1 ኢዮቢ ሂዝጊ ዛሪዴስ፤

2 «ኢንቴ ታና

ኣዉዴ ጋካናስ ዋዪሳንዴቲ?

ኣዉዴ ጋካናስ ዮኦን

ታስ ሜቄ ሜንንዴቲ?

3 ሄኮ ኢንቴ ታና ታሙቶ ጫዬታ፤

ታና ካዉሺሼካ

ዬላቴኬታ።

4 ቱሙካ ታኒ ባሌቲዳ ጊዲኮ

ታ ባላይ ታና ጻላ ቆሃና።

5 ቱሙ ኢንቴ ኢንቴና ቂሲዲ

ታ ካዉሻቴ ኢንቴስ

ማርሼ ሚሽ ኦታ።

6 ጊዲኮካ ሃይሳ ኡባ ሜቶዛ

ታ ቦላ ጋዳይኔ፥

ጊቴ ጊዶ ታና ዬጊዳይ

ጾሳ ጊዲዳይሳ

ኢንቴ ኤራና ማላ ታ ኮያይስ።

7 ታ ቆሄታዲስ ጋዳ ዎሲን

ታና ሲዪዛ ኣስ ዴማቤኬ፤

ታ ቃላ ቁ ኦዳ

ማጋኒኮካ

ሱሬ ፒርዳ ዴማቤኬ።

8 ጾሲ ታስ ኦጌዛ ጎርዲዳ ጊሻስ

ኣናሶይ ዴና፤

ታ ባናሶዛካ

ማን ጎርዲዴስ።

9 ታ ቦንቾዛ ታ ሁኤፔ ቃሪዲ

ታና ካዉሺዴስ።

10 ታ ኣሳቴ ኡባሶራ

ቆጼሬዲ

ሙሌራ ላሊዴስ፤

ታስ ዲዛ ሂዶታ

ጻጶፔ ሾዴቲዲ ኩንዲዛ

ሚ ማላ ኦዴስ።

11 ጾሲ ታና ሃንቄቲዲ ጊታ ሜቶ

ታ ቦላ ጋዴስ፤

ባስ ሞርኬ ማላ ታና ቆዲዴስ።

12 ታና ይሳናስ

ባ ኦሳንቻታ ኪቲዴስ፤

ታስ ዱንካኔዛ ዩዪ ኣዲ

ታና ጊዶዳ።

13 «ጾሲ ታ ኢሻቲ

ታፔ ሃካና ማላ

ኦዴስ፤

ታና ኤሪዛ ኣሳቲ ኡባይ ታና

ኣሳ ዴሬ ኣስ ኬሲዳ።

14 ታ ዳቦቲ ታፔ ሃኪዳ፤

ታ ላጌቲካ ታና ባሊዳ።

15 ታኒ ታሶን ኢማቴ

ሞካ ኤኪዳይቲ

ኡባይ ታና ባሊዳ፤

ታ ጋራዴቲ

ታና ኢማ ማላ ቆዲዳ፤

ኣላጋ ማላካ ጼሊዳ።

16 ታኒ ታ ኦሳንቻዛ ጼይጊሺን

ኢዚ ታስ ኮዬና፤

‹ታና ማዳርኪ›

ጋ ታ ዋሲሺንካ

ኤሮ ጌና።

17 ታ ማቻ ታፔ ኬኢዛ

ፔኖዛ ሻቴታዱስ፤

ታ ኢሻቲካ ሃራሬቲዳ።

18 ቄሪ ናይቲካ ታና ካቴስ፤

ታና ቤኢዛ ዎዴ

ታ ቦላ ቂልጬቴስ።

19 ታስ ማታ ላጌቲካ

ታና ሻቴቲዳ፤

ታ ሲቆቲ ታ ቦላ

ሞርኬ ጊዲ ዴንዲዳ።

20 ታስ ኣሾዚ ዉሪን

ጋልባዚ ሜቄራ ኦይኬቲዴስ፤

ታና ሺሺን ኣታዲስ።

21 «ታ ሲቆቶ! ጾሳ ኩሼይ

ታና ሾጪዳ ጊሻስ

ኣኔ ዛይ ታስ ሚሼቲቴ!

ታስ ቃቲቴ!

22 ጾሲ ታና ጎዶይሳ ማላ

ኢንቴካ ታና ኣዛስ ጎዴቲ?

ሃይሳ ጋካናስ ኢንቴ ታና

ዋዪሲዳይሲ ጊዴኔ?

23 ሃይሳ ጋካናስ

ታ ሃሳይዳ ቃላ ኣኬኪዛይኔ

ማጻፋን ጻፊዛ ኣሲ ዲዛኮ

ታና ኣይ ማላ ኡፋይሳኔሺን!

24 ኢስኪርቶኒኔ ኢርሳሴን ጻፌቲዲ

ዎይኮ ሹቻ ቦላ

ዎጬቲ ኡቲዲ

ሜርናስ ዳና ማላ

ኦዳኮ

ኣይ ማላ ታና ኡፋይሳንዴሺን!

25 ጊዶ ኣቲን ታና ኣሺዛይሲ

ፓጻ ዴኢዛ ማላ

ዉርሴ ዎዴን

ታና ዎዛናስ

ቢታ ቦላ ኢዚ ኤቃናይሳ

ታኒ ኤራይስ።

26 ታስ ጋልባዚ ሜቴቲ ዉሪኮካ

ታኒ ታ ኣሳቴፌ ሻኬታዳ

ታኒ ጾሳ ቤያናይሳ ኤራይስ።

27 ሃራ ኣስ ጊዶንታ

ኢዛካ ታኒ ታ ሁኤን

ታ ኣይፌራ ቤያና፤

ታ ዎዚናይካ ሄ ጋላሳዮ

ኬሂ ላሞቴስ።

28 «ታ ሲቆቶ!

ታና ዋላሲዲ ዋዪሳናስ፥

‹ሃይሳ ሜቶዛ ኢዚ ባርካ

ባስ ኤሂዴስ› ጊዲ ሃሳዬታ።

29 ጾሳ ሃንቆይ ማሻን

ቃጻዬቴን

ጋዛ ጊሻስ ማሻይ

ኢንቴና ሞንታ ማላ ናጌቲቴ።

ጾሳ ፒርዳይ ዲዛይሳካ ኤሪቴ።»