ኢዮቤ ማጻፋ 17

1 «ታ ኣያናይ ዳቡርዴስ፤

ታ ዳና ላይይካ

ፖሌታናዉ ማቲዴስ፤

ዱፎይካ ታና ናጌስ።

2 ታና ቂዛይቲ ታና ዩዪ ኣዳ፤

ታ ኣይፌይካ

ኢስቲ ኢጺዛይሳ ጼሌስ።

3 ታ ጾሳዉ! ኔፔ ኣቲን

ታስ ኤቃናይ ሃራይ ዴና፤

ኔኒ ኔ ሁኤራ ታስ ዋሴ ጊዳ።

4 ኢስቲ ፒልጊዲ

ኣኬካናዉ ዳንዳዮንታ ማላ

ኢስታ ቆፋ ጎርዳዳሳ፤

ሄሳ ጊሻስ ኢስቲ

ጾናና ማላ ኦፋ።

5 ሚሼ ዴማናዉ ጊዲ

ባ ላጌዛ ኣ ኢሚዛ

ኣሳ ናይታ

ቦላ ጎሜይ ጋካና።

6 «ጾሲ ታና ኣሳስ

ካሳ ሚሽ ኦዴስ፤

ኣሳይ ኢዛዴ ቦላ ጩቲዛ

ኣሳ ማላ ጊዳዲስ።

7 ኣፉንፌ ዴንዲዳይሳን

ታ ኣይፌቲ ዶልጁሚዳ፤

ኩሜ ታ ኣሳቴይካ

ኤሾ ማላ ጊዲዴስ።

8 ጺሎ ኣሳቲ ሃይሳን ዳጋሜቲዳ፤

ጌሻቲ ጾሳ ኣማኖንታ

ኣሳታ ቦላ ሃንቄቲዳ።

9 ጊዶ ኣቲን ጺሎቲ ቱማ ኦጌፔ

ካሬ ኬኤቴና፤

ጌሻቲ ሚኖቴ ቦላ

ሚኖቴ ጉጄቴስ።

10 «ኢንቴ ኡባይካ ናምኣን ዪዲ

ታ ሲንን ማርሼቲኮ፤

ኢንቴ ጊዶፌ ኢሲ ኣኬካራ ዲዛ

ኣስ ዴሚኬ።

11 ታ ላይይ ዉሪዴስ፤

ታ ቆፋይኔ ታስ ዎዚና ኣሞይ

ሃዳ ጊዲ ኣቲዴስ።

12 ሃይቲ ሃ ኣሳቲ

ኦማርሳ ጋላስ ጌቴስ፤

ፖኦዛ ቃሴ ማና

ሃኔስ ጌቴስ።

13 ሃይሳፌ ጉዬ ታስ ዲዛ ቃዳይ

ዱጌ ሃይቂዳ ኣሳቲ ዲዛሶ

ዱፎን ዎ፤

ያን ማሶን ታኒ

ታ ሂጻ ኦንጋና።

14 ዱፎ፥ ‹ታ ኣዋዉ!›

ጋዳ ታ ጼይጋና፤

ታና ሚዛ ጉጹኔታ ታኒ፥

‹ታ ኣዬ፥ ታ ሚቼዬ!›

ጋዳ ጼይጋና።

15 ሂስቲን ታስ ኣይ ሂዶታይ ዲዜ?

ታስ ሂዶታ ጊዲዛ ሚሽ

ኦኔ ታስ ጼላናይ?

16 ታኒ ዱጌ ሲኦሌ ዎሺን

ሂዶታይ ታናራ ኢሲፌ ዎኔ?

ኢሲፌካ ዱጌ ዱፎን

ኑ ጌላኔ?»