1 «ኢዮቤ! ታ ኔስ

ዮቲዛይሳ ሲያ፤

ታ ኔስ ጊዛይሳካ ኣኬካን ኤዝጋ፤

2 ታ ኔስ ዛሮ ኢማናስ

ጊጌታ ኡታዲስ፤

ታ ዶናይካ

ጊጌቲ ኡቲዴስ።

3 ታ ሃሳይዛ ቃላቲ

ታ ዎዚና ሱሬቴ

ቆንጪሴቴስ፤

ታ ኢንጻርሳይ

ታ ኤሪዛ ቱማ ሃሳዬስ።

4 ታና ሜዳይ ጾሳ ኣያና፤

ታስ ዴኦ ኢሚዳይ

ኡባ ዳንዳይዛ ጾሳ ኣያና።

5 ኔኒ ዳንዳይዛ ጊዲኮ

ታ ጎይሳስ ዛሮ ኢማ፤

ኔ ጋናይሳ ጊጊሳዳ

ታናራ ሃሳዬታ።

6 ሄኮ! ታኒ ጾሳ ሲንን

ኔናራ ጊና፤

ታኒካ ሜቲዳይ ኡርቃፌ።

7 ኔኒ ታስ ያያናስ ቤሴና፤

ታኒካ ኔና

ናቃናዉ ኮሼና።

8 ኔኒ ሃሳይዳ ኡባ ኤዝጋሼ

ታ ጋምኣዲስ፤

ኔ ኢንጻርሳፌ ኬኢዳ ቃላታ

ታ ሲያዲስ።

9 ኔኒ ሃሳያሼ፥ ‹ታኒ ቆሆይኔ

ቦሬይ ባይንዳ ኣሳ፤

ታኒ ናጋራ ኦንታዴኔ

ጺሎ ኣሳ።

10 ጊዶ ኣቲን ጾሲ ታና ቃጻያናስ

ጋሶ ኮዬስ፤

ታናካ ባስ ሞርኬ ማላ ቆዴስ።

11 ታ ቶሆታ ኢዚ

ዱሩማን ዱጺ ቃቺዴስ።

ታ ቢዛሶ ኡባን

ታና ጼሌስ› ጋዳሳ።✝

12 «ኢዮቤ! ሃይሲ ኔ ሃሳያይ

ባላ ጊዲዴስ፤

ታኒካ ኔስ

ቆንጪሳናስ ኮያይስ፤

ጾሲ ኣሳ ኡባፌ ኣስ።

13 ሂስቲን፥ ‹ኔኒ ጾሲ

ኣሲ ማጋኒዛ ማጋና

ሲዬና› ጋዳ

ኣይስ ጾሳ ቦላ ዙዙማይ?

14 ኣሲ ኣኬኬናፌ ኣቲን

ጾሲ ዱማ ዱማ

ኦጌራ ሃሳዬስ።

15 ኦማርስ ኣሲ ሂጻን ኢቺ ዲዛ ዎዴ

ኣሲ ኮይሮ ስኮ

ሴራጊዳ ዎዴ፤

ኣጉሞኒኔ ኣጁታንካ

ጾሲ ሃሳዬስ።✝

16 ሄ ዎዴ ኣሲ ኢዛ ቃላ ሲያና ማላ

ሃይ ዶዬስ፤

ኢዚ ባ ኢሚዛ ሴራንካ

ዳጋንስ።

17 ሄሳ ማላ ኦሶን ኣሲ

ናጋራ ኦንታ ማላ ዲጌስ፤

ኦቶሬቴካ ኢስታፌ ዴንስ።

18 ጾሲ ኣሳ ሼምፖ

ዮፔ ኣሼስ፤

ባሻ ሃይቆፔካ ዎዜስ።

19 ዎይኮ ኣሲ ሜቄን ጌሊዳ

ሳኮን ዲሺን

ኣሲ ባ ባላፔ ሲማና ማላ

ሃርጌ ሂጻን ጾሲ ዞሬስ።

20 ሃይሳ ማላን ሃርጋንቻ ካ

ላንቃናስ ኢዛ ኢቴስ፤

ሎኦ ካካ ሃራሴስ።

21 ጊልቃቴፔ ዴንዶይሳን

ኢዛስ ኣሾዚካ ዉሪዴስ፤

ሜቄ ጻላ ኣቲዴስ።

22 ኢዛ ሼምፖይ ኬዛናሲኔ

ሞጌታናስ ማቲዴስ።

23 «ኣሲ ሱሬ ኦጌ ቤሳናስ

ሺያን ቆዴቲዛ

ጾሳ ኪታንቻታፔ

ኢሶይ ኢዛ ማዳናስ ዪዳኮ፥

24 ኪታንቻይ ኢዛስ ቃቲዲ፥

‹ኢዛ ዎዚዛዴ

ታ ዴሚዳ ጊሻስ

ኢዚ ዱጌ ዱፎን

ዎንታ ማላ

ኣጋጋ!› ጊዲ

ሃይቆ ኦይኪዳኮ፥

25 ሄሳ ጊሻስ ኢዛ ኣሳቴይ፥

ቄሪ ና ኣሾ ማላ

ዛሪ ኦራጻና፤

ኢዛስ ዬላጋቴ ዎዴ ማላ

ቃሴካ ሃናና።

26 ሄ ዎዴ ጾሳኮ ኢዚ ዎሳና።

ኢዛ ዎሳካ ጾሲ ሲያና፤

ጾሳ ሲን

ኢዚ ቤኢዲ ኡፋዬታና፤

ጾሲካ ኢዛ ዎሳስ

ዛሮ ኢማና።

27 ኢዚ ኣሳ ሲንን፥

‹ታኒ ናጋራ ኦዲስ፤

ሱሬ ጊዲዳይሳካ ጌላሳዲስ።

ጾሳይ ጊዲኮ ታ ሞራ ማላ

ታስ ኦቤና።

28 ታኒ ዱፎን ጌሎንታ ማላ

ታና ኣሺዴስ፤

ሄኮ ሃኢ ፓጻ ዳዳ

ታኒ ፖኦ ቤያይስ› ጊ ዬጺዴስ።

29 «ሄኮ! ጾሲ ሃይሳ

ኡባ ሚሻ

ኣሳስ ዛሪ ዛሪ ኦስ።

30 ዴኦን ዲዲ ፖኦ ቤያና ማላ

ኢዛ ሼምፖ ሃይቆፔ ኣሼስ።

31 «ኢዮቤ! ታ ኔስ ዮቲዛይሳ

ሎኤ ሲያ፤

ታኒ ኔስ ዮታይስ

ኣኔ ኔኒ ጮኡ ጋ።

32 ኔኒ ሃሳያናስ

ኮይዛ ሚሺ ዲኮ

ታስ ዮታ፥

ታ ኔኒ ጺሎ ጊዲዳይሳ

ኔና ቤሳና ኮያይስ።

33 ኣካይ ጊኮ!

ታኒ ሃሳይዛይሳ

ጮኡ ጋዳ ሲያ፤

ታኒ ኔና

ኤራቴ ታማርሳና» ጊዴስ።