ኢዮቤ ማጻፋ 35

1 ኤሊሁይ ባ ሃሳያ ጉጂዲ ሂዝጊዴስ፤

2 «ኢዮቤ ኔ ኔና፥

‹ታኒ ጾሳ ሲንን ጺሎ›

ጊዛይሲ ሊኬ?

3 ‹ናጋራ ኦንታ ኣጊኮ

ታ ኣይ ጎኤታኔ?

ቃሴካ ኣይ ዴማኔ?› ጋዳ

ኔኒ ኦይቻዳሳ።

4 ታኒ ኔሲኔ ኔናራ ዲዛይታስ

ዛሮ ኢማና።

5 «ቁ ጋዳ ፑዴ ሳሎ ጼላ፤

ኔፔ ቁ ጊዲ ዲዛ

ሻራ ኣኬካ።

6 ኔኒ ናጋራ ኦኮ

ጾሳ ኣዛን ቆሃይ?

ኔኒ ኢዛ ዳርሳ ዳርሳ ቆሂኮ

ኢዛ ኣይ ኦናዉ ዳንዳያይ?

7 ኔኒ ጺሎ ጊዲኮ ኢዛስ ኣይ ኢማኔ?

ኢዚ ኔፔ ኣይኮካ ኮዬና።

8 ኔ ናጋራ ኦኮ ቆሃናይ

ኔ ማላ ኣሳታ ጻላ።

ኔ ሎኦ ሚሽ ኦኮካ

ኔ ጎኢዛይ ኣስ ጻላ።✝35፡6-8 ኢዮ 22፡2-3

9 «ኣሲ ሃራይ ዳርሲ

ቆሂሺን ዋሴስ፤

ባፔ ዎልቃቲዛዴ ኩሼፔ

ባና ኣሺ ኤካናዴስ

ማጋኔስ።

10 ጊዶ ኣቲን ኢስታፌ ኦኒካ፥

‹ታና ሜዳ

ጾሳይ ኣዋኔ?

ሌላ ጊዶ

ማዛሙሬ ኢሚዛይሲ ኣዋኔ?

11 ሜሄታፔ ኑና ኣ

ታማርሲዳ፤

ሳሎ ካፎታፔካ

ኣ ኤራንቻታ

ኦዳይ ኢዛ› ጊዳይ ባዋ።

12 ኢስቲ ዋሴቴስ፤

ኢዚ ጊዲኮ ኢስቲ ኦቶራንቻታኔ

ኢታታ ጊዲዳ ጊሻስ

ኢስታስ ዛሮ ኢሜና።

13 ጾሲ ቱማ ዎዚናፔ ጊዶንታ

ዋሶ ሲዬና፤

ኡባ ዳንዳይዛ ጾሳይ

ሄሳ ማላ ኤዝጌና።

14 ኢዮቤ! ኔኒ ታ ጾሳ ኣይኮካ

ቤኢኬ ጊኮካ፥

ኔ ሜቶይ ኢዛ ሲንን

ዴኢዛ ጊሻስ፥

ኔኒ ዳንዳያን

ናጋና ኮሼስ።

15 ቃሴካ ጾሲ ኔና

ባ ሃንቆን ሃንቆንታ

ኣሳ ኢታቴ ጮኡ ጊዲ

ኣና ኔስ ሚሳቲዜ?

16 ኢዮቤ! ኔኒ ጮ ሜላ

ሃሳያ ዳርሳሳ፤

ኤራቴ ባይንዳ

ጮ ጋዳ ሃሳያሳ።»