ፓሮኔ ጊሻስ ዚላሌቲዳ ዚላስ
1 ኑኒ ዲኤቲዳ ታማኔ ናምኣን ላይን፥ ታማኔ ናምኣን ኣጊናን፥ ኮይሮ ጋላሳን ጎዳ ቃላይ ታኮ ዪዲ፥ 2 «ሃይሶ ኣሳ ናዉ! ጊብጼ ካዎ ፓሮኔስ ዚላላሼ፥
« ‹ኔኒ ካዎቴ ጊዶን
ጋሞ ማላ፤
ኣባ ጊዶንካ ሚሚንቴ ማላ፤
ኔኒ ሻፋታን ቦቦልጩ ጋሳ፤
ሃታ ኔ ቶሆን ዋሳ፤
ፑልቶታ ኡሎሳሳ።
3 « ‹ኡባ ሃሪዛ ጎዳይ፡
ዳሮ ዴሬ ሺሻዳ፥
ታ ጊቴዛ ኔ ቦላ ዬጋና፤
ኢስቲ ኔና ታ ጊቴዛራ
ጎቺ ኬሳና።
4 ታ ኔና ቢታ ቦላ ዬጋና፤
ዴምባ ቦላካ ሚጫና፤
ሳሎ ካፎቲ ኡባይ
ኔ ቦላ ኡታና ማላ
ታ ኦና፤
ዎራ ዶኣቲ ኡባይ
ኔና ዪቄቲ ሚ ካላና።
5 ታኒ ኔ ኣሾ ዙማታ ቦላ ላላና፤
ዙሌታካ ኔ ኣሃን ኩንና።
6 ቢታ ኔ ሱን ታ ጫጲሳና፤
ኔፔ ጎጊዛይሲ ዙሌታ ኩሚዲ
ዙማታ ጋካናስ ዲዛ
ኦጌ ኡባ ካማና።
7 ታ ኔና ይሲዛ ዎዴ
ሳሎታ ጎዛና፤
ኢስታ ጾሊንቴታካ ሚሳና፤
ኣዋካ ሻራን ካማና፤
ኣጊናይካ ባ ፖኦ ዲጋና።32፡7 ኢሳ 13፡10፤ ማቶ 24፡29፤ ማር 13፡24-25፤ ሉቃ 21፡25፤ ኣጁ 6፡12-13፤ 8፡12
8 ሳሎን ፖኢሲዛ ፖኦታ ኡባ፥
ኔ ቦላ ታ ሚሳና፤
ኔ ቢታ ቦላ
ታ ማ ኤሃና› ጌስ።
9 «ኔ ቦላ ዪዳ ባሻ
ታ ሲሲዛ ዎዴ
ኔ ኤሮንታ ቢታን
ካዎቴታ ጊዶን፥
ዳሮ ኣሳታ ዎዚና ጬጪሳና።
10 ዳሮ ኣሳይ ኔ ቦላ ጋኪዳ ሜቶን
ዳጋማና ማላ ታ ኦና፤
ታኒ ታ ማሻ ኢስታ ሲንን
ሾዳ ሴሲሺን
ኔ ቦላ ጋኪዳ ሃኖዛ ጋሶን
ኢስታ ካዎቲ ዳጋማን
ኖዡ ጋና፤
ኔኒ ኩንዲዛ ጋላስ ኢሶይ ኢሶይ
ባ ሼምፖስ
ያሻን ኣይፌ ቂጶን ኮኮራና።
11 «ኡባ ሃሪዛ ጎዳይ
ጊብጼ ካዎስ፥
‹ባቢሎኔ ካዎ ማሻይ
ኔ ቦላ ያና።
12 ካዎቴታ ኡባፌ
ኬሂ ሜንጼ ኢታ ጊዲዳ፥
ዎልቃማ ኣሳታ ማሻን
ኔ ሺሺዳ ኦላንቻቲ
ኩንዳና ማላ ታ ኦና፤
ጊብጼ ኦቶሬቴ
ኢስቲ ኩንዲሳና፤
ኢዚስ ጮራ ኦላንቻታካ
ይሳና።
13 ዳሮ ሃ ማታን ዲዛ
ኢዚ ዉዴታ ታ ይሳና፤
ሄሳፌ ጉዬ ኣሳ ቶሆን
ዬቴቴና፤
ሜሄ ቶሆይ ኡሎሴና።
14 ሂስታዳ ታ ኢዚ ሃታ ጺሊሳና፤
ኢዚ ሻፋታ ዛይቴ ማላ
ታ ጎጊሳና።
15 ታ ጊብጼ ቡላሲሺን
ቢታይን ዲዛይ ኡባይ ይሺን፥
ሄን ዲዛ ኡባ ታኒ ሾጪሺን፥
ታኒ ጎዳ ጊዲዳይሳ ኢስቲ
ሄ ዎዴ ኤራና› ጌስ» ጊዴስ።
16 ኡባ ሃሪዛ ጎዳይ፥ «ሄሲ ኡባይ ኢዚ ጊሻስ ዚላሌቲዛ ዚላሳ፤ ካዎቴታ ማጫ ናይቲ ዚላላና፤ ጊብጼሲኔ ኢዚ ጮራ ኦላንቻታ ጊሻስ ዚላሊሼ ኮይዛና» ጌስ።
ጊብጼስ ዉርሴ ካዮ
17 ኑኒ ዲኤቲዳ ታማኔ ናምኣን ላይን፥ ሄ ኣጊናን፥ ታማኔ ኢቻሻን ጋላሳን ጎዳ ቃላይ ታኮ ዪዲ፥ 18 «ሃይሶ ኣሳ ናዉ! ጊብጼ ኦላንቻ ጮራታ ጊሻስ ዬካ! ኢዞኔ ዎልቃማ ካዎቴታ ማጫ ናይታ ዱጌ ዱፎን ጌሊዛይታራ ኢሲፌ ዱጌ ቢታ ጋርስ ጌል። 19 ኔኒ ኢስታስ፥ ‹ኢንቴ ሃራታፔ ኣዲ ሎኤቲ? ዱጌ ዎዳ ኣማኖንታይታራ ኢሲፌ ኢቻ› ጋ ዮታ። 20 ኢስቲ ማሻን ሲፌቲዳይታ ጊዶን ኩንዳና፤ ማሻይ ሾዴቲዴስ፤ ኢዛ ባ ዳሮ ኦሳንቻታራ ኢሲፌ ጎሼቱ። 21 ዱፎ ጊዶን ዎልቃማ ሃላቃቲ ጊብጼ ጊሻሲኔ ኢዚራ ዙፔቲዛይታ ጊሻስ ኢስቲ ዱጌ ዎዲ፥ ‹ማሻን ሃይቂዳይታራኔ ኣማኖንታይታራ ኢሲ ቦላ ኢቺዳ› ጋና።
22 «ኣሶሬይ ባ ኩሜ ኦላንቻታራ ዳዉስ፤ ኢዚፔ ማሻን ኩንዲዳይታኔ ሲፌቲዳይታ ዱፎን ዶዴታ ኡታዱስ። 23 ኢስታ ዱፎይ ጪማ ኦላ ጊዶን ዴስ፤ ኢዚ ኦላንቻቲ ኢዚ ዱፎ ዩሾን ኮሬቲዳ፤ ፓጻ ዲዛይታ ቢታን ሺሮ ዴንዳይቲ ኡባይ ሹኬቲዳ፤ ማሻንካ ዉሪዳ።
24 «ኤላማ ሄን ዳዉስ፤ ኢዚ ኦላንቻቲ ኡባይ ኢዚ ዱፎ ዩዪ ኣ ዴቴስ፤ ኡባቲካ ሹኬቲዳ፤ ማሻንካ ሃይቂዳ፤ ፓጻ ዲዛይታ ቢታን ሺሮ ዴንዳ ኡባቲ ኣማኖንታ ቢታ ጋርስ ጌሊዳ፤ ዱጌ ቢታ ጋርስ ጌሊዳይታራ ኢሲፌ ዬላ ማይኢ ጌሊዳ። 25 ኢዚ ዱፎ ዩሾን ዲዛ ኩሜ ኦላንቻታራ ሹኬቲዳይታ ጊዶን ሂጻይ ኢዚስ ጊጌቲዴስ። ኢስቲ ኡባይ ኣማኖንታይታኔ ማሻን ሲፌቲዳይታ፤ ኢስታ ሺሮይ ሼምፖራ ፓጻ ዲዛይታ ቢታን ዎሬኬቲዳ ጊሻስ ዱጌ ዱፎን ጌሊዛይታራ ኢሲ ቦላ ዬላ ማይኣና፤ ሹኬቲዳይታ ጊዶን ኢስቲ ኢቻና።
26 «ሜሼኬይኔ ቱባሌ ዱፎይ ባንታ ኦላንቻታ ዱፎን ዶዴቲ ኡታና፤ ኢስቲ ኡባይካ ኣማኖንታይታ ጊዲ ኡቲዲ ሼምፖራ ፓጻ ዲዛይታ ቢታን ባ ሺሮ ዴንዳ ጊሻስ ማሻን ሃይቂዳ። 27 ዳሮ ላይፌ ካሴ ሃይቂዳ ኦላ ቃራቲ ባንታ ማሻ ቦርኮቲዲ፥ ባንታ ጎንዳሌ ባንታ ቲራ ቦላ ኦይኪዲ፥ ባንታ ኩሜ ኦላ ሚሽ ኡባራ ዱፎን ጌሊዳይታ ማላ ቦንቾን ሞጌቲቤቴና። ሃ ኦላንቻቲ ሼምፖራ ፓጻ ዲዛይታ ቢታን ዲዛ ዎልቃማ ኣሳታ ቦላ ሺሮ ዴንዳ ጊሻስ ኢስታ ናጋራ ቂጻቴይ ኢስታ ሜቄ ቦላ ሼምፓና።
28 «ፓሮኔ! ኔኒካ ሄሳ ሜቃና፤ ማሻን ሲፌቲዳይታራኔ ኣማኖንታይታራ ኔ ኢሲ ቦላ ኢቻና።
29 «ኤዶማ ሄን ዴኣዉስ፤ ኢዚ ካዎቲኔ ኢዞ ሃሪዛይቲ ኡባይ ሄን ዴቴስ፤ ኢስቲ ዎልቃራ ዲዛይታ ጊዲኮካ ማሻን ሲፌቲዳይታራ፥ ዱጌ ዱፎን ጌሊዳይታራኔ ኣማኖንታይታራ ኢሲ ቦላ ኢቺዳ።
30 «ፑዴሃ ባጋ ሃሪዛይቲኔ ሲዶናቲ ኡባይ ሄን ዴቴስ፤ ሃይሳፌ ካሴ ኢስቲ ባ ዎልቃን ኣማኔቲዲ ሺሮ ዴንዳይታ ጊዲኮካ ሹኬቲዳይታራ ኢሲፌ ዬላን ኩንዲዳ፤ ማሻን ሲፌቲዳይታ ኣማኖንታይታራኔ ዱጌ ዱፎን ዎዳይታራ ኢሲፌ ዬላ ማይኢ ኢቻና።
31 «ፓሮኔይኔ ኢዛ ኦላንቻቲ ኡባይ ኢስታ ቤኣና፤ ማሻን ሲፌቲዳ ባ ኦላንቻታ ኡባ ካዮፔ ኢዚ ሚኔታና። 32 ታኒ ሃይሳፌ ካሴ ካዎቴቲ ኡባይ ጊብጼ ካዎስ ያያና ማላ ሼምፖራ ፓጻ ዲዛይታ ቢታን ሺሮይ ኣካና ማላ ኮይኮካ ፓሮኔይኔ ኢዛ ኦላንቻቲ ኡባይ ማሻን ሲፌቲዳይታራኔ ኣማኖንታይታራ ኢሲፌ ኢቻና፤ ታኒ ኡባ ሃሪዛ ጎዳይ ሃይሳ ዮታዲስ» ጊዴስ።