻሲኔ ኢስታ ጫሻ ጊሻስ፥

‹ማሻ! ማሻ!

ዎናስ ሾዴቲዳ

ይሳናስ ቁጬቲዳ፥

ዎልቃን ማላ ፖፖልኡ

ጋና ቁጬቲዳ ማሻ።

29 ኔ ጊሻስ ቤኢዳ ዎርዶ ኣጁታይ፥

ኔስ ዮቴቲዳ

ሙሬኖይ ዲኮካ፥

ኢስታስ ጌኔ ጹኣይ ኩሚሺን፥

ኢስታ ባሬይ ጋኪሺን

ሲፌታና ቤሲዛ ኢታታ

ቆ ቦላ ዎና።✝21፡28-32 ኤር 49፡1-6፤ ሂዚ 25፡1-7፤ ኣሞ 1፡3-15፤ ሶፎ 2፡8-11

30 ማሻ ኮሆዛን ዛራ፤

ኔ ሜቲዳ ቢታን፥

ኔ ዬሌቲዳ ዴሬን ሄን

ታ ኔ ቦላ ፒርዳና።

31 ታኒ ታ ሃንቆ ኔ ቦላ ጉሳና፤

ታኒ ታ ሃንቆ ታማ

ኔ ቦላ ኤና፤

ኢታቴን ኤሬቲዳ

ሜንጼ ኢታ ኣሳታስ

ታ ኔና ኣ ኢማና።

32 ኔኒ ኤሶ ሚ ጊዳና፤

ኔ ዴሬን ኔ ሱ ጉካና፤

ሃይሳፌ ጉዬ ኔና ቆፍሲዛ

ሚሺ ዴና፤

ታኒ ጎዳይ ሃይሳ

ዮታዲስ›

ጌስ» ጊዴስ።