1 ናኢማኔ ዴሬ ኣስ ዞፋሬይ

ሂዝጊ ዛሪዴስ፤

2 «ኢዮቤ! ታና ዪሎ ቆፋይ

ኔ ቦላ ዛሮ

ኢማና ማላ ሱጊዴስ፤

ሄሳ ጊሻሳ

ታ ሃሳያናዉ ኤሶቲዳይ።

3 ታኒ ታና ካዉሺዛ ሴራ ሲያይስ፤

ታ ኣኬኪዛ ኣኬካዚ

ታና ኔስ

ዛሮ ኢማ ኢማ ጌስ።

4 «ኣሲ ቢታ ቦላ

ቤቶሶፌ ዶሚዲ

ካሴፔ ሃይሳ ማላ

ጊዶይሳ ኔ ኤራይ?

5 ኢታ ኣሳ ጬቄቴ

ጉ ዎዴሳ፤

ጾሳ ካዲዛ ኣሳታስ ዲዛ

ኡፋይሳይ ቂጲዳ ኣይፌይ

ጼላና ጋካናሳ።

6 ኢታ ኣሲ ኣይኮካ ኦቶሬቲዲ

ሳሎ ጋኪኮካ፥

ኢዛ ሁኤይ ሻራ ጋኪ

ቦቺንካ፥

7 ኢዚ ባ ሼሻ ኡቴ ማላ

ሙሌራ ፒቴታና፤

ካሴ ኢዛ ቤዪሼ ዲዛ ኣሳቲካ፥

‹ኢዚ ኣዋን ዲዜ ጋኔ?›

8 ኣጉሞ ማላ ቲምኢ ጊ

ይዛ ጊሻስ ቤቴና፤

ኦማርሳ ኤሉን ማላ

ኢዚ ያና።

9 ኢዚ ዲዛሶፔ ኤሾራ

ይዛ ጊሻስ፥

ኢሲቶ ኢዛ ቤኢዳ ኣስ

ናምኣን ዛሪ ቤዬና።

10 ኢዛ ናይቲ ኣዳሺዲ

ኢስታ ኣዋይ ማንቆታፔ

ጌኔራ ቦንቂዳ

ሚሻ ዛራና።

11 ዎልቃን ኩሚዳ ዬላጋቴ

ኣሳቴይ ጉ

ዎዴፔ ጉዬ ቢታ ጊዳና።

12 «ኢታቴ ኢዛ ዶናን

ካ ማላ ኣይ ማልኢኮካ

ባ ኢንጻርሳን ኢዚ ላጪ ጼሊኮካ፥

13 ዉሮንታ ማላ ዶናን

ጮሚሼ ጋምኢኮካ

14 ኢዛ ኡሎ ጊዶን

ጫሞን ላሜታና፤

ኢዛስ ሾሻ

ማርዜ ማላ ጊዳና።

15 ኢታ ኣሲ ባ ሚዳ ሚሻ

ኡንኤቲ ዛራና፤

ኡሎ ጊዶን ዲዛይሳካ

ጾሲ ኢዛ ጮሻና።

16 ኢታ ኣሲ ሚዛይሲ ዉሪ

ኢዛስ ሾሻ

ማርዜ ማላ ጊዳና፤

ሾሻ ማርዜ ማላ ጊዲዲ

ኢዛ ዎና።

17 ዎጋራ ዛይቴይ ዲኦ ማላ ጎጊሺን

ኤሲኔ ማ ሻፋ

ሃ ማላ ጎጊሺን

ኢዚ ቤኦንታ ሃይቃና።

18 ኢዚ ባ ዳቡርዳ ዳቡራ ኣይፌ

ዛሬ ጌዴ ኢማና ኣቲን

ባ ሁኤስ ሜና።

ዛልኢዲ ኢዚ ሺሺዳ

ዴኦዛንካ ኡፋዬቴና።

19 ሃይሲካ ሃንዛይሲ

ኢዚ ማንቆታ ኡንኤዳ

ጊሻሲኔ

ባ ኦንታ ኬ

ጌኔን ኤኪዳ ጊሻሳ።

20 «ኢዛ ሂርጌቴዚ

ኢዛስ ሼምፖ ይሲዴስ፤

ኢዚ ሺሺዳ ሃሮይካ

ኢዛ ኣሻናዉ ዳንዳዬና።

21 ኢዛ ሃሮይ ዉሪ

ቁጬቲ ዉሪዛ ጊሻስ

ኢዛስ ዶናን ጌልናዚካ

ኣቴና።

22 ኣይኮካ ኢዚ ዱሬ ኣስ ጊዲንካ፤

ኢዛ ዪሎይ ጋካና፤

ዳሮ ሜቶይካ ኢዛራ ጋይታና።

23 ኢዚ ታ ማዳ ካላና ጊሺን

ጾሲ ዎልቃማ ሃንቆ

ኢዛ ቦላ ዬጋና፤

ባ ሃንቆዛካ ኢዛ ቦላ ጉሳና።

24 ኢዚ ቢራታ ማሻፌ ኣቲኮ

ጻርቂማላ ዎንዳፌን ጫዴታና።

25 ዎንዳፌዚካ ዞካራ

ካን ኬኣና፤

ጾጾልቁ ጊዛ ጼራዚ ኢዛስ

ቲሬዛ ዱሴሬዲ ኣና፤

ዎልቃማ ሂርጋን

ኢዛ ዎዚናይ ዳጋማና።

26 ኢዚ ሺሺዳ ሃሮዚ

ኡባይ ጊርዲ ጊዳ

ማ ጊዶን ያና፤

ኣሲ ኦይንታ ታማይ ጹጋና፤

ኢዛሶን ኣቲዛ ሚሽ ኡባ

ዲፒ ሂስታና።

27 ኢዚ ኦዳ ናጋራ

ሳሎይ ቆንጪሳና፤

ሳኣያካ ኢዛስ

ሞርኬ ጊዳዳ ዴንዳና።

28 ጾሳስ ሃንቆ ጋላስ

ኢዛ ሶን ዲዛ ሃሮይ ዉሪ

ዲኦን ቁጬቲ ያና።

29 ጾሲ ማካላንቻታስ

ዎዳ ቃዳይ፥

ኢታ ኣሳቲ ኤካና ዋጋይ ሃይሳ።»